Dyshja e njohur Olio dhe Stelio rikthehen në ekranin e madh. Aktorët ikonë të filmave komikë, Stan Laurel dhe Oliver Hardy do të vijnë në një format kinematografik të prodhuar nga BBC Films.
Mësohet se filmi biografik kushtuar legjendarëve të komedisë së viteve 1930 – 1950, do të intepretohet nga dyshja Steve Coogan dhe John Reilly. Aktorët e rinj kanë një ngjashmëri të pabesueshme me personazhet.
Tregimi biografik risjell historinë e një miqësie të jashtëzakonshme, atë të çiftit britaniko-amerikan, gjatë turneut të fundit të tyre në Britaninë e Madhe, në vitin 1953. Një vëmendje e veçantë në film mësohet se do t’u jepet edhe dy bashkëshorteve të aktorëve, duke i dhënë një tjetër dritë, pak të njohur deri më sot, dyshes së paharrueshme të komedisë botërore./korrieri
