Zëdhënësja e qeverisë, ministre e Shtetit për Marrëdhëniet me Parlamentin, Elisa Spiropali e cilësoi deklaratën e Partisë Demokratike lidhur me rastin e të miturës në Kavajë si një dëshmi të qartë të dëshpërimit opozitar, që nuk nguron të përdorë edhe raste të tilla për ushqimin politik të ditës.
Në konferencën javore për shtyp, Spiropali tha se “është një rast tmerrësisht i rëndë që ka nevojë për të gjithë vëmendjen e Prokurorisë për t’u hetuar deri në fund, të gjitha instancat dhe fajtorët për t’u vënë para ligjit”.
“Personat e përfshirë janë tashmë duke u hetuar nga Prokuroria dhe jemi të sigurt që do të bëjë punën e saj, ashtu sikundër Agjencia për Mbrojtjen e Fëmijëve e ka marrë vajzën në kujdes psikosocial dhe psikoshoqëror”, u shpreh Spiropali duke shtuar se autoritetet po bëjnë punën e tyre.
Spiropali tha se “raste të tilla fatkeqësisht ndodhin dhe në vende të zhvilluara, Amerikë, Suedi, Finlandë, etj bëhen edhe filma për raste të tilla të tmerrshëm që kanë ndjeshmëri të lartë sociale. Por, ama kurrë asnjë parti politike nuk del për ta përdorur rastin për politikë dhe të gjejë shkakun dhe pasojat tek qeveria e një vendi”./atsh
