Ministria e Shëndetësisë dhe Mbrojtjes Sociale ka informuar se në 24 orët e fundit janë identifikuar pozitivë me COVID-19 vetëm 4 persona.
Dr Flutura Beqo, pranë Ministrisë së Shëndetësisë bëri të ditur se “situata epidemiologjike në vend paraqitet e qëndrueshme mbështetur në identifikimin e rasteve të deritanishme dhe gjurmimin aktiviologjik në mënyrë aktive.
Në 24 orët të fundit janë testuar 246 qytetarë të dyshuar si të prekur me COVID-19.
“Në 24 orët e fundit kanë rezultuar pozitive 4 qytetarë, përkatësisht 2 qytetarë në Tiranë dhe 2 në Berat, mes të cilëve një grua shtatazënë ”, u shpreh Beqo.
Deri më sot janë konfirmuar pozitive me COVID-19 në të gjithë vendin 880 persona, 78% të të cilëve janë të shëruar.
Pavarësisht situatës së përmirësuar, Ministria e Shëndetësisë dhe Mbrojtjes Sociale thekson se është shumë e rëndësishme që qytetarët të ruajnë distancimin fizik dhe higjienën personale; bizneset të zbatojnë protokollet e sigurisë për të ruajtur shëndetin e qytetarëve.
Qytetarët duhet të jenë të kujdesshëm të mos neglizhojnë shenjat e sëmundjes COVID-19, ndaj ju lutemi telefoni në numrin unik të Urgjencës Kombëtare, 127./atsh
