Zëvendëskryeministri, Erion Braçe ka lëshuar akuza në drejtim të kreut të Partisë Demokratike, Lulzim Basha duke u shprehur se “Kush cenon një mandat popullor, legjitimitetin e certifikuar ndërkombëtarisht te tij, duhet ta harrojë se mund t’i flasë për demokraci, rregull e ligj, cilitdo qytetari në këtë vend”.
“Lulzim Basha paska folur për nder e dinjitet gjatë ushtrimit të detyrës ose banalisht gëzimit të pushtetit! Po a ka nder e dinjitet një ministër që pushkaton në mes të ditës, ju merr jetën që zoti ua fali, katër qytetareve pa faj që protestonin kundër mënyrës së ushtrimit të pushtetit prej tij?
A ka nder e dinjitet po i njëjti ministër që-siç dëshmon Presidenti i Republikës i kohës, përdori gjithë pushtetin për të penguar, dështuar e në fund moslejuar hiç, hetimin e krimit më barbar në bulevardin e Tiranës qysh nga koha e fashizmit?
Nderi e dinjiteti mos ekzistoftë kur për to flet një vrasës i tillë! Kush cenon një mandat popullor-legjitimitetin e certifikuar ndërkombëtarisht te tij, për ministrin që pushkatoi katër burra të pafaj në mes të bulevardit, duhet ta harrojë se mund t’i flasë për demokraci, rregull e ligj, cilitdo qytetari në këtë vend!”, shprehet Braçe.
Sipas tij, Lulzim Basha nuk kërkon zgjedhje në 30 qershor, por pushtet në tavolinë.
“Nëse ka një arsye qe ky është sot në opozitë, i pavotuar nga shqiptarët,
nëse ka një arsye që ky nuk do zgjedhje, por pushtet në tavolinë përmes dhunës barbare prej fashisti, ajo është unike:Nuk votohen vrasësit!
Në çdo kohë!”, vijoi ai./atsh
