Refuzimi i prokurorëve për hedhjen e shortit mbi procedimin penal në ngarkim të Emiljano Shullazit dhe të tjerëve që ndodhen të arrestuar është bërë shkak për marrjen e masave disiplinore ndaj tyre. Prokurorja e Përkohshme e Përgjithshme Arta Marku vendosi marrjen e masave administrative ndaj prokurorëve Olsian Çela, Përparim Kulluri, Behar Dibra, Sonila Muhametaj, Edvin Kondili, Pranvera Pustina, Eugen Beçi, Blerim Tominaj dhe Besim Hajdarmataj.
Në fakt, fillimisht u tha për një hetim disiplinor për prokurorët e lartpërmendur, por në pak minuta, një tjetër deklaratë e zyrës së shtypit të kryeprokurores Marku njoftonte për caktimin e përkohshëm të tre prej tyre nga Prokuroria e Krimeve të Rënda në disa prokurori të tjera. Konkretisht, Olsian Çela në Berat, Sonila Muhametaj në Pukë dhe Besim Hajdarmataj në Pogradec.
Menjëherë pas këtyre lëvizjeve drejtori i Përgjithshëm i Policisë së Shtetit, Ardi Veliu në orën 17:00 të pasdites së sotme ka zhvilluar një takim te Prokuroria e Krimeve të Rënda me drejtuesen e këtij institucioni, Donika Prela.
E ndërsa nuk ka ende shumë detaje nga tema e diskutimit mes Veliut dhe Prelës.
Takimi vjen edhje pas operacioneve të fundit nga policia në bashkëpunim me prokurorinë në Shkodër, Krujë.
