Një aksident është raportuar pranë fshatit Shen Vasil, në Himarë. Bëhet me dije se fuoristrada e një agjencie turistike ka dalë nga rruga duke rënë 20 metra poshtë rrugës.
Shoferi i automjetit ka humbur jetën, ndërsa kanë mbetur të plagosur 2 pasagjerë. Viktimë ka mbetur 40-vjeçari Renato Bushi, banues në Sarandë.
BalkanWeb mëson se personat në automjet ishin anglezi 31-vjeçar Eduard Holand, 26-vjeçari Kevin Rama dhe bashkëshortja e shqiptarit Marika Zagori.
Sakaq 31-vjeçari, Holand do të niset drejt Tiranës për mjekim pas plagëve të marra, ndërsa Marika Zagori gjithashtu ka pësuar dëmtime nga aksidenti.
Himarë/Informacion paraprak
Në fshatin “Shën Vasil” , Himarë, ka dalë nga rruga një automjet që drejtohej nga shtetasi R.B, 40 vjeç, banues në Sarandë.
Si pasojë e daljes së automjetit nga rruga ka humbur jetën drejtuesi i automjetit, shtetasi R.B. Si dhe janë dëmtuar dhe transportuar në spital për ndihmë mjekësore dy shtetas që ishin pasagjerë në këtë automjet. Grupi hetimor po punon për zbardhjen e plotë te rrethanave të ngjarjes.
