“Presidenti i Republikës nuk e ka kompetencën të shpërndajë parlamentin, ndërsa Kuvendi e ka kompetencën për ta shkarkuar Presidentin”, deklaroi sot kryetari i grupit parlamentar të Partisë Socialiste, Taulant Balla.
Në një konferencë për shtyp, Balla iu përgjigj pyetjes mbi mundësinë që ekziston që Presidenti të shpërndajë parlamentin.
“Më gjeni nenin në Kushtetutë ku thuhet kjo kompetencë. Unë di që në Republikën e Shqipërisë Presidenti zgjidhet nga Parlamenti dhe parlamenti nuk zgjidhet nga Presidenti. Kush kupton sadopak jurisprudencë në këtë vend e di që Kuvendi e ka të drejtën ta shkarkoj Presidentin e Republikës sipas një procesi rigoroz Kushtetues, që buron nga një raport i komisionit hetimor”, tha Balla.
Balla tha se “Presidenti i Republikës sheh ëndrra me sy hapur kur flet edhe për dekret që mund të shpërndajë parlamentin”.
“Të mos harrojmë që të vetmen lidhje që ka Presidenti me Kuvendin, është thirrja e seancës së parë të Kuvendit, pas procesit zgjedhor”, tha Balla. /atsh
