Banorët e Unazës së Madhe protestuan sot përpara godinës së Kuvendit, ndërsa brenda zhvillohej seanca parlamentare për projektbuxhetin e 2019-ës.
Protesta përshkallëzoi në dhunë fizike ndërmjet protestuesve dhe efektivëve të policisë.
Gjatë protestës u përdorën shashka dhe mjete të ndryshme piroteknike.
Për pasojë kanë mbetur të plagosur 12 efektivë, ku njëra prej tyre ka humbur katër gishta të dorës si pasojë e një kapsolle.
Bëhet fjale për efektiven Ina Muka, 24 vjeçe.
Dy kolegë të saj janë afruar për ta ndihmuar ndërsa në sfond dëgjohen ulërimat e 24-vjeçares.
Ndërkohë një tjetër polic, si pasojë e shashkave ka dëmtuar daullen e veshit dhe ka humbur dëgjimin.
Mësohet gjithashtu se një efektive ka pësuar dëmtime të rënda në krah.
Efektivët e plagosur aktualisht po marrin ndihmën mjekësore në spital, ku dy prej tyre ndodhen në gjendje të rëndë.
Pamjet nga skena e rëndë kanë qarkulluar në rrjet, teksa nuk mund të lihen pa u komentuar as skenat e dhimbshme të dhunës së një 17-vjeçari dhe një 65-vjeçareje nga efektivët e policisë, duke mos lënë pa përmendur edhe një protestues që e ndoqën deri në spital për ta marrë me dhunë.
