Anëtarët e “Akademisë 100 fshatrat” u ndalën në Ardenicë dhe Krutje, dy fshatrat e zgjedhura në Bashkinë e Lushnjes në kuadër të programit “100 fshatrat”.
Evidentimi i potencialeve që ofrojnë këto fshatra dhe hartimi i projekteve konkrete zhvillimore për nxitjen e këtyre potencialeve ishte në fokus të vëmendjen se anëtarëve të Akademisë “100 fshatrat”.
Ata zhvilluan një takim me Kryetarin e Bashkisë Lushnje, Fatos Tushe, i cili nënvizoi rëndësinë e hartimit të projekteve për dy fshatrat e përzgjedhur në Lushnje.
Gjatë takimit u koordinuan punët për realizimin e këtij plani ambicioz në përputhje me standardet e kohës, duke promovuar vizionin e ri për fshatin që duam.
Qeveria shqiptare ka shpallur nismën e saj “Programi i Integruar për Zhvillimin Rural-Programi i 100 fshatrave”, i cili do të jetësohet në periudhën 2018-2020.
Ky program synon të kordinojë ndërhyrjet në hapësirën rurale me një qasje ndërsektoriale, duke alternuar investimet publike me donatorët dhe investimet private.
Në Bashkinë Lushnje, investimet dhe mbështetja e programit 4-vjeçar do të shtrihet në fshatrat Ardenicë dhe Krutje.
Ardenica
Fshati Ardenicë shtrihet në brezin kodrinor me të njëjtin emër dhe ka potencial për të qenë zona agro-turistike më e rëndësishme e Bashkisë Lushnje, ku krahas panoramës shlodhëse, i shtohen dhe elemente të trashëgimisë kulturore si “Manastiri i SHën Mërisë” Ardenicë, monumenti i natyrës “Dushkaja e Ardenicës” dhe “Selvitë e Manastirit të Ardenicës”.
Zona është e njohur për vreshtat dhe traditën e kulinarisë, ndërsa ekzistenca e ndërtesave shtetërore mund të shërbejë për qendra komunitare, shërbime hotelerie apo prodhimin e produkteve artistike.
Krutje
Njësia administrative Krutje shtrihet në një reliev fushor dhe ka një popullsi prej 10333 banorë.
Ka dalje në dy arterie kryesore në autostradën Lushnje-Fier dhe Lushnje-Berat. Zona është e njohur për prodhimin e perimeve të fushës dhe serrave, vreshtarinë, agrumet etj.
Në fshatin Krutje e Sipërme ngrihet “Kisha e Shën Kollit”, njohur si monument kulture i kategorisë së I. Kjo zonë njihet dhe për traditën sportive në sportin e volejbollit për femra, trashëguar ndër vite./atsh
