Ministrja e Drejtësisë, Etilda Gjonaj ka theksuar sot se zgjedhjet kanë qenë model dhe pa asnjë incident.
E ftuar në studion e News 24, Gjonaj ka theksuar se pjesëmarrja ka qenë tepër e kënaqshme. “Mund të themi se deri më tani pjesëmarrja ka qenë tepër e kënaqshme. Gjithçka ka qenë e qetë, transparente dhe larg incidenteve. Në asnjë mënyrë nuk janë kërcënuar qytetarët dhe e mohoj kategorikisht këtë gjë. Çdo qytetar e ka kuptuar që vota sot është shumë e rëndësishme, pasi ka të bëjë me ndryshimin që duhet të vijë në Shqipëri”, u shpreh Gjonaj.
Ajo tha se Partia Socialiste dhe Kryeministri Edi Rama është i hapur për dialog. “Kryeministri Edi Rama e ka ftuar vazhdimisht Lulzim Bashën për të folur, këtu ju rikujtoj edhe dërgimin e një sërë letrash të hapura. Ju siguroj se Partia Socialiste ka qenë gjithmonë e hapur për dialog konstruktiv dhe pa kushte me opozitën”, saktësoi ministrja e Drejtësisë.
Duke folur për qendrimet e Presidentit Meta, Ministrja Gjonaj u shpreh se, “mund të flas për pozicionin tim. Unë e shoh si një ditë të veçantë që më jepet vetëm një herë në dy vjet për ta pasur, ku duhet të ushtrojë detyrat e mia si qytetare e këtij vendi. Jemi futur në garë si subjekt zgjedhor, pasi Meta dekretoi datën e zgjedhjeve 30 qershorin. Nuk e zgjodhëm ne që të ishim pa kundërshtarë, kushtet i vendosi opozita. Për sa kohë nuk duan të garojnë, kjo është e lirë, e duam apo jo këtë proces. Ne donim të kishim një kundërshtar të fortë, por siç e dini nuk e vendosëm ne këtë gjë”, tha Gjonaj.
Ne po respektojmë të gjitha rregullat e procesit dhe rezultatet në terren po e dëshmojnë këtë gjë. Ndërkohë, edhe ndërkombëtarët e kanë monitoruar nga afër procesin ashtu siç janë shprehur qartazi kundër dhunës”, nënvizoi Gjonaj. /atsh
