Policia e Shtetit ka zhvilluar të mërkurën homazhe në përkujtim të 10 vjetorit të vrasjes së 4 efektivëve të policisë, nga Dritan Dajti.
Familjarë, miq, të afërm dhe personalitete të Policisë së Shtetit kanë zhvilluar këtë paradite homazhe tek Varrezat e Dëshmorëve, për 4 efektivët që ranë në krye të detyrës, teksa po kryenin një operacion policor për kapjen e të kërkuarit Dritan Dajti.
Zv/Ministrja Rovena Voda, e pranishme në aktivitet, në fjalën e saj theksoi se , “Fatos Xhani, Altin Dizdari, Kastriot Feskaj dhe Sajmir Duçkollari, u shtohen yjeve të përjetshëm të mbrojtësve me jetë – të jetëve njerëzore, duke shtuar lavdinë e tyre në altarin e nderit të punonjësve të Policisë që kryejnë sakrifica sublime në emër të detyrës, duke mëshiruar cilësitë e vyera të njerëzve të devotshëm për përmbushjen e misionit të Policisë së Shtetit dhe të betimit për kryerjen e detyrës me nder dhe integritet”.
“Nderimi i tyre me titullin e lartë “Dëshmorë të Atdheut”, është një tjetër yll lavdie që ndriçon në Flamurin e Policisë së Shtetit dhe shpreh qartësisht vlerësimin e qeverisë shqiptare për njerëzit e ligjit, por edhe vendosmërinë e saj për lartësimin e emrit të dëshmorëve të policisë si dhe ruajtjen e dinjitetit të organizatës, duke njohur sakrificat ekstreme të punonjësve të saj, siç është rasti i këtyre katër dëshmorëve”, theksoi Voda.
“Dhjetë vjet më parë dora makabre e krimit nuk kurseu plumbat ndaj ruajtësve të ligjit dhe u mori jetën para kohe katër punonjësve të Policisë së Shtetit, sot dëshmorë të atdheut. Vrasja në krye të detyrës e mbrojtësve të ligjit, Fatos Xhani, Altin Dizdari, Kastriot Feskaj dhe Sajmir Duçkollari, rënë në detyrë me 7 gusht 2009, shënoi një tronditje të thellë për familjarët, kolegët e tyre në radhët e Policisë dhe miqtë e tyre. Kjo ngjarje e tmerrshme tingëlloi fuqishëm si kambanë e fortë alarmi për reagim në bllok kundër dorës së krimit dhe nevojës për drejtësi”, shtoi Voda.
“Ne nderojmë sot me solemnitet këta dëshmorë, punonjës të përkushtuar ndaj detyrës, të cilët fatkeqësisht humbën jetën heroikisht në përballje me krimin për të garantuar sigurinë e cdo qytetari dhe mposhtur egërsinë e botës së krimit. Shokët dhe kolegët e tyre, ne të gjithë, përulemi para tyre në shenjë respekti dhe nderimi të merituar. Ata, vijoi Voda, e merituan uniformën e Policisë së Shtetit dhe ishin të denjë për profesionin që kishin zgjedhur, kishin cilësi dhe zemër polici trim, manifestuan guxim dhe zell punonjësi të përkushtuar”.
“Fatosi, Altini, Kastrioti dhe Sajmiri ishin të devotshëm, nuk kishin stepje apo ndalje në plotësimin e detyrave dhe zbatimin e urdhrave, nuk dallonin e kujt është përgjegjësia por vepronin në grup. Ata manifestuan cilësitë më të larta të një punonjësi Policie por edhe vlera njerëzore që i kishte bërë shumë të dashur me kolegët, shumë të vlerësuar nga eprorët dhe të respektuar nga qytetarët”, tha Voda.
“Ceremonia e sotme, këtu në Varrezat e Kombit, synon t’u bëjë nderimin e duhur dhe të merituar, duke i rreshtuar krah heronjve dhe dëshmorëve të kombit, për të mbetur të pavdekshëm në përjetësi dhe qirinj të pashuar në rrëfimin e rrugës së sakrificave të përgjakshme për rend e qetësi publike të efektivave të Policisë së Shtetit, në përballje dhemb për dhemb me kriminelët dhe njerëzit antishtet dhe triumfin e kauzës për zbatimin me vendosmëri të ligjit”, shtoi zv/Ministrja Voda.
Ajo bëri të ditur se aktualisht janë 224 punonjës të policisë, të rënë në detyrë. “Asnjë institucion tjetër ligjzbatues i Shtetit Shqiptar, nuk ka kaq shumë të rënë e dëshmorë sa Policia e Shtetit”, tha Voda.
“Ministri i Brendshëm, zoti Sandër Lleshaj, i vetëdijshëm për këtë fakt pikëllues, që në ditët e para kur mori detyrën, organizoi takime periodike me të gjithë familjarët e punonjësve të rënë në detyrë. Qëllimi ishte të njihej me problemet dhe shqetësimet e familjarëve të tyre, fëmijëve, bashkëshorteve, prindërve. Me qëllim lehtësimin sadopak të dhimbjes dhe përballimin e vështirësive të natyrshme të jetës së përditshme, Ministria e Brendshme ka përgatitur një paketë mbështetëse ndaj familjarëve të policëve të rënë në detyrë”, tha Voda.
“Familjarët e të rënëve të Policisë nuk kanë më prindërit, bashkëshortin, njeriun e tyre të dashur, por ne do të jemi familja e tyre e madhe. Një nga premtimet që kemi bërë është vendosja e të gjithë të rënëve të Policisë në varrezat e dëshmorëve. Por kjo nuk është e gjitha. Policia e Shtetit dhe gjithë agjencitë ligj zbatuese kanë detyrimin të prodhojnë sa më shumë rend e siguri. Akti i sotëm, në nderim të dëshmorëve, në këtë ceremoni postmortore përkujtimore, shpreh vlerësimin e qeverisë dhe të Ministrisë së Brendshme për të rënët në detyrë”, tha ajo.
“Ndaj ky është momenti për një apel të fortë për këdo, të rreshtohet në krah të Policisë së Shtetit, institucioni që sakrifikon më shumë e përditë, deri sakrifica sublime, por fatkeqësisht merr mbi supe jo rrallë here, baltën e akuzave të pamerituara. Policia është dhe mbetet vetëm e Shtetit, ndaj të duam policët dhe Policinë, të respektojmë ligjin”, përfundoi Voda.
Zv/drejtoresha e Përgjithshme të Policisë së Shtetit, Aida Hajnaj, në fjalën e mbajtur prej saj, duke vlerësuar katër të rënët në detyrë, theksoi se emri i secilit prej tyre, është gdhendur me gërma të arta në memorien e historisë, në pjesën më të lavdishme të saj.
“Sot është një ditë e veçantë, ditë dhimbjeje, krenarie dhe reflektimi, dhe ndjej se jo vetëm unë, por cilido prej jush sot, do ta kishte të vështirë për të radhitur fjalët në nderim të veprës dhe sakrificës më sublime të kolegëve Fatos Xhani, Kastriot Feskaj, Sajmir Duçkollari e Altin Dizdari”, tha Hajnaj
“Ata sot nuk janë fizikisht mes nesh, mes të dashurve të tyre, por emri i secilit prej tyre është gdhendur me gërma të arta në memorjen e historisë, në pjesën më të lavdishme të saj. Ata janë nderi dhe krenaria jonë, e familjarëve të tyre, ata sot e përjetë janë Nderi i Kombit”.
“Vepra sublime e katër kolegëve që ne përkujtojmë sot, si ajo e qindra dëshmorëve të tjerë të Policisë, është burim frymëzimi për gjithë brezat, shembull i sakrificës, dinjitetit dhe përkushtimit, duke mos kursyer as veten për të mbrojtur jetën”, tha Hajnaj.
Sipas saj, “Fatosi, Kastrioti, Altini dhe Sajmiri 10 vite më parë , në Durrës dhanë jetën gjatë një operacioni shumë të vështirë për kapjen e një personi shumë të kërkuar. Ata ishin oficerë të ndershëm, të përkushtuar, të përgjegjshëm për detyrën, ndaj ata sot nderohen me krenari nga të gjithë. Kolegët tanë që tashmë prehen në altarin e kombit, u ndanë prej nesh nga plumbat e krimit të organizuar, dhe ende sot shpirti i tyre nuk gjen paqe deri në dhënien e drejtësisë së merituar për dorën vrastare”, vijoi ajo.
“Ne humbëm katër kolegë, ndër më të mirët, familjarët humbën babin e devotshëm, bashkëshortin e virtytshëm, vëllain shembullor. Qytetarët humbën shëmbëlltyrat e qytetarisë së këtij vendi”, shtoi Hajnaj.
“Të nderuar familjarë të dëshmorëve të Atdheut! Ju nuk jeni vetëm tani e asnjëherë. Ju jeni pjesë e jona dhe dera e familjes sonë të madhe, Policisë së Shtetit, nuk do te jetë kurrë e mbyllur. Vëmendja e shtuar për ju nga Qeveria dhe Ministri i Brendshëm, janë ngushëllim dhe lehtësim i dhimbjes që kolegët tanë lanë pas. Shumë fëmijë të Dëshmorëve të Policisë, po vijojnë rrugën e baballarëve të tyre dhe ky është një tjetër motivim për organizatën tone, në luftën ndaj krimit”, theksoi zv/Drejtoresha e Policisë së Shtetit.
“Dëshmorët e Policisë, janë heronjtë e vërtetë të realitetit të sotëm, pasi duke sakrifikuar gjënë më të shtrenjtë, jetën e tyre, e bëjnë këtë vend më të sigurt për të jetuar dhe punuar. Ata janë shembuj frymëzimi dhe motivimi për të gjithë ne. I përjetshëm kujtimi i tyre”, përfundoj Hajnaj.
Fatos Xhani, Altin Dizdari, Kastriot Feskaj, dhe Sajmir Duçkollari, u qëlluan për vdekje nga Dritan Dajti gjatë një aksioni për arrestimin e këtij të fundit në zonën e plazhit në Durrës 10 vite më parë.
Ndaj Dajtit u zhvillua një seancë gjyqësore e tej zgjatur, teksa muajin shkurt te këtij viti Gjykata e Apelit të Krimeve të Rënda rrëzoi vendimin për dënimin me burgim të përjetshëm ndaj Dritan Dajtit. Ky vendim i cili uli atij 1/3 e dënimit u shoqërua me reagime të shumta, ku mazhornca ri-theksoi rëndësinë çuarjes përpara të Reformës në Drejtësi dhe realizimit të sa më shpejtë të vettingut të gjyqtarëve./atsh
