Presidenti Ilir Meta ka deklaruar sot se Shqipëria nuk ka pse të shkojë në konfrontim për interesa tërësisht egoiste dhe okulte.
Duke folur për mediet, pas pjesëmarrjes në Konferencën e tretë Kombëtare të Industrisë së Bimëve Mjekësore dhe Aromatike, Kreu i Shtetit theksoi se, “kjo situatë nuk duhet të ekzistonte kurrsesi pas 22 vitesh, që kur Shqipëria u nda me vitin 1997, që ishte një vit mjaft fatkeq”.
Meta u shpreh se “të gjithë duhet t’i thërrasin mendjes dhe të marrin përgjegjësitë e tyre. Për interesa tërësisht egoiste dhe okulte Shqipëria nuk ka pse të shkojë në konfrontim. Dhe As shqiptarët. Ata kanë vendosur të bashkëjetojnë në mënyrë demokratike dhe janë ndarë me sisteme përjashtuese që në vitin ’90”.
I pyetur se kush i ka këto interesa okulte, Meta tha se, “nuk i kanë ata të cilët mezi po presin turizmin dhe shtimin e rezervimeve dhe jo anulimin e rezervimeve”.
I pyetur për deklaratën e kryeministrit, i cili ka thënë që Presidenti nuk e ka ftuar për një tryezë për të zgjidhur krizën politike, dhe nëse do ta ndërmarrë Meta një hap të tillë, ai tha se, “askush nuk mund t’i transferojë përgjegjësitë tek të tjerët, aq më tepër tek Presidenti i Republikës. Ata e dinë vetë shumë mirë se çfarë duhet të bëjnë dhe duhet të jenë të ndërgjegjshëm për pasojat që do të kenë në rast se e çojnë vendin drejt konfrontimit”.atsh
