Kryetari i bashkisë së Durrësit, Vangjush Dako i cilësoi mbrëmjen e sotme përgjimet e publikuara së fundmi si manipuluese dhe që nuk ka asgjë të vërtetë.
Në emisionin “Opinion”, Dako deklaroi se gazetari i cili ka publikuar përgjimet në “Bild”, ka manipuluar lidhur me audiopërgjimin, duke pohuar se nuk ka qenë në komunikim me asnjë prej të dyshuarve, persona për të cilët thuhet se janë kapur në përgjime për shitblerje votash.
Dako tha se “një mendje e hollë e ka manipuluar për të krijuar një lidhje me 5 telefonatat e tjera”.
Gjithashtu, Dako tha se gjatë qëndrimit 5-orësh në prokurori nuk është pyetur nga këta të fundit për audiopërgjimin e publikuar nga “Bild”.
“Në prokurori kam dhënë shpjegimet e mia për 5 orë dhe nuk më kanë pyetur për këtë telefonatë, – deklaroi ai, duke shtuar se, – nuk janë marrë me detaje, kanë ushtruar kontroll, kanë sekuestruar materialet e bashkisë”./atsh
