Numri i pasagjerëve, emigrantë por edhe turistë të shumtë, që udhëtojnë drejt portit të Vlorës vijon të jetë i lartë gjatë ditëve të fundit të korrikut.
“Gjatë kësaj fundjave në Portin e Vlorës kanë ardhur rreth 2100 pasagjerë, 750 prej të cilëve janë turistë të huaj”, bën të ditur për ATSH-në drejtori i Portit të Vlorës, Admir Malaj.
Autoritetet kanë marrë të gjitha masat për të përballuar fluksin e emigrantëve dhe turistëve që hyjnë apo dalin përmes portit detar të Vlorës, duke hapur sportele shtesë.
“Gjatë sezonit të verës po punojmë me 6 sportele në terminal për përballimin e fluksit të udhëtarëve dhe 3 për makinat”, thekson Malaj.
Qyteti i Vlorës gjatë këtij sezoni turistik është kthyer në një nga destinacionet më të preferuara për vizitorët vendas dhe të huaj. Në portin e Vlorës gjatë muajve të verës operojnë edhe anije turistike, të cilat nisen çdo ditë drejt ishullit të Sazanit dhe gadishullit të Karaburunit.
Porti i Vlorës është i dyti në vend për nga madhësia, pas atij të Durrësit./atsh
