Ministrja e Mbrojtjes Olta Xhaçka vizitoi dy efektivët e kontigjentit EOD, të plagosur një ditë më parë në Letoni. Ministrja vizitoi major Klodian Tanushin, i cili ndodhet i shtruar në spitalin “Riga East University”, gjendja shëndetësore e të cilit është e rënduar.
Efektivi i Forcave tona të Armatosura ndodhet nën mbikëqyrjen intensive të mjekëve.
Ministrja Olta Xhaçka vizitoi edhe rreshter Juliaj Kapajn, i cili aktualisht ndodhet në spitalin e bazës ushtarake Camp Adazi në Letoni. Gjendja shëndetësore e rreshter Kapajt është shumë e mirë.
Ceremonia shtetërore e lamtumirës për nëntetaren Zarife Hasanaj do të zhvillohet gjatë paradites të së premtes, më 10 maj 2019.
Trupi i efektives që humbi jetën një ditë më parë pritet të mbërrijë në atdhe ditën e enjte, më datë 9 maj e do të transportohet me avion ushtarak.
Trupi i efektives Zarife Hasanaj do të shoqërohet edhe nga një efektiv kanadez, një letonez dhe kolegë të saj shqiptarë, pjesë e kontigjentit ku bënte pjesë.
Efektivja Zarife Hasanaj do të pritet në aeroportin “Nënë Tereza” me protokoll ushtarak e më pas do të dërgohet pranë familjes së saj. /atsh
