Turizem

Flamingot, zogjtë me qafën e hollë dhe të harkuar dhe me këmbët e hijshme, kanë “pushtuar” lagunën e vogël në pjesën jugore të parkut Divjakë-Karavasta, të njohur me emrin Godulla e Ushtarit.

Flamingot e reja popullojnë këtë zonë të qetë ku në censusin e një viti më parë u numëruan 9 mijë shpendë ujorë.

Zogjtë lozonjarë tërheqin vizitorë të shumtë në vëzhgimin e piruetave të tyre, herët në fillim dite dhe përshëndesin diellin në perëndimin e tij. Ata janë kthyer në një destinacion për turizmin e vëzhgimit të tyre në habitatet natyrore ku jetojnë.

Ministri i Turizmit dhe Mjedisit, Blendi Klosi, shprehet se “vitet e fundit është është shënuar një trefishim i numrit të shpendëve ujorë në zonën e parkut”.

“Përveç suksesit të moratoriumit të gjuetisë, Ministria e Turizmit dhe Mjedisit po përmbyll takimet me grupet e interesit për rishikimin e përditësimin e kuadrit ligjor për mbrojtjen e faunës së egër, duke synuar mbrojtjen dhe shtimin e kësaj pasurie në mënyrë të qëndrueshme”, nënvizon ai.

Klosi shton se “për të gjithë të pasionuarit pas natyrës, kundrimi i shpendëve të shumtë në lagunat e vendit është një alternativë e bukur për fundjavën”.

Flamingot jetojnë gjithmonë në grupe, që nga grupet e vogla deri në qindra mijëra. Zogjtë ngrihen në ajër në grup dhe fluturojnë me qindra kilometra gjatë periudhës së shtegtimit. Fluturimi bëhet duke formuar radhë të gjata ose në formë V-je, derisa të arrijnë në vendmbërritjen e tyre – një liqen me ujë të kripur, që është vend i shkëlqyer për të ngritur folenë e për të rritur të vegjlit.

Zakonisht qindra flamingo mblidhen së bashku si një grup baleti uji. Të gjithë pastrojnë puplat e tyre rozë duke qëndruar me një këmbë në diell për orë të tëra. Madje me një këmbë ata edhe flenë.

Gjatësia e tyre shkon nga 81 deri ne 130 cm, por pesha e tyre trupore është e vogël, ajo shkon nga 2 – 3,6 kg. Duke kombinuar peshën dhe ngjyrën, flamingot janë ndër zogjtë më të dallueshëm nga të tjerët.

Ngjyra e flamingove është në varësi të ushqimit që hanë si edhe karkalecave, të cilat kanë përmbajtje të lartë karoteni, e cila i jep ngjyrën karotë në portokalli./atsh

Një grup prej 9 turistësh kaluan paraditen e sotme në malin e Tomorrit, duke ecur në zonat përreth Çezmes së Tarikos, shkruan Administrata Rajonale e Zonave të Mbrojtura Berat. Ata u drejtuan për tek Ujëvara e Sotirës dhe me pas do të shkojnë drejt Gramshit. Tashmë ky korridor është një nga më të preferuarit e turistëve që me mjetet e tyre përshkojnë rrugën, ndoshta jo cilësisht nga ana teknike e mirë, por mjaft piktoreske nga Dardha drejt Ujëvarës së Sotirës e më pas në Gramsh./atsh

Aktiviteti “Dita e Agroturizmit në Parkun Natyror Bashkiak Shkrel “, iu mirëpret sot në pyllin e Gështenjave të Reҫit.

Pylli i Gështenjave të Reҫit është monument natyror, ku të pranishmit në këtë aktivitet do shijojnë bukuritë natyrore dhe peizazhin e mrekullueshëm duke shijuar gështenjat të cilat në këtë zonë janë karakteristike dhe njihen si produkti me të cilët banorët krenohen.

Sot pranë sheshit kryesor të fshatit Reç duke filluar nga paraditja e deri në mesditë do të zhvillohen aktivitet të ndryshme si shëtitje në pikat më të bukura të zonës ,eksplorim i shtigjeve në natyrën e egër të zonës duke shijuar me njëri-tjetrin gështenjat e pjekura simbol i stinës së vjeshtës.

Ky aktivitet synon të prezantojë dhe të demonstrojë vlerat agroturistike dhe vlerat e agrobiodiversitetit në parqet natyrore .Reçi në këtë festë shpalos jo vetëm bukuritë dhe traditat e tij por edhe potencialet dhe kapacitetet turistike./Atsh

Dibra jo vetëm një destinacion turistik, por një vend ku turistë të huaj zhvillojnë aktivitete sportive dhe aeronautike.

Nëse do zgjedhësh Dibrën për të bërë turizëm është zgjedhja ideale për turistë vendas dhe të huaj, pasi natyra ka përsosur peizazhin më atraktiv që haset jo vetëm në Shqipëri por më gjerë.

Një luginë e shtrirë mes kodrave që përshkruhet nga lumi Drin, ku mund të zhvillosh aktivitete sportivë për gjithë gjatësinë e tij.

Kodra dhe hapësira mes tyre, duke u ngjitur drejt maleve që janë një parajsë për çiklistët për terrene malore.

Mali i Korabit që rrokë qiellin, një vend ideal jo vetëm për shqiponja, por edhe për të pasionuarit e aeronautikës.

Tobbi është një Zvicerian që për 4 itinerare me biçiklete në rrugë malore ka zgjedhur Dibrën, Rabdisht-Qafë-Murrë-Korab-Bulqizë.

Dibra, vendi i pasionit, aventurës, ku nuk mungojnë hedhje dhe të pasionuarit e aeronautike dhe alpinizmit.

Të tjerë turistë u janë ngjitur maleve të Dibrës, Korabit apo zonave të tjera për rreth duke shijuar mrekullitë e natyrës që të ofron Dibra./atsh