Në një konferencë me gazetarët, Lulzim Basha këmbëngul se reforma zgjedhore nuk mund të bëhet pa opozitën në tryezë.
“Vetëm në mendjen e një njeriu që nuk e do integrimin europian, që do që të fshihet prapë për dështimin tjetër të radhës për hapjen e negociatave, mund të thotë “e marr dhe e bëj vetë” reformën zgjedhore”, tha Basha.
Ndërkohë kryetari i PD insiston në planin me 5 pika të PD. Sipas Bashës, një reformë zgjedhore pa opozitën në tryezë nuk është reformë po një “serum për të mbajtur në këmbë një pushtet të degraduar”.
“Ky është shansi i fundit për Partinë Socialiste që të kontribuojë në zgjidhjen e krizës së rëndë politike, siç e ka konstatuar edhe dokumenti i Bundestagut. Opozita ka marrë përgjegjësitë e saj, ka hartuar një plan me 5 pika, prandaj, edhe një herë e përsëris: ta zbatojë jo për hir timin apo PD, por për hir të qytetarëve shqiptarë, që e meritojnë integrimin në Bashkimin Europian! Të mos fshihet pas dështimit të radhës dhe të mos tregojë me gisht këdo përveç vetes për këtë dështim, se vetëm ai është përgjegjës për këtë dështim. Të zbatojë planin ose të hapë krahun!”, – përfundoi Basha. /atsh
