Në kuadër të programit “100 fshatrat” në Lukovë është hapur “Atelier Lukova”, si instrument planifikimi për modelin e zhvillimit të Lukovës.
“Atelier Lukova” ka tashmë një dhomë plani, ku komuniteti në çdo moment mund të informohet mbi zhvillimin e planit të detajuar vendor dhe modelin e zhvillimit për Lukovën.
Dhoma e Planit është donacion i GIZ për fshatin, me vizionin dhe dëshirën se do të kontribuojë në procesin e planifikimit me pjesëmarrje dhe si rrjedhojë në zhvillimin e qëndrueshëm të Lukovës.
Dhoma e Planit është një hapësirë, e cila ilustron dhe jep informacion mbi procesin e hartimit të modelit të zhvillimit të Lukovës.
Ajo përmban informacione të ndryshme lidhur me planifikimin dhe potencialin turistik të fshatit dhe zonave përreth. Dhoma, e cila ndodhet në katin përdhe të godinës administrative të Lukovës, do të shërbejë gjithashtu dhe si një hapësirë për të mirëpritur çdo sugjerim prej banorëve dhe për të lehtësuar përcjelljen e shqetësimeve të tyre.
Kjo është hera e parë që një nismë e tillë ndërmerret në Lukovë dhe synohet nxitja sa më shumë e ndërveprimit me komunitetin por edhe me turistët.
Çdo sugjerim, kritikë a mendim i tyre do të merret në konsideratë gjatë hartimit të Planit të Detajuar Vendor të Lukovës.
“Atelier Lukova” mbështetet nga partnerët e Qeverisë Gjermane, GIZ në Shqipëri, Agjencia Kombëtare e Planifikimit të Territorit dhe Bashkia Himarë./atsh
