Presidenti Ilir Meta ka reaguar dy herë brenda një ore, lidhur me pandeminë.
Kreu i shtetit pas pretendimeve të fundit të kryeministrit Rama, tha se “qytetarët e infektuar po shtohen çdo ditë!”, duke i parashtruar edhe disa kërkesa konkrete qeverisë.
“Jetët e humbura po shtohen çdo ditë!”
“Shto testimet!”
“Rimburso pacientët të cilët mjekohen në shtëpi, familjet në nevojë dhe pensionistët e infektuar me COVID-19!”
“Rrit buxhetin për sistemin shëndetësor! Shto spitalet COVID!”
“A e di ti sa paguan sot çdo shqiptar për mjekim dhe ilaçe për t’i shpëtuar COVID-19?”
“A nuk ishe ti që ju premtove shëndetësinë falas?”
“Mjaft me koncensione dhe PPP korruptive! Mjaft me tendera sekrete për oligarkët!”, – kanë qenë disa nga pyetjet publike, të cilat i janë drejtuar kryeministrit Rama, nga kreu i shtetit.
Rama më herët fajësoi opozitën që po politizon pandeminë.
Në reagimin e një ore më parë, Presidenti Ilir Meta bëri me përgjegjësi sërish qeverinë për gjendjen aktuale, e cila sipas kreu të shtetit, nuk ka asnjë edhe një plan për daljen nga situata.
“Në mungesë të një plani dhe strategjie konkrete për të përballuar përhapjen masive të pandemisë COVID-19, të reflektuar me shtim çdo ditë të numrit të qytetarëve të infektuar, fatkeqësisht edhe të humbjeve në jetë, sistemi shëndetësor rrezikon të zhytet në kolaps të thellë, me pasoja tepër të rënda për shëndetin e qytetarëve”.
“Në këto kushte, është tepër e domosdoshme të shtohet masivisht numri i testimeve, si një mjet efikas për gjurmimin dhe trajtimin në kohë të qytetarëve të prekur nga COVID-19”.
“Për këtë qëllim të miratohet pa vonesë edhe një plan koordinimi i qartë dhe transparent me sistemin privat, për të bashkuar të gjitha energjitë dhe kapacitetet e duhura”.
“Thelbësore gjithashtu është vënia në efiçencë të plotë të mjekut të familjes, shtimi i stafit mjekësor dhe atij mbështetës, si dhe planifikimi i buxhetit të duhur në ndihmë të tyre”.
“I bëj thirrje Qeverisë të bëjë çdo përpjekje për rimbursimin e plotë të shpenzimeve, veçanërisht të pacientëve që mjekohen në banesë, të familjeve me ndihmë ekonomike dhe të pensionistëve”, ishte reagimi i parë nga Presidenti Meta.
