Kryeministri Edi Rama gjatë takimit elektoral në Gjirokastër ka theksuar se kush tenton të krijojë trazira më 30 qershor, do ta paguajë, siç nuk e ka parë në ëndrrën më të keqe
Sipas tij, kush do guxojë të prekë zgjedhjet, apo të ndalojë qytetarët shqiptarë për të votuar nuk do punojë për gjithë jetën në administratë. Sipas Ramës, gratë dhe vajzat që sot janë në administratë do vijojnë të jenë të punësuara, ndërsa burrat e kanë në dorë vetë zgjedhjen e tyre.
“Për ata që janë punonjës bashkisë, ne do t’i marrim të gjitha bashkitë, në të gjitha bashkitë nuk do të largohet nga puna asnjë grua dhe asnjë vajzë. Do punojnë atje. S’do e kenë fare problem. Asnjë grua dhe asnjë vajzë nuk do preket”, – nënvizoi Rama.
“Burrat si ta duan. Duan të dalin dhe të shkojnë pas “berihajit”, le ta provojnë. Jo që njëherë duke shkelur ligjin do përfundojnë burgjeve, por edhe sikur të mos përfundojnë burgjeve, s’kanë për të shkelur kurrë më në administratë. Sipas ligjit të dekriminalizimit të votuar së bashku me Partinë Demokratike, për krimet zgjedhore nuk punon dot dhjetë vjet në administratë. Ne do ta bëjmë që mos të punojë për të gjithë jetën”, – tha Rama.
“Asnjë taksapagues shqiptar s’do të japë asnjë kokërr leku që këta persona nga një anë marrin rrogën e taksat e shqiptarëve, dhe nga ana tjetër sulmojnë KZAZ, sulmojnë policinë, i vënë zjarr shkollës. Apo, larg qoftë, t’i shkojë mendja të shkojnë në qendër votimi më 30 qershor. Ta provojnë”, – tha Rama.
“Ne s’jemi si ata. Edhe ato të PS, që ankohen, që kur ishte Saliu nuk ishte kështu, unë i them që s’jam Saliu, ne duam punën. Në Gjirokastër do drejtojmë ne, se ne e duam punën dhe duam të punojmë për Gjirokastrën. Pas 30 qershorit, bashkia e Gjirokastrës do jetë shumë herë më shumë punëtore se këto vite”, – tha Rama.
“Ju thashë para katër vite se në bashkinë e Gjirokastrës do bënim shumë më shumë se çfarë ishte bërë në 20 vite. Dhe është fakt, e bëmë. Me shumë vuajtje, po e bëmë. Duke i ndenjur ke koka Kumbaro… etj. Por për hir të vërtetës, edhe më shumë mund të kishim bërë nëse do të kishim dikë në bashki, që s’do ta zinte vendi për të punuar. E kemi gjetur besojë dikë, që s’do ta zërë vendi për të punuar, prandaj tani tani do bëjmë edhe shumë më shumë për Gjirokastrën dhe Libohovën”, – shtoi Rama.
“Thirrja ime është se në 30 qershor nuk është çështja, kë do kemi kryetarë bashkie, çështja është çfarë Shqipërie do kemi. Do kemi një Shqipëri ku do të kemi popullin e lënduar, apo një Shqipëri ku ata që donin të lëndonin popullin, do të jenë të lënduar?” – tha Rama.
“PD ka pas intelektualë, ka pas figura të nderuara të qytetit. Janë në të drejtën e tyre demokratët të thonë që, Rama ik, unë do iki në Tepelenë tani. Janë në të drejtën e tyre. Por nëse iki unë apo jo, këtë e vendos populli. As Lul brilanti, as Luli me filxhanin. Këtë e vendos vetëm populli”, – theksoi Rama.
“Dhe populli më 30 qershor do ta vendosë. E kush do tentojë të bëjë trazira, do paguajë, siç nuk e ka parë në ëndrrën më të keqe. Ia kam thënë Metës, thuaji Monikës deri më 30 qershor s’ka kafe turke në shtëpi. Mbaron. I thashë Metës, thuaji Saliut, merr në telefon Lulin në shtëpi e mos dil nga shtëpia dhe s’ka pse të ketë asnjë rrëmujë”, – theksoi Rama. atsh
