Kryemadhi: T’i japim fund tranzicionit 30-vjeçar në Shqipëri

“Ka ardhur koha që t’i jepet fund tranzicionit të zgjatur 30-vjeçar në Shqipëri” deklaroi sot Kryetarja e Lëvizjes Socialiste për Integrim, Monika Kryemadhi.

LSI mblodhi sot në Tiranë Konventën Kombëtare, ku morën pjesë gjithë delegatët, përfaqësuesit politikë të LSI-së dhe simpatizantë të kësaj force politike.

“Konventa kombëtare e LSI-së, mblidhet për herë të parë si shqiptarë të thjeshtë, pa mandat deputeti.

LSI-në nuk e bëjnë njerëzit, e bën shpirti, dashuria që kemi ne për njëri-tjetrin”, tha Kryemadhi.

Kryetarja e LSI-së tha se reforma në drejtësi është deformuar me qëllim për të lënë drejtësinë pa Gjykatë të Lartë dhe Kushtetuese.

Ne besojmë, tha Kryemadhi, se “pa parti politike transparente jeta politike shqiptare nuk do të jetë transparente”.

“Si doktoreshë edhe si fallxhore e parashikoj të ardhmen e Shqipërisë, të ndritur të begatë, pa Edi Ramën kryeministër”, tha Kryemadhi në fjalën e saj në Konventën Kombëtare të LSI-së./atsh