Politika në përgjithësi tjetër gjë mendon, tjetër gjë thotë dhe tjetër gjë bën, dhe ky është një sindrom i saj në të gjitha vendet. Diferencën e bën fakti se sa i thellë është hendeku mes asaj që mendohet, asaj që thuhet dhe asaj që bëhet.
Nëse në vendet e zhvilluara e demokratike, qoftë dhe në vendet e rajonit tonë, ky hendek është shumë i vogël, sa herë-herë mezi dallohet madje, në Shqipëri hendeku ka trajtat e një humnere, aq i thellë është.
Nëse do të bësh një “inventar” të artikulimit politik për një vit sëpaku të të gjithë liderëve në Shqipëri, sheh me sy të lirë se kupola politike në vend nuk ka asnjë lidhje me realitetin.
Madje flet sikur kanë zbritur në këto momente nga kozmosi, nuk kanë qeverisur kurrë këtë vend. Për më tepër që tashmë këtij kontigjenti të “kristaltë” i është shtuar dhe qeveria aktuale, e cila i ka dhënë vetes luksin që të kritikojë dhe të sillet sikur të ishte në opozitë dhe jo se është votuar për të qeverisur vendin dhe që ka në dorë mirëqenien e qytetarëve në Shqipëri.
Dhe në thelb si mazhoranca ashtu dhe opozita, mendojnë, flasim dhe bëjnë gjithçka në mënyrë të njëjtë, të ngjashme dhe në sinkron të plotë me njëri tjetrin.
Mjafton të krahasosh deklaratat e fundit të Lulzim Bashës kreut të opozitës dhe të kryeministrit Edi Rama, njëherësh dhe kryetar i mazhorancës për Vettingun e politikanëve dhe arrin direkt në konkluzionin se kupola politike shqiptare vepron në sinkron.
Flet Basha, miraton Rama, dhe kryeministri madje thotë si të vetat dhe ato që dëshiron Basha e mbështetësit e tij. Fjala është për përjashtimin nga Vettngu i pasurisë së politikanëve dhe verifikimi i lidhjeve të tyre me krimin.
Dhe kur Basha fillon dhe flet me fjalë të mëdha, duke përmendur madje dhe ish prokurorin e ndjerë të antimafias italiane Paulo Borselino, i cili u ekzekutua nga një bashkëpunim i mafias italiane me segmente të caktuara të politikës dy muaj pas ekzekutimit të të famshmit gjykatës italian Xhovali Falkone në vitin 1992, duket sikur kreu i PD ka në mendje Adriatik Llallën.
Basha e ka mbrojtur publikisht ish kryeprokurorin Adriatik Llalla dhe këtë gjë e bëri dhe Edi Rama, i cili po të mos kishin ndërhyrë shpejt partnerët tanë ndërkombëtarë, sidomos SHBA dhe ambasadori Donald Lu që sollën të kopsitur dosjen e ish kreut të akuzës, do ta kishte emëruar Llallën ambasador të Shqipërisë në ndonjë vend të rëndësishëm të BE.
Pavarësisht se ishte akuzuar nga DASH se ka korrupsion të cilësuar, ka shpëtuar politikanët e lidhur me krimin dhe ka dokumente e prova për pastrim parash dhe vepra të tjera penale.
Pra, kur flet Basha për Borsellinon, bashkë me Ramën kanë në mendje Tik Llallën.
Kështu ka vepruar kreu i PD, ku me anë të një postimi në rrjetet sociale ka vijuar edhe sot shpjegimin pse duhet vetting në politikë. Me një citim nga Prokurori italian Paulo Borselino, Basha tregon se pse duhen larguar politikanët e lidhur me krimin.
“Pse është detyra jonë të largojmë politikanët e lidhur me krimin?”, shkruan Basha në FB, dhe përgjigjen e jep me një foto ku është shkruar citimi i Borselinos.
“Ekziston një keqkuptim bazë sipas të cilit politikani që shoqërohet me mafiozë, nëse nuk dënohet nga gjykata, është i ndershëm! JO!
Gjykata mund të bëjë vetëm vlerësime të natyrës gjyqësore. Është detyrë e institucioneve që TË FLAKIN politikanët e afërt me Mafian, për të qenë të ndershme dhe për t’u shfaqur si të tilla”, janë këto fjalët e Paolo Borselinos të cituara nga Basha.
Dhe në të vërtetë shqiptarët janë dakord me këtë pasazhin e fundit: Duan që të flakën nga politika duke filluar nga Sali Berisha, Ilir Meta, Lulzim Basha, Monika Kryemadhi, Edi Rama dhe deri tek politikani më i vogël që ia kanë nxirë jetën këtij vendi për 28 vite me radhë./Pamfleti
