Problematika

Kryeministri Edi Rama ka apeluar sot biznesit që të mos sprovojë administratën dhe shtetin duke mos punuar rregullisht me faturat përkatëse.

Gjatë një takimi me drejtuesit e Tatimeve, Kryeministri Rama theksoi se, “kemi zgjedhur prej më shumë se 6 muajsh një qasje këshilluese, informuese, edukuese, duke mos preferuar të shkojmë tek hapi i fundit, pa bërë hapat e tjerë”.

Kjo periudhë, theksoi Rama “ka përfunduar dhe besoj që legjislacioni është i qartë dhe masat që legjislacioni parashikon për çdo biznes që nuk punon rregullisht me faturat përkatëse janë të atilla që nuk ja vlen aventura e moslëshimit të faturës”.

“Dihet që nëse nuk lëshon një kupon në një lokal, të mbyllet lokali. Në një njësi tregtare, të mbyllet njësia, për një periudhë që të sjell një dëm të madh”, u shpreh Kryeministri.

“Kështu që ju lutem të gjithëve mos e sprovoni administratën dhe mos e sprovoni shtetin, sepse nuk do tolerohet askush”, – ishte apeli i Kreut të Qeverisë ndaj bizneseve. /atsh

Drejtoria Vendore e Policisë Tiranë vazhdon kontrollet për të goditur paligjshmërinë e aktiviteteve të lojërave të fatit.

Policia e Tiranës ka dërguar për procedim penal 1 shtetas për veprën “Vënia në dispozicion e lokaleve për lojëra të palejuara” dhe “Organizimi i lotarive të palejuara”.

Po ashtu, Policia ka sekuestruar në cilësinë e provës materiale 11 monitorë me tastiera të markave të ndryshme, një njësi kompjuteri dhe një pajisje interneti.

Nga Specialistët për Hetimin e Krimit të Komisariatit të Policisë Nr. 4, filloi procedimi penal në gjendje të lirë për shtetasin: F. Z., 43 vjeç, banues në Tiranë. Gjatë kontrollit të ushtruar në lokalin nën administrimin e shtetasit F. Z në rrugën “Dom Nikoll Marku”, u gjetën 11 monitorë me tastiera të markave të ndryshme, një njësi kompjuteri dhe një pajisje për shpërndarje interneti që shërbenin për të ushtruar veprimtarinë e lojërave të fatit të cilat u sekuestruan në cilësinë e provës materiale.

Gjithashtu, Policia Vendore e Tiranës garanton se kontrolle kundër aktivitetit të paligjshëm të lojërave të fatit, do të vijojnë në të gjithë qarkun e Tiranës,me qëllim parandalimin, evidentimin dhe ndëshkimin e këtij aktiviteti të kundërligjshëm, si dhe fton qytetarët që të denoncojnë në numrin 112 ose përmes aplikacionit “Komisariati Dixhital”, çdo veprimtari të këtillë të kundërligjshme. /atsh

Ndërmarrja e Ujësjellës Kanalizimeve Vlorë po vijon punën intensive për pastrimin e rrjetit të kanalizimeve në qytet dhe jashtë tij.

Punonjësit e kësaj ndërmarrje sot kanë pastruar kanalin te ish-Fabrika e Tullave në rrugën e vjetër nacionale Vlorë-Fier, në lagjen “Kushtrimi”.

Gjatë pastrimit të kanalit janë nxjerrë shumë mbeturina të hedhura në rrjetin e kanalizimeve.

Ujësjellës Kanalizime Vlorë i bën thirrje të gjithë qytetarëve të mos hedhin mbeturina në kanalizime për shkak se krijohen probleme në drejtim të funksionimit të rrjetit.

Gjatë ditës së sotme është realizuar pastrimi edhe i zgarave dhe pusetave në zonën nga “Aleksandria” në Skelë, deri te Palestra “Flamurtari”.

Pjesë e përditshme e kësaj ndërmarrje është edhe reforma e ujit, e cila po vijon me ritme të larta. Gjatë ditës së sotme punonjësit e Ujësjellës Kanalizimeve kanë kryer kontrolle në biznese, në lagjen “Lef Sallata” dhe “Uji i Ftohtë”./atsh

Policia e Shtetit në bashkëpunim me institucione të tjera të ngarkuara me përgjegjësi në kuadër të task – forcës “Për sezonin turistik veror 2019” ka marrë të gjitha masat për garantimin e pushimeve të qeta dhe të sigurta për të gjithë pushuesit në zonat turistike dhe plazhe, ku një ndër më kryesoret është menaxhimi i nivelit të zhurmave në qendrat urbane, zonat turistike dhe ato bregdetare.

Lajmi u bë me dije nga, Drejtori i Departamentit për Sigurinë Publike, Drejtues i Lartë Gjovalin Loka, gjatë një deklarate për mediat të premten. Sipas tij, “nisur nga disa ankesa të ardhura në adresë të Policisë së Shtetit gjatë muajt Qershor 2019, për prishje të qetësisë së pushueseve si pasojë e muzikës së lartë që gjenerojnë lokale të ndryshme, jo vetëm në zonën bregdetare, por edhe në zona të tjera urbane, si dhe në zbatim të porosive të lëna në takimin e fundit nga Kryeministri i vendit dhe Ministri i Brendshëm, me drejtuesit qendrorë dhe vendorë të Policisë, për reagim të menjëhershëm të Policisë së Shtetit lidhur me këtë, Policia e Shtetit ju bën thirrje të gjitha subjekteve që ushtrojë biznes disko, lokale nate, apo me muzikë “LIVE”, që të respektojnë në mënyrë rigoroze kufizimet e orareve dhe të ndotjes akustike në mjedis sipas përcaktimeve të bëra në aktet ligjorë që janë ora 23:00 në ditët e javës dhe ora 24:00 në fundjavë”.

“Vendimi i Këshillit të Ministrave, urdhrat dhe udhëzimet e dala në bazë dhe për zbatim të tij, udhëzimi i fundit i Ministrit të Brendshëm për garantimin e një sezoni turistik të sigurt dhe të qetë, detyron një sërë institucionesh të përfshira në Task – Forcën “Për mbarëvajtjen e sezonit turistik veror 2019”, për bashkërendim të masave për garantimin e rendit, rritjen e parametrave të sigurisë publike dhe menaxhimin e nivelit të zhurmave në qendrat urbane, zonat turistike dhe bregdetare”, tha Loka.

“Me qëllim plotësimin e standardeve për pushime të sigurta dhe të qeta në zonat turistike dhe qendrat e banuara, Policia e Shtetit ka hartuar dhe po zbaton një plan masash të detajuar me detyra sipas strukturave përkatëse, në zbatim të detyrimeve institucionale të përcaktuara në aktet ligjore e nënligjore në lidhje me sezonin turistik veror 2019”, shtoi ai.

“Policia e Shtetit do të ushtrojë kontroll të pandërprerë dhe do të marrë masa të menjëhershme në funksion të shqetësimeve të ngritura nga qytetarët dhe pushuesit në zonat bregdetare e ato urbane, duke ndëshkuar sipas akteve ligjore në fuqi, çdo subjekt që gjeneron zhurmë tej normave të lejuara”, nënvizon Loka.

“Në këtë kuadër, Policia e Shtetit apelon për të gjitha institucionet që kanë detyrime në kuadrin e Task – Forcës, që të ushtrojnë kompetencat e tyre ligjore dhe të marrin masa të menjëhershme për disiplinimin e nivelit të zhurmave, duke iu përgjigjur në kohë shqetësimit të qytetarëve, në të kundërt do të merren masa jo vetëm ndaj subjekteve që krijojnë ndotje akustike, por dhe ndaj përfaqësuesve të institucioneve përgjegjëse, që nuk përmbushin detyrimet”, thekson Drejtori i Departamentit për Sigurinë Publike, Drejtues i Lartë Gjovalin Loka. /atsh