Një sërë monumente kulture në vendin tonë janë inspektuan ditët e fundit nga një grup specialistësh italianë dhe të Institutit Kombëtar të Trashëgimisë Kulturore dhe Drejtorive Rajonale të Trashëgimisë Kulturore, Tiranë dhe Shkodër.
Ministria e Kulturës pas ngjarjeve sizmike të ndodhura në 26 nëntor ka kërkuar pjesëmarrjen e ekspertëve të huaj për të ndihmuar autoritetet shqiptare në administrimin e urgjencës për mbrojtjen e trashëgimisë kulturore.
Ambasada Italiane iu përgjigj thirrjes dhe mbështeti me misionin “Task Force Italiana U4H”. Ky mision i parë konsiston në njohjen dhe vlerësimin e nevojave aktuale nëpërmjet studimeve në terren.
Në vijim të punës, grupi i specialistëve italianë dhe specialistëve të Institutit Kombëtar të Trashëgimisë Kulturore e DRTK Tiranë inspektuan ndërtesën e Bibliotekës Kombëtare, Tiranë, “Banesën Shtetërore (ish Esat Mlika – Muzeu Etnografik dhe i Tërmetit)”, Lezhë, kalanë e Lezhës si dhe kalanë e Prezës./atsh
