Kryetari i Partisë Demokratike, Lulzim Basha pranoi sot në mbrëmje në një studio televizive se ka lëvizur nga banesa e tij. mediet kanë nxjerrë së fundmi pamje të një vile lukzose ku thuhet se po jeton kryetari i Partisë Demokratike. I pyetur për të bërë transparencë në lidhje me atë kalimin e tij me qira përkohësisht, ai tha se ka bërë sqarime të plota dhe shteruese.
“Kam lëvizur me qira për një periudhë të përkohshme dhe nuk kam asnjë lidhje me asnjë oligark dhe nuk do të kem lidhje me asnjë oligark. Sulmet ndaj meje kanë për qëllim të heqin vëmendjen nga këto të vërteta. Dhe nuk kam për t’u tërhequr nga beteja ime kundër asnjë oligarku dhe asnjë të inkriminuari. Pra, kanë për qëllim vetëm të heqin vëmendjen nga të vërtetat e hidhura”, tha Basha.
I pyetur nëse mund të botojë një faksimilje të kontratës së qirasë, Basha tha se “kontratat dhe gjithçka tjetër janë të depozituara dhe këto i dinë fare mirë të gjithë”.
“Ajo që po ju them është kjo: E gjitha është një gënjeshtër, pa asnjë bazë në realitet dhe që ka një qëllim të vetëm: të heqë vëmendjen, në radhë të parë nga lista e gjatë e dështimeve të Edi Ramës dhe së dyti nga të vërtetat e hidhura të shqiptarëve.”, tha ai./atsh
