“Me dasht, me besu tek vetja, me fal buzëqeshje”. Kështu u shpreh gjatë klubit të leximit përpara nxënësve të gjimnazit “Petro Nini Luarasi” autori i mirënjohur Zija Çela, fitues në vite i mjaft çmimeve letrare.
Gjimnazistët diskutuan në Qendrën për Hapje dhe Dialog me autorin për librin me tregime “Princi i buzëqeshjes”, për fillesat si shkrimtar, për pushtetin e shkrimtarit, por edhe për nobelistin e saposhpallur, Peter Handke dhe çmimin e tij kaq të diskutuar.
“Juria e Nobelit hodhi në erë paturpësisht moralin e vet, duke iu kundërvënë moralit të njerëzimit, atij që është nënshkruar edhe në Kartat e OKB. Prandaj Handken ka juria, Bota ka Kadarenë. Madje në katin ma të epërm, atë të nivelit Mbinobel, në shoqërinë e Borgesit, Tolstoit, etj.,” u shpreh shkrimtari i njohur Zija Çela. /atsh
