“Është koha që secili të bëjë kilometrat e vet, dhe dua ta them që sot nuk mund të ketë më deputetë që marrin malet për të takuar njerëz, deputetë që marrin njerëzit në krahë për t’iu zgjidhur një hall, deputetë që rrinë në kontakt të madh me njerëz dhe deputetë nga ana tjetër që edhe në fushatën e 30 qershorit, kanë shkuar tek njerëzit vetëm javën e fundit”, – theksoi Kryeministri Edi Rama në fjalën e mbajtur në Asamblenë Kombëtare e Partisë Socialiste.
“Nuk mund të ketë anëtarë të Asamblesë Kombëtare të PS që kujtohen për PS vetëm nga ftesa për mbledhjen e asamblesë dhe pavarësisht se mund të jenë të rregullt nëpër mbledhje, nuk shfaqen tek njerëzit. Kush nuk do i përgjigjet ritmit që kërkon 30 qershori, nuk do jetë më në projektin tonë politik të vitit 2021. Kush nuk do i bëjë kilometrat e veta që imponon 30 qershori do dalë nga projekti ynë politik i vitit 2021”, – theksoi Rama.
“Është gjëja e fundit që dëshiroj, por do dalë jashtë nga kjo familje e madhe politike edhe çdo kryebashkiak që do bëjë gabimin të mendojë që tani që ka marrë mandatin mund të bëjë pa njerëzit dhe mund të bëjë pa ne”, – tha Rama. /atsh
