Koha nuk pret. Njerëzit sot kanë nevojë për mbështetje. Plani ynë ndihmon çdo shqiptar në vështirësi.
Kështu u shpreh kryetari i Partisë Demokratike, Lulzim Basha, pas takimeve që pati sot me disa pronarëve të biznesit të vogël.
Në një video, që bëri publik pas takimit me ta, Basha publikoi historinë e një pronareje të biznesit të vogël, që thotë se kategori biznesesh si ajo, janë duke falimentuar.
“Do t’i vendos kyçin dhe nuk e di se ku do të shkoj”.
Kjo është historia e një biznesi të vogël që kriza ekonomike dhe taksat që rriten përditë po e çojnë drejt falimentimit.
Rabjana Shima: Prej vitit 2013-të, taksat janë rritur shumë sa janë bërë të papërballueshme. Jemi drejt falimentimit
Rabjana Shima është një prej shumë bizneseve të vogla në Tiranë. Që prej vitit 2007 kur ka hapur minimarketin në një lagje të Tiranës, ajo mban familjen me këtë biznes. Por me rritjen e taksave që prej vitit 2013-të ajo thotë se tashmë rrezikon falimentimin.
Në një kohë që kriza ekonomike sa vjen e thellohet, fitimet ulen. Kjo sjell pamundësinë e saj për të paguar taksat e rritura, përfshirë këtu edhe taksat vendore që janë shtuar. “Nëse vazhdon kështu, për pak unë do t’i vendos kyçin dhe nuk e di se ku do të shkoj”, – thotë ajo e dorëzuar përballë vështirësive që ka sjellë politika fiskale e qeverisë këto 7 vitet e fundit.
Rabjana Shima:
“Jam Rabjana Shima. Unë biznesin tim e kam hapur në vitin 2007. Në 2013-ën, filluan taksat të ndryshojnë. Taksat u rritën jashtë mase shumë saqë po bëhet e papërballueshme. Taksat lokale, taksë pastrimi unë paguaj 690 mijë në vit. Taksë arsimi paguaj 170 mijë në vit, dhe taksë e hapësirës publike 100 mijë lekë në vit. Kam kaluar, kam 4 vite që jam biznes i madh me TVSH”.
“Me këtë dyqan të vogël që është 25 metra katror, më kanë kaluar me xhiro mbi 95 milion në vit dhe kam paguar mbi 10 muaj tatim fitimin 170 mijë lekë në muaj. Puna është duke rënë dita-ditës. Unë punoj burrë e grua nga mëngjesi deri në darkë. 30 ditë në muaj në jemi në punë, nuk kemi ditë pushimi, nuk kemi ditë feste. Nuk kam ditë kur unë sëmurem të rri në shtrat, nuk më paguan njeri. Ne jemi drejt falimentimit. Për pak unë do t’i vendos kyçin dhe nuk e di së ku do të shkoj”, thotë ai në videon e postuar nga kryetari i PD-së, Lulzim Basha.
