Një grua e cila ka nënën e saj të shtruar në spitalin infektiv, duke u trajtuar me Covid-19, thotë se e ëma e saj është e intubuar.
Por gjatë kontaktit që ka pasur më parë me të ajo shprehet se nëna i ka thënë që “nuk na i japin as ujë”.
Ajo u shpreh gjithashtu se është bërë pishman që e ka sjellë nënën e saj në spital, ndërsa deklaron se i ka kërkuar mjekëve që ta marrë nënën në shtëpi.
“Nëna më tha nuk më japin ujë dhe nuk më ndërrojnë. Edhe koordinatorët nuk dinë të sillen. Shumë keq situata. Vijnë shumë dhe vdesin shumë. Nuk janë ato shifrat që publikojnë. Ndërkohë që nuk kemi asnjë lloj informacioni”, u shpreh gruaja për News 24.
Ajo shtoi se, “i thashë doktoreshës që ta marr nënën në shtëpi dhe të japë frymën e fundit”.
Ministria e Shëndetësisë bëri të ditur dje se në 24 orët e fundit 4 qytetarë kanë humbur betejën me COVID. /NOA.al
