Pas vendosjes me ligj për mbylljen e subjekteve që përfshijnë veprimtari të lojërave të fatit, një pjesë e tyre kanë nisur t’i mbyllin vetë bizneset përkatëse.
Llotot sportive, janë të parat që po mbyllin qepenët, në shenjë lamtumire, ndërsa kazinotë janë ato që po shfrytëzojnë edhe ditët e fundit për të nxjerrë ndonjë përfitim.
Nga 4300 pika llotosh në total, 4000 prej tyre janë mbyllur. Sipas Shoqatës së Basteve Sportive, pjesa më e madhe e atyre që e vazhdojnë ende aktivitetin, ndodhen në kryeqytet.
Drejtoria e Përgjithshme e Tatimeve deklaron se deri më tani nuk ka patur asnjë aksion detyrues. Subjektet e mbyllura, i kanë dhënë fund aktivitetit të tyre vullntarisht, duke hequr edhe NIPT-et e biznesit.
Sa i takon kompanive të basteve, të dorëzuara ato po mundohen të nxjerrin edhe fitimet e fundit përmes shitjes së kompjuterave, televizorëve, apo duke dhënë dhe ambientet me qira.