“Gjatë muajit gusht deklarimi i shitjeve është rritur me përqindje dyshifrore, ashtu se siç mund të themi në tregun e shitjes me pakicë të karburanteve deklarimi për muajin gusht, rezulton të jetë rritur me 40-45%”, deklaroi në emision televiziv, zv.kryeministri Erion Braçe, ndërsa theksoi se do të adoptojmë një sistem të ri monitorimi në çdo pikë karburanti.
“Kaq mjafton se kushtet e paligjshmërisë në transaksionet tregtare në treg kanë qenë të larta, për fat të keq kjo është një situatë paligjshmërie që nuk vjen vetëm nga operatorë ekonomikë, ka qenë e dyanshme mes operatorëve ekonomik dhe elementëve të korruptuar të administratës fiskale, qoftë në dogana, qoftë në tatime, ashtu siç janë edhe elementë të tjetër që kanë marrë të drejtën koncesionare për të kryer shërbime në këtë fushë, përfshirë kompanitë e kasave fiskale apo kompani të tjera që kanë operuar në treg të pa regjistruar në organet fiskale, duke ofruar shërbime kriminale duke e nxjerrë të gjithë sistemin jashtë regjimeve të përcaktuar me ligj”, shprehet ai.
Në lidhje me situatën e informalitetit, Braçe tha se ne jemi përqendruar te tregjet e mëdha dhe kompanitë e mëdha.
“Nuk jemi marrë me biznesin e vogël për arsyen themelore se ne jemi përqendruar aty ku aktiviteti është më i madh dhe natyrisht dhe përfitimet janë më të mëdha, kështu jemi marrë gjerësisht me tregun e karburanteve që është një treg i madh. Natyrisht nuk kemi bërë gjithçka në këtë treg pasi ka veprimtari kriminale dhe po merren organet e specializuara Ne do t’i shkojmë deri në fund luftës ndaj paligjshmërisë në këtë treg. Nga ana tjetër po mundohemi të adoptojmë një sistem gjurmimi të çdo pike karburanti, jo vetëm për të mbrojtur nga pikëpamja fiskale buxhetin e shtetit por për të mbrojtur qytetarët nga mishelimi, por dhe sasisë që u shitet qytetarëve. Ky sistem i ri që ne po mundohemi që në një periudhë afatshkurtër ta adoptojmë në të gjithë territorin e vendit”, tha ai.
Në lidhje me ndërhyrjet për sa i përket luftës kundër informalitetit, Braçe thotë se askush nuk duhet t’i bjerë telefonit. “Iu kushton më lirë të paguajnë detyrimet e shtetit dhe të jenë të ligjshëm, sesa të paguajnë inspektorët e karburantit, pasi do të përballen me ligjin”, tha ai, duke shtuar se përgjatë muajve cilësia e karburantit do të jetë më e mirë fal adoptimit të sistemit të ri.
Për sa i përket luftës kundër informalitetit në sezon turistik, Braçe tha se kjo luftë nuk është kundër njerëzve.
“Njerëzit duhet të kuptojnë se kjo nuk është kundër njerëzve, është në favor të tyre. Është shumë e qartë që transaksionet nga operatoret ekonomik shkojnë në buxhetin e shtetit dhe i kthehen qytetarëve në investime publike, pagat, shëndetësi, pensione arsim. Tre muaj rresht mars, prill dhe maj të gjithë punonjësit e organeve fiskale kanë qenë pranë sipërmarrjes, dhe pikërisht në këto sipërmarrje ku kemi zhvilluar aksionin gjatë muajve të verës, si dhe i kanë njoftuar”, tha ai. /atsh
