Ura e Golikut është një monument kulture i shkallës së parë. Për rikonstruksionin e kësaj ure është folur për rreth 5 vite. Emergjenca për të mbajtur në këmbë këtë monument kulture që është ndërtuar në shek. XVII-të dhe është artikuluar nga shumë ekspertë të cilët pohojnë se bimësia e dendur shoqëruar me faktorin kohë dhe rrëshqitjet e dherave kanë gërryer bazamentin e urës.
Pa lënë mënjanë edhe gërmimet që ka bërë dora e njeriut në këto anë ku legjendat për thesare nuk kanë të sosur.
Megjithatë duket se pritjes së gjatë tashmë i erdhi fundi. Instituti i Monumenteve të Kulturës do të jetë përgjegjës për zbatimin e projektit të hartuar nga Drejtoria Rajonale e Kulturës Kombëtare Korçë e cila parashikon ndërhyrje për restaurimin e këtij objekti muzeal.
Në të gjithë vendin aktualisht janë plot 33 kantiere restaurimi të Ministrisë së Kulturës, ku po punohet në monumente të ndryshme. Mes tyre është edhe Ura e Golikut në Pogradec. Për të parë nga afër punimet e fazës së parë në këtë kantier ishte edhe ministrja e Kulturës, Mirela Kumbaro.
“Ura e Golikut është një monument kulture i kategorisë së parë. Është një urë e shekullit të 18-të, e cila nuk ka njohur asnjëherë më parë restaurime. Ky konsolidim i parë që ne po bëjmë na jep garanci se ura do t’i rezistojë reshjeve dhe prurjeve të lumit. Restaurimi kryhet edhe me kontributin e sponsorave privatë”, u shpreh ministrja Kumbaro.
Punimet përfshijnë përforcimin e këmbëve të dëmtuara, devijimin e pjesshëm të rrjedhës së lumit për të larguar rrezikun, si dhe heqjen e bimësisë në pjesën e harkut. Ndërkohë gjatë fazës së dytë do të vijohet me rindërtimin e parapetit të urës dhe restaurimin e kalldrëmit të saj.
Ura e Golikut mbi lumin Shkumbin, ndodhet 40 km larg qytetit të Pogradecit dhe është pozicionuar në zonën e Mokrës, në Selcën e Poshtme. Me një gjatësi prej 17 metrash, kjo urë ka qenë pjesë e rrugës Egnantia dhe e banuar në këtë zonë nga fiset Ilire mbi 2000 vjet p.e.s.
Përveç vlerave monumentale, ajo ka edhe funksion praktik pasi është e vetmja nyje lidhëse e 4 fshatrave të zonës së Mokrës.
