Partia Demokratike dhe Lëvizja Socialiste për Integrim kanë paditur në Prokurori kryeministrin Edi Rama. Kallëzimi i partive opozitare ndaj Ramës lidhjet me ngjarjen e bujshme të dhunimit të Xhisiela Malokut nga djali i deputetit socialist, Rrahman Rraja.
Padia konsiston në kërcënimin që Rama i bëri ish-nënkomisarit Emiljano Nuhu, që denoncoi ngjarjen, duke e quajtur horr dhe duke thënë se nuk do t’i ndahet këmba-këmbës.
Gjithashtu, Nuhu, që tashmë ndodhet në arrati, tha se është kërcënuar me jetë në zyrën e tij nga të afërm të deputetit socialist, Rrahman Rraja dhe në prani të kryetarit të grupit parlamentar, Taulant Balla.
Kreu i grupit të PD, Edmond Spaho, tha nga Prokuroria e Tiranës se ndaj Ramës rëndojnë disa akuza të rënda, për të cilat kreu i qeverisë rrezikon deri në 4-5 vite burg./Pamfleti
