Turizem

Pushuesit dhe turistët, që zgjedhin Sarandën për të kaluar pushimet, do të kenë një mundësi më shumë për turizëm.

Në kanalin e çukës në Sarandë, Federata Shqiptare e Rafting ka krijuar infrastrukturën dhe mjetet e nevojshme për të zhvilluar rafting, duke i hapur rrugë zhvillimit të turizmit të aventurës në një destinacion të ri turistik.

“Është një biznes i ri, është një udhëtim i qetë dhe shumë i bukur të cilin të rinjtë e Smile do ta shijojnë sot për ta promovuar si një destinacion të ri për Sarandën. Është shumë e rëndësishme që qendra të vërteta të zhvillimit të turizmit në Shqipëri e të qytetit të Sarandës të ketë shumë më tepër oferta ditore si kjo e kanalit të Cukës apo e gjithë zonës për t’u bërë me djemtë e rafting dhe të kemi mundësinë që po ashtu të zhvillojmë edhe oferta të tjera në Sarandë që kanë të bëjnë me bukuritë natyrore, me vizitat e parqeve arkeologjike dhe bukuritë e tjera shqiptare”, tha ministri Klosi, i cili bëri edhe guidën e parë me kajak duke përshkuar të gjithë lumin Bistrica, në një atraksionet më të mrekullueshme natyrore të Sarandës.

Sipas tij, çdo përpjekje për të krijuar mundësi të reja në turizëm është një arsye më shumë për të zhvilluar turizmin dhe për të pritur turistët me më shumë shërbime dhe alternativa për të kaluar pushimet jo vetëm në verë, por gjatë gjithë vitit.

Për presidentin e federatës shqiptare të Rafting, Zamir Spathara, mbështetja e ministrisë së Turizmit dhe Mjedisit është një motiv më shumë për të zhvilluar turizmin në një nga potencialet e forta të Sarandës që do të shërbejë gjatë gjithë sezonit turistik.

“Këtu jemi shumë afër Sarandës, pozicioni është shumë i bukur, Bistrica është një lumë që të jep mundësinë që të lundrosh e të jesh i qetë. Ne gjatë rrugës do të shohim një xhungël të vogël, ka qenë problematike se ka qenë e papastër, një vit më parë kur kemi bërë turizëm kemi patur shumë probleme, por këtë sezon ne arritëm që të bëhet pastrimi dhe të bëjmë një tur të denjë për turistët. Mbase jemi vonë për këtë sezon por unë shpresoj që sezonin tjetër ne do të jemi shumë fort me struktura më të ngritura. Kryesorja për ne është që sot kemi arritur të sjellim ministrin që do ta bëjë vetë këtë tur”, tha presidenti i federatës shqiptare të Rafting Sathara./atsh

Teto Ollga, personazhi i njohur dhe shumë i dashur i filmit shqiptar “Zonja nga qyteti”, xhiruar në Tushemisht të Pogradecit, i dha jo vetëm famën fshatit turistik, por tashmë i dha edhe emrin e festës lokale që po zhvillohet për të dytin vit radhazi.

Kjo festë nisi sonte në fshatin e bukur turistik të Tushemishtit, ku qytetarë nga Pogradeci, vizitorë dhe turistë po shijojnë bukurinë e fshatit, mikpritjen e banorëve, gatimet tradicionale etj.

Të pranishëm në festë kryetari i bashkisë së Pogradecit, Ilir Xhakolli dhe ministri i Shtetit për Mbrojtjen e Sipërmarrjes, Eduard Shalsi, jo vetëm shprehën mbështetje maksimale për këtë festë, por tashmë çdo vit e më tepër ajo do të organizohet me risi edhe më të veçanta.

Pjesë e festës është edhe panairi me punimet e grave duararta të Tushemishtit.

Shumë breza shqiptarësh janë rritur me figurën e teto Ollgës dhe mitin e atij fshati shumë të bukur, që ofron mikpritje, traditë, festë, dashuri, pastërti. /atsh

Ministri i Shtetit për Diasporën, Pandeli Majko u takua me një grup të rinjsh nga Gjermania të cilët po vizitojnë Shqipërinë për t’u njohur më tepër me historinë dhe kulturën shqiptare në kuadër të projektit “Rrjetëzimi i Rinisë shqiptaro-gjermane përmes kulturave”.

Grupi i përbërë nga të rinj shqiptar dhe gjermanë u njoh nga afër me punën e Ministrit të Shtetit për Diasporën, politikat dhe projektet e realizuara dhe ato në zhvillim. Gjatë bashkëbisedimit ministri Majko u shpreh se “çdo i ri në Diasporë duhet të njoh prejardhjen familjare, historinë e vendit të origjinës, në mënyrë që të ruhet identiteti kombëtar”.

Grupi i të rinjve të shoqëruar nga Konsullja e Nderit të Shqipërisë në Gjermani, Anduena Stephan kanë vizituar disa nga qytete e Shqipërisë, janë njohur me natyrën, kulturën, historinë dhe traditat shqiptare.

“Rrjetëzimi i Rinisë shqiptaro-gjermane përmes kulturave” është projekt u realizua në bashkëpunim me Ministrinë e Integrimit të Landit të Veriut të Vestfalisë, Shoqata “IDEAL” dhe Konsullata e Nderit të Shqipërisë në Gjermani./atsh

Një pritje dinjitoze iu rezervua ardhjes së Velierës nga Katari në brigjet e Sarandës, e konsideruar një muze në miniaturë mbi trashëgiminë e detarisë.

Në ceremoninë e pritjes ndodheshin qytetarë të Sarandës dhe autoritete të larta. Ata u pritën nga qytetari i parë i Sarandës, Kryetari i bashkisë, Adrian Gurma, nga deputeti i qarkut të Vlorës, Alket Hyseni, nga ministri i Turizmit dhe Mjedisit, Blendi Klosi, nga ambasadori i Katarit në Republikën e Shqipërisë, Shkëlqesia e Tij, Ali Bin Hamad Al-Marri, nga drejtoresha e portit të Sarandës, Kozeta Statha e autoritete portuale.

Në tapetin e kuq, të shtruar për nder të ardhjes së Velierës historike nga Katari, duke mbajtur në duar banerin ku shkruhej në gjuhën angleze “U pafshim më 2022”, që mbante ekuipazhi i sapozbritur nga anija, u bënë foto mes tyre dhe autoriteteve të larta.

Përveç përshëndetjeve zyrtare, ekuipazhi i anijes dhe publiku i pranishëm, u përshëndetën me një buqetë këngësh, vallesh dhe melodish, nga interpretues të vegjël të Qendrës Kulturore të Fëmijëve. Pas kësaj, autoritetet dhe publiku bënë vizita në anije, e cila është një muze në miniature.

Në kuvertën e anijes, Kapiteni i saj, Mohamed Yousef Al-Sada, i mirëseardhi autoritetet e larta, i falënderoi për pritjen dhe u dhuroi si suvenir Velierën “Fateh Al Khair 4”, të punuar në dru.

Nga ana e vet edhe zoti Gurma i dhuroi disa suvenire kapitenit Mohamed Yousef Al-Sada, në emrin e vet personal dhe të insitucionit të bashkisë.

Për gazetarët që shoqërojnë udhëtimin e Velierës “Fateh Al Khair 4”, Kryebashkiaku Adrian Gurma dha një intervistë, gjatë së cilës vlerësoi ardhjen e kësaj anijeje si një mundësi të artë për promovimin e Sarandës.

“Saranda dhe unë, u shpreh nder te tjera Kryebashkiaku Gurma,- duhet ta ndjejmë veten me fat, për faktin që jemi shqiptarët e parë që presim ardhjen e kësaj veliere sot. Ne, shqiptarët jemi ndoshta populli më sportdashës i futbollit. Ne jemi plot shpresë që fati do të na dojë duke e bërë Kombëtaren tonë pjesë të kampionatit Botëror të Futbollit, që e ka emrin “Katar 2022”, tha për mediat e Katarit kreu i bashkisë së Sarandës, Gurma.

Anija do të vazhdojë të jetë e hapur per t’u vizituar nga publiku sarandiotë edhe gjatë ditës së sotme, prej ores 16:00 deri në orët e vona të mbrëmjes./atsh

Kryeministri Edi Rama ka ndarë lajmin e mirë se në njëzetë ditët e para të këtij gushti, kanë hyrë në Shqipëri plot 1 milion turistë të huaj, ose 16,5 % më shumë, se sa i gjithë gushti i kaluar.

“Shifra rekord e turistëve në regjistrin e pashaportave të huaja gjatë gushtit, i takoi Luisës, njërës prej dy vajzave të familjes Forster nga Austria, të cilën kur hyri sot në Portin e Sarandës, së bashku me motrën dhe prindërit, e priti një surprizë e këndshme.

Në njëzetë ditët e para të këtij gushtit, kanë hyrë në Shqipëri plot 1 milion turistë të huaj ose 16,5 % më shumë, se sa i gjithë gushti i kaluar.

Rritja që po shënon turizmi vit pas viti, është një arsye e madhe për të besuar gjithnjë e më shumë tek ky vend dhe e ardhmja e tij, po edhe për të rritur më shumë përpjekjet tona, në çdo aspekt, si qeveri, si bashki e si komunitete, si qytetarë e njerëz të zakonshëm të këtij vendi. Që Shqipëria ta kthejë turizmin në një burim krenarie kombëtare dhe fuqi gjithnjë e më të madhe zhvillimi ekonomik e social”, shprehet Kryeministri Rama. /atsh

Veliera e lashtë nga Katari, e konsideruar një muze në miniaturë mbi trashëgiminë e detarisë në Katar do të prekë sot portin e Sarandës.

Porti i Sarandës është ndalesa e parë në Shqipëri për velierën “Fateh Al Khair 4”, e cila do të jetë e disponueshme të vizitohet nga qytetarët.

Ndërkohë që në sheshin e portit të Sarandës do të organizohet ceremonia e pritjes, me prani të autoriteteve qendrore e vendore, bën të ditur Porti.

Banorët e Sarandës dhe turistët e pranishëm në pritje, do të kenë mundësinë të hyjnë dhe të shohin nga brenda anijen, ku do të njihen me velierën, si dhe me kulturën detare të Katarit.

Atyre do t’u shpërndahen edhe suvenire që simbolizojnë Botërorin “Qatar 2022”. Gjithashtu veliera është e pajisur me ekrane të mëdha për të prezantuar stadiumet dhe përgatitjet e tjera të infrastrukturës sportive ku do të mbahen ndeshjet e Botërorit të Futbollit “Qatar 2022”.

Anija e llojit “Boom Safari” është e punuar prej druri, me gjatësi 110 këmbë dhe gjerësi 27 këmbë dhe me kapacitet mbajtës prej 200 tonësh./atsh

Gjatë muajit gusht, në portin e Vlorës është regjistruar një numër rekord hyrjesh të udhëtarëve që mbërrijnë me tragetet që përshkojnë linjën detare Brindisi-Vlorë e kthim.

Në periudhën 1-18 gusht, në pikën kufitare të këtij porti kanë hyrë mesatarisht çdo ditë, më shumë se 1000 persona, çka përbën një shifër të paregjistruar në të paktën 20 vitet e fundit.

Gjatë sezoneve verore paraardhëse, fluksi i ardhjeve me tragete nga Italia arrinte pikun në periudhën 15 korrik deri në ditët e para të gushtit, ndërkohë që, më pas, ai shfaqej në kahun e kundërt, ndërkohë që emigrantët ktheheshin në itinerarin Vlorë-Brindisi, për të udhëtuar drejt vendit fqinj, apo shtete të tjera, ku jetojnë e punojnë.

Drejtori i Portit të Vlorës, Adi Malaj, tha për ATSH-në se, prezenca e fluksit të lartë të hyrjeve në pikën kufitare të portit të Vlorës gjatë muajit gusht, lidhet me strukturën e udhëtarëve, të cilët janë në më shumë se 90%, turistë italianë, që kanë zgjedhur të kalojnë pushimet verore në bregdetin tonë.

Kjo u pasqyrua edhe në treguesit e një dite më parë, kur me dy tragetet e linjës detare Brindisi-Vlorë, mbërritën më shumë se 800 turistë, kryesisht qytetarë italianë, të cilët do të qëndrojnë për pushime në Vlorë për periudha të ndryshme kohore, që shkojnë në më shumë se një javë.

Sipas Malajt, pritshmëritë janë që fluksi të vazhdojë edhe për ditët në vijim, kur, porti i Vlorës do të vijojë të jetë një nga pikat hyrëse të turistëve të huaj që vijnë për pushime në vendin tonë.

Kjo reflektohet edhe në mjediset e plazheve në bregdetin e gjirit të Vlorës apo më në jug, kur, turistët nga vendi fqinj janë të shumtë dhe prania e tyre është e dukshme.

Kjo ndodh edhe në mjedise të tjera publike, përgjatë Lungomares, apo në lokalet e shumta përgjatë saj, ku italishtja është një nga gjuhët që dëgjohet më shumë.

“Ka shumë bashkëqytetarë të mi, që kanë ardhur këtë vit në Vlorë për të pushuar”, më thoshte dy ditë më parë, Mimo, një 48-vjeçar nga Napoli, që ka mbërritur këtu në fillimjavën e shkuar, së bashku me bashkëshorten dhe vajzën.

Mjaft turistë nga vendi fqinj, janë bërë pjesë e auditorit për aktivitetet e shumta që po zhvillohen gjatë këtyre ditëve në Vlorë, mes të cilave edhe ato që organizohen nga Konsullata e Përgjithshme e Italisë, apo Bashkia.

Bregdeti i bukur, çmimet e arsyeshme, infrastruktura e përmirësuar dukshëm dhe hapësira atraktive të tilla, si Lungomare me lokalet e shumta, apo bulevardi i rikonceptuar së fundi, Vlorë-Skelë, përbëjnë disa nga faktorët dhe pikat e forta për treguesit e lartë të këtij sezoni veror, të turistëve të huaj nga Italia, krahas atyre nga vende të tjera.

Për të përballuar këta tregues numerikë në rritje të turistëve të huaj, krahas atyre nga qytete të ndryshme të vendit dhe për të krijuar atmosferë të kënaqshme pushimi, Bashkia dhe strukturat e tjera, po zbatojnë një program të posaçëm masash që janë orientuar në garantimin e standardeve të nevojshme të sigurisë, pastërtisë e qetësisë.

Ndërkohë, në pikën kufitare të portit të Vlorës, është intensifikuar puna dhe është shtuar personeli i nevojshëm për të përballuar fluksin e përpunimit të trageteve.

Aktualisht, funksionojnë 9 sportele, nga të cilat 6 për pasagjerë dhe 3 për automjetet, gjë që garanton standarde të kënaqshme kohore për procedurat e kontrollit dhe parandalon radhët. //atsh

Çdo ditë Vlora vizitohet nga qindra turistë, vendas dhe të huaj dhe vetëm ditën e sotme në ishullin e Sazanit kanë zbritur mbi një mijë.

Kryetari i bashkisë së Vlorës, Dritan Leli thotë se numri i lartë i turistëve kërkon ndërgjegjësim nga ana e qytetarëve për të mbajtur pastër ambientin.

“Vetëm sot në Ishullin e Sazanit kanë zbritur mbi një mijë njerëz. Të paktën ky ka qenë informacioni i fundit që na ka ardhur nga përfaqësuesit dhe operatorët turistikë që operojnë me lëvizjet e turistëve, të cilët kanë shkuar mbrëmë në darkë shumë të shqetësuar për situatën e ndotjes dhe të plehrave që kanë dëmtuar mjedisin në ishull. Ka qenë i menjëhershëm reagimi i punonjësve të bashkisë në bashkëpunim me “Smile Albania”, me atë që duam në fund fare t’i ofrojmë të gjithë turistëve, një buzëqeshje më tepër në një vend ku ka pafund resurse turistike për t’i treguar vizitorëve”, – tha Leli.

Sipas tij, aksioni i pastrimit përkthehet në një standard të ri në shërbimin që u ofrohet turistëve.

“Por, mesa duket situata e krijuar nga vizitorët e shumtë dhe ndonjëherë të papërgjegjshëm dhe me sjellje jo korrekte për sa i përket mbrojtjes së natyrës, ka krijuar një situatë problematike të plehrave dhe ne do të jemi bërë gati të gjithë për të shkuar dhe për t’i dhënë Sazanit sipas kërkesës së operatorëve një aksion pastrimi. Kjo do të jetë fillesa e punës për të pasur një standard tjetër në shërbimin dhe në shërbesat që operatorët turistikë në bashkëpunim me institucionet e tjera të ofrojnë për të gjithë operatorët turistikë dhe të gjithë turistët që vizitojnë Sazanin”, – theksoi ai.

Leli ka ndarë edhe një mesazh për të gjithë qytetarët.

“Mesazhi është shumë i madh. Pasuria që kemi nuk është vetëm e jona, por i takon brezave dhe na takon të gjithëve të jemi qytetarë të përgjegjshëm dhe mbi të gjitha të kujdesemi mbi vlerat e mëdha të natyrës për të cilat nuk u lodhëm aspak, por që duhet t’i ruajmë për t’i shërbyer brezave të tjerë”, – përfundoi ai.

Vlora këtë vit ka pritur fluks turistik ndërkohë që rezervimet e shumta që bënë të huajt një vit më parë, e renditën Vlorën si një nga qytetet më të vizitueshme në vend./atsh

https://www.facebook.com/1638687229694574/videos/815235625544964/?t=0