Më e keqja nuk do të vijë vetëm nëse secili prej nesh tregon kujdes në përditshmëri.
Ministrja e Shëndetësisë dhe Mbrojtjes Sociale kërkoi vëmendjen e qytetarëve shqiptarë, të cilët janë duke nënvlerësuar masat mbrojtëse për parandalimin e përhapjes së COVID-19 e për rrjedhojë numrat e të infektuarve janë në rritje, pasi edhe sot u regjistruan 71 raste të reja.
Ministrja Manastirliu kujton rëndësinë e zbatimin të këtyre masave, si dhe nënvizon se vetëm kështu nuk do të vijë më e keqja.
Nga COVID-19 në vendin tonë kanë humbur jetën 44 persona, raportoi sot Ministria e Shëndetësisë.
“Më e keqja nuk do të vijë vetëm nëse secili prej nesh tregon kujdes në përditshmëri! Respektoni Rregullat. Ruani distancën 1.5 metër. Mbani maskë/barriera mbrojtëse kur nuk është e mundur të ruhet distanca. Lani shpesh duart. Dezinfektoni ambientet. Mbroni veten dhe të afërmit tuaj! Vetëm duke treguar kujdes, mundemi ta mposhtim COVID-19!”,- theksoi Ministria e Shëndetësisë. /atsh
