Ish-kryetarja e Kuvendit në qeverisjen e Partisë Demokratike, Jozefina Topalli, e cilësoi sot kryetarin e PD-së, Lulzim Basha, një dështak, manipulator si Enver Hoxha, ndërsa theksoi se Bashës pas një apo dy vitesh i ndërronin ministritë se ishte si minë me sahat prej skandaleve që krijonte.
Në një reagim, pas publikimit të një videoje nga ish-deputeti demokrat Endri Hasa, Topalli tha se “kështu manipulonte Enver Hoxha historinë, për të manipuluar mendjet e njerëzve. Fshinte dhe censuronte çdo fytyrë dhe emër personaliteti nga fotoja dhe historia, për të thënë se historia jam Unë. (Fotot më poshtë janë në ballkonin e bashkisë Shkodër. E. Hoxha heq pjesëmarrësit, duke filluar nga Gjergj Fishta). Në 2020, me video në facebook kunati në emër të Partisë që rrëzoi Partinë e Enver Hoxhës bën të njëjtën gjë”.
“Ky paska bërë NATO-n, liberalizimin e vizave, ky paska sjell Bushin në Shqipëri… Ky ka bërë TAP-in; Ky Marrëveshjen e Stabilizim Asociimit, ky do ketë themelu edhe Partinë Demokratike; edhe në ’97 ky do e ketë ringritur nga hiri… Kryeministri i kohës paska qenë në gjumë gjithë kohën, kurse të tjerët paskemi qenë në planet tjetër… Ky i ka bërë të gjitha, siç bëri dhe tramin. Në fakt, me sa më kujtohet, pas një apo dy vitesh këtij i ndërronin ministritë se ishte si minë me sahat prej skandaleve që krijonte”, shprehet Topalli. /atsh
