Ish-deputetja e PD-së, Jorida Tabaku deklaron se “ligji për amnistinë fiskale është ideuar jo për t’i shërbyen shqiptarëve që kanë emigruar dhe u duhet të deklarojnë pasurinë”.
Në një deklaratë për mediet, Tabaku tha se “synimi parësor i ligjit është që të ndihmojë të inkriminuarit dhe organizatat kriminale që të pastrojnë pasuritë dhe paratë e tyre në mënyrë të paligjshme”.
“Këmbëngulja e qeverisë për amnistinë fiskale, tregon se prioriteti i Ramës nuk është shërbimi për qytetarët, por pasurimi i oligarkëve pastrimi i parave siç ka bërë gjithmonë në këto 7 vjet”, tha ajo.
Gjithashtu, Tabaku tha se “në nenin 5 pika 1 ligji evidenton se përfitues të këtij ligji janë edhe individë “rezidentë tatimorë në Republikën e Shqipërisë, pavarësisht shtetësisë së tyre”.
“Pra, me pak fjalë, nëse në Shqipëri është rezident një individ, i cili nuk deklaron pasurinë e tij në një shtet të BE-së apo SHBA-së, ky qytetar përfiton nga kjo amnisti dhe, gjithashtu, mund t’i shpëtojë hetimit të kësaj pasurie nga qeveria shqiptare. Kjo në fakt është një tentativë e radhës e qeverisë Rama e cila disa muaj më parë iu drejtua Londrës në një konferencë për të shitur pasaportën shqiptare tek kushdo i ashtuquajtur “investitor” i huaj”, tha Tabaku.
Sipas saj, draftligji parashikon jo vetëm ruajtjen e konfidencialitetit, por edhe mos hetim për ata individë të huaj apo vendas që do të përfitojë nga amnistia. “Ky ligj është i dëmshëm për ekonominë, është nxitës për paranë e krimit dhe të korrupsionit”, tha Tabaku./atsh
