Pas ngritjes së akuzave nga Zyra e Prokurorit të Specializuar (ZPS) në Hagë ndaj Presidentit Hashim Thaçi dhe Kryetarit të Partisë Demokratike të Kosovës, Kadri Veseli, Kryeministri i Kosovës Avdullah Hoti deklaron se nuk do të marrë pjesë në takimin e datës 27 qershor në Shtëpinë e Bardhë, ku do të takohej me Presidentin e Serbisë, Aleksandar Vuçiç.
Hoti thekson se lidhur me këtë vendim, ka njoftuar edhe Ambasadorin Grenell.
“Për shkak të zhvillimeve të reja në Prishtinë si rezultat i akuzave të dorëzuara nga Zyra e Prokurorit të Specializuar, më duhet të kthehem në Prishtinë për t’u marrë me situatën. E kam njoftuar Ambasadorin Grenell se nuk mund të marrë pjesë në takimin e datës 27 qershor në Shtëpinë e Bardhë”, deklaron Hoti./atsh
