Sipas një raporti të Kombeve të Bashkuara (OKB), ndryshimet klimatike po ndikojnë në disponueshmërinë, qasjen, përdorimin dhe stabilitetin e sigurisë ushqimore.
“Kur toka degradohet ajo bëhet më pak produktive, duke kufizuar atë që mund të rritet dhe duke reduktuar aftësinë e tokës për të thithur karbon”, thekson raporti i Panelit Ndërqeveritar për Ndryshimet Klimatike (IPCC), që tregon rrezikun dhe efektin e ndryshimeve klimatike.
Raporti shton se kjo rëndon ndryshimet klimatike, ndërsa ndryshimet klimatike nga ana tjetër rëndojnë degradimin e tokës në mënyrë të ndryshme.
IPCC shpjegoi se toka, e cila duhet të mbetet produktive për sigurinë ushqimore, tashmë është nën presion në rritje nga aktiviteti njerëzor dhe ndryshimet klimatike.
“Menaxhimi më i mirë i tokës mund të kontribuojë në trajtimin e ndryshimeve klimatike, por ajo nuk është zgjidhja e vetme. Reduktimi i emetimeve të gazrave serë nga të gjitha fushat është po ashtu thelbësore”, nënvizon raporti.
IPCC është themeluar nga Programi i OKB-së për Mjedisin dhe Organizata Botërore Meteorologjike (WMO) në vitin 1988 për t’u ofruar politikëbërësve vlerësime të rregullta shkencore në lidhje me ndryshimet klimatike./atsh
