Data 7 qershor është afati i dorëzimit të dokumenteve për 7700 fermerët që kanë kaluar fazën e parë të aplikimit në Skemat Kombëtare 2019.
Agjencia e Zhvillimit Bujqësor dhe Rural, i rikujton të gjithë aplikantëve që deri në datën 7 Qershor 2019, është afati i dorëzimit të dokumentacionit shtesë nga ana e fermerëve. Plotësimi i dosjes përtej këtij afati, do të rezultojë në skualifikim të aplikimit. Fondet që do të lirohen nga aplikimet e skualifikuara do të rialokohen dhe do të përdoren vetëm për ata që plotësojnë dokumentet deri më 7 qershor, njofton AZHBR.
Sipas AZHBR-së, 7700 fermerë kanë kaluar fazën e parë, për tu bërë përfitues të fondit prej 5 milionë euro të vënë në dispozicion nga Ministria e Bujqësisë në projektin e Skemave Kombëtare 2019. Agjencia e Zhvillimit Bujqësor dhe Rural ka publikuar të dhënat, ku pjesa më e madhe e aplikimeve kanë qenë për dorëzimin e qumështit lëndë e parë në pikat e grumbullimit për ferma me lopë dhe të imta ku dhe merret mbështetje direkte.
Nga 7 masa në total, për këtë masë janë regjistruar 3223 aplikime, të ndjekura nga aplikimet për tufën bazë më të imta me 2298, 962 aplikime për bletarinë, 691 aplikime për mbjellje ullinjsh, 499 aplikime për ujitje me pika, 23 aplikime për përmirësim ullishtesh të degraduara dhe në fund listohen 4 aplikime për dorëzim prodhimi për anije peshkimi.
Tashmë AZHBR ka hyrë në fazën e përzgjedhjes, ku aplikantët duhet të dorëzojnë dokumentacion shtesë, si vërtetim për pagesën e sigurimeve shoqërore koherente, vërtetim për shlyerjen e detyrimeve tatimore ose ndaj AZHBR-së nëse kanë rezultuar debitorë, ndërsa sipas masës kërkohen dhe dokumente specifike, si dokumentacion të plotë të pronësisë mbi tokën, apo të marrjes me qira, etj.
Aplikimet e kualifikuara sipas masave: 3223 aplikime – për dorëzimin e qumështit, 2298 aplikime – për tufën bazë dhe të imta, 962 aplikime – bletari, 691 aplikime – mbjellje e ullinjve, 499 aplikime – ujitje me pika, 23 aplikime – përmirësim ullishtesh të degraduara, 4 aplikime – dorëzim prodhimi për anije peshkimi. /atsh
