Turizem

Nga një bazë ushtarake e paarritshme, në një atraksion turistik, ja përse ky ishull i vogël po shndërrohet në një destinacion që nuk duhet humbur, shkruan portali italian që i kushtohet udhëtimeve dhe turizmit, “siviaggia.it”.

Për grekët dhe romakët antikë ishte “Sason”, ndërsa për shqiptarët quhet “Sazan”.

Sazani është një ishull i vogël prej rreth gjashtë kilometrash katrorë, që ndodhet përballë gjirit të Vlorës, në Kanalin e Otrantos. Një shkëmb gjigant që prej dekadash ka qenë një bazë ushtarake e paarritshme, dhe që sot po shndërrohet në një prej atraksioneve turistike kryesore të Shqipërisë.

Në fakt, ishulli është një parajsë e vogël me natyrë të egër dhe të padëmtuar, ku mund të eksplorosh shtigje jo shumë të rehatshme, por jashtëzakonisht tërheqës dhe misterioz, dëshmi e të kaluarës së tij të trazuar ushtarake. Këtu ujërat e kristalta dhe plazhet mbresëlënëse shërbejnë si kundërpeshë ndaj relikteve të Luftës së Ftohtë, një pjesë e të cilave është mbledhur nga arkeologët dhe ekspozuar në Muzeun Arkeologjik të Durrësit.

E kaluara e trazuar e Sazanit shfaqet në çdo cep të këtij shkëmbi gjigant me një kulm prej gati 340 metrash mbi nivelin e detit, mes 3600 bunkerëve të shpërndarë në sipërfaqen e tij dhe galerive nëntokësore të gjata disa kilometra, të ndërtuara për ushtarët e Shqipërisë komuniste të Enver Hoxhës.

Gjatë fashizmit, këtu u shfaqën veprat e para të fortifikimit, por edhe rrugë, shtëpi, shkolla dhe teatro. Nga pak, kudo mund të admirohen disa prej godinave të ndërtuara gjatë dominimit italian dhe më pas ato të periudhës së Luftës së Ftohtë, ndonëse një pjesë e mirë e strukturave u shkatërruan gjatë manovrave të fundit të përbashkëta mes forcave ushtarake të NATO-s dhe atyre shqiptare. Mes këtyre u shkatërrua edhe vila që Musolini ngriti në ishull në vitin 1930.

Sazani ndodhet gjysmë ore larg me traget nga Vlora, porti që pret turistët ndodhet në pjesën lindore. Nga këtu, mund të shkohet në këmbë në bregun perëndimor, ku ndodhet Gryka e Xhehenemit dhe Gjiri i Djallit, që përbëjnë një peizazh spektakolar.

Duke vazhduar në drejtim të jugut, do të shihni një prej vendeve më të jashtëzakonshme të ishullit, të mrekullueshmin Plazhi i Admiralit, mes shkëmbinjve që lagen nga ujëra, transparenca e të cilëve është një dëshmi e qartë e izolimit që ka mbrojtur Sazanin, duke i mundësuar që të mos ndotet.

Nga viti 2010, ishulli bën pjesë, bashkë me gadishullin e Karaburunit, në Parkun Kombëtar Karaburun-Sazan, që mund të arrihet nëpërmjet një prej shumë anijeve që nisen nga porti i Vlorës. Këtu mund të admirohet Shpella e Mrekullueshme e Haxhi Aliut, e konsideruar si më e madhja dhe e thella në gjithë Shqipërinë. Një spektakël unik dhe emocionues, si rrallë në botë. /atsh

Kroçera “MSC Mucia” po zbarkon pothuajse çdo javë në portin e Sarandës, duke sjellë mijëra turistë nga vende të ndryshme të botës.

Porti i Sarandës bën të ditur për ATSH-në se “në bordin e kroçerës që erdhi dje nga porti i Pireut, Greqi, ishin 3 111 turistë nga Taiwan, Kinë, Tajlanda, Ukraina, Austria, Belgjika, Brazili, Bullgaria, Danimarka, Gjermania, Hungaria, Irani, Italia, Spanja, Zvicra, Ekuadori, Polonia, Rusia, Uruguaji, Zelanda e Re, etj”.

Turistët e huaj gjatë qëndrimit në Sarandë vizituan pikat turistike të qytetit, si Butrintin, Ksamilin, Syrin e kaltër, kalanë e Lëkurësit, Mesopotamin, si dhe qytetin e Gjirokastrës.

Sipas portit të Sarandës, pas vizitës në Sarandë kroçera u drejtua në portin e Dubrovnikut, në Kroaci.

Shqipëria vitet e fundit është kthyer në një nga destinacionet më të preferuara turistike për turistët e huaj që vizitojnë vendin tonë me kroçera dhe jahte turistike. Vetëm gjatë këtij viti në portin e qytetit bregdetar kanë rezervuar 42 kroçera.

Qyteti i Sarandës ka filluar që në muajin shkurt të këtij viti të presë turistët e parë, të cilët gjatë pikut të sezonit turistik ka një fluks të shtuar.

Saranda e njohur për plazhet mahnitëse dhe ujin si kristal është kthyer në destinacionin e preferuar të turistëve vendas e të huaj. Përveç diellit e plazhit, Saranda veçohet dhe për historinë dhe kulturën e saj: e magjishme është kalaja e Lëkurësit, ndërsa Parku Arkeologjik i Butrintit nxit kureshtjen e turistëve të shumtë me historinë e tij mijëravjeçare./atsh

Një anije e vjetër katariane me vela po lundron aktualisht në vendet e rajonit në një turne që quhet “Fatah Al Khair 4”. Deri tani ka vizituar Turqinë dhe Greqinë dhe më 20 gusht 2019 do të mbërrijë në brigjet shqiptare.

Në vendin tonë, ndalesa e parë e anijes katariane me vela do të jetë Saranda më 20 gusht 2019, ku pritet të mbërrijë në portin e qytetit bregdetar shqiptar në orën 6 pasdite, duke valëvitur flamujt kombëtarë të Shqipërisë dhe të Katarit.
Me këtë rast, do të organizohet një pritje e madhe në shëtitoren e qytetit. Banorët e Sarandës dhe të pranishmit në këtë pritje do të kenë mundësinë të hyjnë dhe të shohin nga brenda anijen, ku do të njihen me vetë anijen si dhe me kulturën detare të Katarit. Atyre do t’i shpërndahen edhe suvenire që simbolizojnë Botërorin “Qatar 2022”.
Pas qëndrimit dy ditor në Sarandë, anija do të niset për në qytetin e Durrësit dhe do të arrijë në portin e tij më 24 gusht në orën 6 pasdite. Edhe në këtë qytet të lashtë të historisë dhe kulturës shqiptare, do të ketë një pritje dhe disa aktivitete argëtuese me banorët e qytetit dhe vizitorët e plazhit.

Më datë 25 gusht, aktivitetet e lidhura me lundrimin “Fatah Al Khair 4” do të transferohen në Tiranë. Për dy ditë, në sheshin “Skënderbej” në qendër të kryeqytetit dhe tek parku i liqenit, do të zhvillohen disa surpriza të këndshme dhe do të organizohen aktiviteteve kulturore dhe sportive në bashkëpunim me bashkinë e Tiranës.

Këto aktivitete do të jenë të hapura për të gjitha grupmoshat, gjatë të cilave do të shpërndahen dhurata dhe suvenire me logo të Botërorit “Qatar 2022”.

Anija e cila ka në bord 15 marinarë katarianë, ka dy vela dhe është e llojit “Boom Safari” e punuar prej druri, me gjatësi 110 këmbë dhe gjerësi 27 këmbë, dhe ka kapacitet mbajtës prej 200 tonësh. Kjo anije konsiderohet një muze në miniaturë që pasqyron trashëgiminë detare të Katarit. Gjithashtu ajo është e pajisur me ekrane të mëdha për të prezantuar stadiumet dhe përgatitjet e tjera të infrastrukturës sportive ku do të mbahen ndeshjet e Botërorit të Futbollit “Qatar 2022”.

Lundrimi “Fateh Al Khair 4” për vitin 2019 do të zgjasë katër muaj dhe do të përshkruajë rreth 4400 milje, nisur nga Bosfori e deri në Xhenova të Italisë.

Konkretisht destinacionet e tij për këtë vit do të jenë pesë vende të Mesdheut, përkatësisht Turqia, Greqia, Shqipëria, Kroacia dhe Italia. /atsh

Punonjësit e Ndërmarrjes së Shërbimeve Publike në Vlorë po punojnë me ritme të larta për mirëmbajtjen dhe pastrimin e trotuareve në Lungomare.

Kryetari i bashkisë së Vlorës, Dritan Leli, gjatë inspektimit të kryer përgëzoi punonjësit për punën e bërë në sistemimin e trotuareve të dëmtuar dhe në pastrimin përgjatë bregdetit.

“Vlora këtë vit pavarësisht klimës politike që i parapriu sezonit turistik është vizituar këtë verë nga me shumë njerëz se më parë. Detyrë e të gjithëve është të presim turistët dhe të mirëmbajmë hapësirat publike, të cilat kanë pafund abuzim mbi pastërtitë, ndotjen e mjedisit, dëmtimet gjatë ditës dhe natës”, – tha Leli.

Sipas tij, punonjësit punojnë gjatë gjithë kohës me turne, ditë dhe natë.

“Në Lungomare janë 22 punonjës të dedikuar vetëm për këtë shëtitore, punonjës të ndërmarrjes së gjelbërimit, të rrjetit të ujësjellësit, të ndriçimit. Punojnë 24 orë për të pasur maksimunin e shërbimit”, – theksoi Leli.

Kryebashkiaku Leli kërkoi bashkëpunim më të madh qytetar dhe një përkujdesje më të madhe të të gjithë atyre njerëzve që përdorin hapësirat për biznese që në fund fare i kanë hapësira përfitimi.

“Rritja e ndjeshmërisë është maksimumi që mund të bëjmë për të patur një qytet të pastër”, u shpreh Leli./atsh

Besimtarët e krishterë ortodoksë kremtojnë sot Festën e Shën Mërisë, një nga festat më të mëdha të kalendarit ortodoks.

Ashtu si çdo 15 gusht, ritet fetare u kremtuan edhe në Manastirin e Shën Mërisë në Zvërnec, ku i pranishëm edhe kryetari i bashkisë së Vlorës, Dritan Leli, i cili i uroi gëzuar festën të gjithë besimtarëve ortodoksë dhe të kenë sa më shumë harmoni me njëri-tjetrin. “Më herët njerëzit kanë pasur vështirësi të vinin në manastir, por tani falë investimit që kemi bërë pak kohë më parë vizitorët që vijën në manastir janë gjithmonë e më të shumtë. Ky manastir është kthyer në destinacionin më të vizituar të pikave turistike dhe historike që Vlora ka”, – theksoi Leli.

Kryebashkiaku Leli u shpreh se “ngelem mirënjohës për këdo që përpiqet të punojë të tregojë qytetari, të mbajë në standardet e duhura këto objekte të kultit, të cilat janë edhe vende pelegrinazhi për të gjithë turistët e vizitorët”.

Pas pelegrinazhit në këtë kishë, besimtarët festuan në familjet e tyre ditën që njihet ndryshe nga besimtarët si “Dita e ngjitjes së Zonjës”. Në traditën e lashtë shqiptare, shqiptaret e quajnë këtë festë edhe si “Pashka e verës”, ose “Pashka e vogël” për të simbolizuar rëndësinë e kësaj dite të shënuar. Besimtarë nga zona të ndryshme të vendit mblidhen së bashku pranë manastireve apo kishave qe mbajnë emrin e Nënës së Zotit dhe pasi përfundojnë liturgjinë, vendasit shtrojnë panaire për nder të gjithë të ardhurve ku krahas ushqimit ka edhe këngë edhe valle.

Ashtu si “Pashka e Madhe”, Ringjallja e Krishtit, që bie zakonisht në pranverë, edhe “Pashka e verës” është një gërshetim i dhimbjes së kthyer në gëzim. Si Jezu Krishti, edhe Virgjëresha Mari u ringjallën dhe lanë pas varre bosh.

Nga data 1-15 gusht janë dy javë kreshmë (agjërim) dhe ditën e festës besimtarët kungohen me Trupin dhe Gjakun e Krishtit. Pas liturgjisë hyjnore, kreshma prishet dhe vendin e kreshmës e zënë panairet pranë manastireve dhe kishave, që mbajnë emrin e Shën Mërisë.

Krahas projekteve strategjike në infrastrukturën rrugore, aeroporte, porte etj, po investohet edhe në ekonomitë lokale.

Në kuadër të projektit për Zhvillimin e Turizmit dhe Integrimin Urban që po zbatohet me mbështetjen e Bankës Botërore, në katër bashki të vendit Berat, Përmet, Sarandë e Gjirokastër, ka nisur konsulenca mes ekspertëve për përmirësimin e zonave turistike në Zvërnec-Nartë dhe banjat termale në Bënjë.

Zvërnec- Nartë, është padyshim një prej zonave më të bukura përgjatë bregdetit Shqiptar të Adriatikut. Në një sipërfaqe prej rreth 20 000 ha ndërthuret një larmishmëri e gjerë habitatesh me një diversitet të lartë biologjik, çka e shtyu qeverinë shqiptare në vitin 2004 t’i japë statusin peisazh i mbrojtur kësaj zone.

Ndërsa banjat termale të Bënjës, 14 km larg qytetit te Përmetit ka ujëra me baze sulfurore që kanë efekte shumë të larta kuruese.Këto burime u shfrytëzuan nga shteti në vitet 1964-1975 dhe aktualisht shfrytëzohen në mënyre të pa-organizuar nga banorë dhe vizitorë të ndryshëm të cilët zgjedhin për të pushuar pranë tyre.

Konsulentët për kërkimin e tregut në këto zona synojnë finalizimin ideve të integruara për zhvillimin e një produkti turizmi të qëndrueshëm.

Objektiv është përmirësimi i infrastrukturës urbane, rritja e aseteve turistike dhe forcimi i kapaciteteve për zhvillimin e ekonomive lokale të lidhura me turizmin në këto zona të përzgjedhura perla të jugut të Shqipërisë.

Ky projekt ka në total katër komponentë; Përmirësimin e infrastrukturës dhe pjesës urbane; përmirësimin e zonave turistike; zhvillimin e një produkti dhe tregu të turizmit dhe komponenti i katërt lidhet me mbështetjen e zbatimit të këtyre komponentëve./atsh

Vijon operacioni “Plazh i lirë” për lirimin e plazheve publike. Janë liruar rreth 1000 m2 plazh publik në Himarë, i zaptuar në mënyrë të paligjshme. Sekuestrohen rreth 200 kompleteve shezlongë e çadra. Procedohen penalisht nga Policia e Himarës 3 shtetas, pronarë të subjekteve për veprat penale “Fshehja e të ardhurave” dhe “Pushtimi i tokës”.

Në Durrës janë liruar rreth 1000 m2 plazh, janë sekuestruar rreth 270 komplete shezlongë e çadra dhe Policia e Durrësit ka proceduar penalisht 2 shtetas , pronarë të subjekteve.

Në vijim të planin të posaçëm të masave “Për parandalimin, evidentimin dhe ndëshkimin e informalitetit, evazionit fiskal në turizëm, ndërtim, hidrokarbure, mallra të akcizës dhe krimeve të tjera mjedisore”, Policia e Himarës në bashkëpunim me Policinë e Sarandës pas kontrolleve të ushtruara në plazhin e quajtur “Krorës” në Shën Vasil, Himarë, ka konstatuar 3 subjekte tregtare, të cilat zhvillonin aktivitetet e tyre tregtare në mënyrë të paligjshme.
Policia ka sekuestruar rreth 200 komplete shezlongë dhe çadra, të cilat shfrytëzoheshin nga ana e secilit pa kasë fiskale dhe pa leje nga bashkia Himarë.

Në vijim të veprimeve procedurale, Policia ka proceduar penalisht 3 pronarët e këtyre subjekteve: A.L., N.V., dhe A.D.

Operacioni ka vijuar edhe në Durrës, ku Policia në bashkëpunim me trask forcën e ngritur nga prefekti i qarkut në bashkëpunim me Policinë bashkiake në zonën e Katundit të Ri, në pjesën e plazhit, ka liruar rreth 1000 m2 plazh, i zaptuar në mënyrë të paligjshme nga dy pronarë subjektesh, si dhe ka sekuestruar rreth 270 komplete shezlogë e çadra.

Në përfundim të veprimeve Specialistët e Hetimit të Krimit Ekonomik e Financiar në DVP Durrës , proceduan penalisht shtetasit D.D. e SH.P., për veprat penale “Pushtimi i tokës ” dhe “Fshehja e të ardhurave“. /atsh