Në këto ditë festash, kur të gjithë gjenden pranë familjeve duke festuar, disa prej banorëve të prekur nga tërmeti i 26 nëntorit janë duke i kaluar këto festa në ambientet e hoteleve ku janë akomoduar prej 1 muaji deri në ndërtimin e banesave të reja brenda vitit 2020, të cilat do të ngrihen përmes planit të rindërtimit.
Ministrja e Shtetit për Marrëdhëniet me Parlamentin, njëherazi kryetare e PS Tiranë, Elisa Spiropali, vizitoi familjet e prekura nga tërmeti, të akomoduar në hotel “Pishat e Buta”, të Golemit.
Spiropali kaloi disa momente të veçanta më ta, ku pas drekës së kaluar me fëmijët, kanë shijuar tok së bashku disa momente festive organizuar nga talentet e shkollës Gustav Mayer, e më pas bashkë me Drejtoreshën e Përgjithshme të Shërbimit Social Shtetëror, Luneda Sufali kanë shpërndarë dhurata për të gjithë fëmijët.
Ministrja theksoi se viti 2020 do t’i gjejë këto familje me banesa të reja e të sigurta./atsh
