ACMS është shoqata më e re e studentëve të Mjekësisë, pjesë e Federatës Ndërkombëtare të Studentëve të Mjekësisë. Ministrja e Shëndetësisë, Ogerta Manastirliu e pranishme në ceremoninë e hapjes së shoqatës më të re të mjekëve të ardhshëm u shpreh se ky zhvillim do të sjellë mundësi dhe kapacitete të reja për studentët dhe mjekët e rinj.
“Shumë e kënaqur që mora pjesë në ceremoninë e hapjes së shoqatës më të re të studentëve të Mjekësisë ACMS, e cila ka aderuar në Federatën Ndërkombëtare të Studentëve të Mjekësisë. Jam e bindur se ky përfaqësim do të sjellë rritje të shkëmbimeve studentore, duke krijuar mundësi dhe kapacitete të reja për studentët dhe për mjekët e rinj,” shprehet Manastirliu.
Ajo tha se Ministria e Shëndetësisë do të mbështesë studentët edhe në kuadër të Paktit për Universitetit, pasi vetëm kështu do të përmirësojmë sistemin shëndetësor.
“Do të vijojmë të mbështesim studentët e UM sepse përpos lidhjes organike që kemi, me Paktin për Universitetin kemi jetësuar angazhime konkrete në dobi të studentëve, të cilët së shpejti do të jenë armata e re e mjekëve të sistemit tonë shëndetësor,” tha Manastirliu. /atsh
