Problematika

Me mbështetjen e UNDP-së, bashkia Himarë organizoi sot trajnimin e antarëve të Ekipit Teknik Ndërdisiplinar të rasteve të dhunës në familje.

12 anëtarë të “ETN” po njihen me kuadrin ligjor të përmirësuar, si dhe po dakordësojnë mbi mënyrën se si do të zbatojnë në praktikë detyrimet dhe përgjegjësitë e tyre, duke vendosur kështu dhe një protokoll të ri bashkëpunimi.

Përveç detyrimeve dhe përgjegjësive për trajtimin e rasteve në mënyrë shumë-disiplinare, theksi u vu dhe në rëndësinë e mbledhjes së të dhënave dhe përditësimit të sistemit elektronit të ngritur për këtë qëllim.

Ky trajnim është pjesë e aktiviteteve të planifikuara nga Bashkia në kuadër të fushatës së 16 ditëve të aktivizimit kundër dhunës me bazë gjinore dhe dhunës në familje.

Trajnimi u organizua nga bashkia Himarë dhe u mbështet nga UNDP Shqipëri, në kuadër të Programit të Përbashkët të Kombeve të Bashkuara, “Për t’i dhënë fund dhunës ndaj grave dhe vajzave”, financuar nga qeveria e Suedisë dhe që po zbatohet nga UNDP, UN Women dhe UNFPA, në bashkëpunim me qeverinë shqiptare./atsh

Qyteti bregdetar i Vlorës është më i prekuri nga moti i keq, ku reshjet e forta, shoqëruar me stuhi dhe shkarkesa atmosferike dëmtuan rrjetin elektrik në disa zona, kryesisht përgjatë bregdetit, por edhe në Lumin e Vlorës.

Si pasojë e motit të keq dhe dallgëzimit në det vijon të jetë i pezulluar edhe lundrimi detar. Trageti i linjës Vlorë-Brindisi edhe sot nuk ka lundruar në drejtim të Vlorës, ndërsa anijet e peshkimit sërish nuk janë lejuar nga Kapiteneria që të dalin në det.

Ndërkohë përsa i përket situatës me qarkullimin rrugor, nuk janë shfaqur probleme.

Prefekti i qarkut të Vlorës, Flamur Mamaj, tha për ATSH-në se “qarkullimi i mjeteve në qafën e Llogarasë ka filluar normalisht që pasditen e djeshme, pas largimit të pemëve nga rruga”.

“Ndërsa ka probleme me shtyllat e tensionit të ulët, për të cilat ka filluar faza e riparimit sot nga OSHEE Vlorë, pasi dje ishte e pamundur ndërhyrja nga moti keq”,- theksoi Mamaj.

Prefekti Mamaj u shpreh se probleme me furnizimin e energjisë ka edhe në disa fshatra të Vlorës, ku punonjësit e OSHEE po ndërhyjnë për normalizimin e situatës pas dëmeve nga moti i keq.

Sipas OSHEE, konkretisht në Nartë, rrëzuar shtylla, në Himarë është stakuar fideri 1, në Dhërmi te pedonalja është shembur një kabinë (pranë Havana), Qeparoi dhe Kudhës janë pa dritat pas dëmtimit të fiderit 6 pranë Porto Palermos, në në Rradhimë është shkëputur përcjellësi Tm, pjesë e fiderit 2, kurse në Selenicë kemi probleme në kabinën “Resulaj”, gjithashtu fshatrat Bolene dhe Vranisht.

Aktualisht brigadat e avarive OSHEE Vlorë pasi morën masat tekniko-organizative janë shpërndarë në zonat e prekura, ku në disa akse është duke u punuar, në kushte aspak të favorshme moti./atsh

Kryetari i Komisionit të Ekonomisë dhe Financave, Arben Ahmetaj deklaroi të hënën se siguria ushqimore është e panegociueshme, ndërsa i kërkoi Kuvendit të mos miratojë p/ligjin për faljen e gjobave të vendosura nga Autoriteti Kombëtar i Ushqimit ndaj operatorëve të biznesit ushqimor.

Qëllimi i projektligjit është lehtësimi i barrës së operatorëve ekonomike që kanë aktivitet kryesor prodhimin, përpunimin dhe shpërndarjen me shumicë të ushqimeve si dhe shitjen me shumicë të prodhimeve shtazore, të cilët janë gjobitur nga AKU-ja pasi nuk kanë qenë të licencuar për ushtrimin e aktivitetit në momentin e kryerjes së kontrollit, por që aktualisht janë pajisur me licencën përkatëse, sipas legjislacionit të licencimit.

Por kreu i Komisionit të Ekonomisë, Ahmetaj tha se bëhet fjalë për gjoba të nisura në periudhën korrik-shtator që përkon edhe me nisjen e planit operacional kundër informalitetit, fokusuar gjithashtu në sigurinë ushqimore dhe siguria ushqimore nuk ka çmim, nuk ka as të paditur ndaj dhe ligji parashikon nivele të tilla gjobash që shkojnë deri në 2 milion lekë..

Po ashtu sipas Ahmetajt, p/ligji nuk siguron trajtimin e barabartë të individëve që janë në kushte të barabarta, vlerësohet se është në kushtet e cenimit të parimit të barazisë dhe mosdiskriminimit.

Ndërsa lidhur me argumentin se këto biznese nuk njihnin ligjin, Ahmetaj tha se nuk mund të justifikosh një sipërmarrje se nuk e njeh ligjin. “Po t’i referohemi vendimit të vitit 2009 në aspektin e licencimit nuk ka ndryshuar asgjë. Nuk ka arsye që sipërmarrjet të mos njohin detyrimin ligjor për licencim”, tha Ahmetaj.

Përfaqësuesit e Ministrisë së Bujqësisë dhe Zhvillimit, vijoi Ahmetaj, e kundërshtuan gjithashtu p/ligjin e propozuar dhe argumentuan se veprimtaria e AKU është kryer në mbështetje të plotë të dispozitave ligjore dhe rregullatore në fuqi./atsh

Kryeministri Edi Rama, iu ka uruar qytetarëve shqiptarë “Mirëmëngjes”, duke kujtuar nismën e qeverisë “Qesja e Fundit”, që do ta përfshijë Shqipërinë në hartën e vendeve në Europë pa qese plastike deri më 1 qershor 2020

“Dhe me aksionin “Qesja e fundit” me mision refuzimin e përdorimit të qeseve plastike, një nismë që do ta vendosë Shqipërinë në hartën e vendeve lider në Europë pa qese plastike deri më 1 qershor 2020, ju uroj një të dielë të bukur”-, theksoi kryeministri Edi Rama.

Kryeministri ka sjellë në vëmendje videon sensibilizuese të delegacionit të Bashkimit Europian ku apelohet për rëndësinë e mospërdorimit të qeses plastike, si një nga elementët që dëmton më së shumti ekosistemin ku jetojmë.

Nisma që po konsultohet gjerësisht në një komunikim të gjerë me të rinj, akademikë, shoqëri civile e grupe interesi, ka si synimin e eliminimit tërësor të plastikës njëpërdorimëshe, pranverën e vitit të ardhshëm. /atsh

Prej 10 vitesh Laze Duçellari nga Tirana kërkonte legalizimin e banesës së tij, por pa mundur të marrë zgjidhje. Ai vendosi t’i drejtohej platformës së bashkëqeverisjes shqiperiaqeduam.al dhe brenda 20 ditësh mori në dorë lejen e legalizimit.

Kryeministri Edi Rama solli sot në vëmendje rastin e familjes Duçellari nga Tirana, që dëshmon edhe një herë tjetër funksionimin me sukses të platformës së bashkëqeverisjes.

“Mirëmëngjes dhe me rastin e Lazes nga Tirana, i cili pasi e shkroi problemin e tij te shqiperiaqeduam.al, vetëm në 20 ditë mori legalizimin e shtëpisë që e priste prej 10 vitesh, ju uroj një fundjavë të bukur”, tha Rama.

Prej 10 vitesh familja Duçellari në njësinë nr. 6 në kryeqytet, kishte futur në procedurë legalizimi dy kate të banesës së saj, por nuk kishte marrë ende një përgjigje.

“Banesën e kam ndërtuar në vitin 2000 dhe në 2008 kam filluar procedurën e legalizimit. Vajti gati 10 vjet që jam marrë me këtë problem dhe nuk marr zgjidhje. Kam vajtur pa fund në zyra dhe kam bërë të njëjtat letra dhjetra herë. Shpenzim kohe dhe parash”, tha Duçellari.

Edhe pse i kishte bërë të gjitha procedurat dhe pagesat e duhura, ai ende nuk kishte marrë asnjë përgjigje.

Kryefamiljari vendosi t’i drejtohej platformës së bashkëqeverisjes dhe çdo gjë u zgjidh në kohën e duhur. “Mbas 20 ditësh më njoftuan dhe tërhoqa dokumentet e legalizimit”, tha ai./atsh

Drejtoria Rajonale e Autoritet Kombëtar të Ushqimit (AKU) Fier bëri të ditur sot, se ditën e enjte ka kryer 13 kontrolle zyrtare tek Operatorët e Biznesit Ushqimor (me origjinë shtazore, joshtazore dhe produktet e mbrojtjes së bimëve) dhe për shkeljet e konstatuara vendosi 3 masa administrative “gjobë” me vlerë 300.000 lekë, për tregtim të produktit mish pa vulë dhe pa certifikatë veterinare.

Gjithashtu njofton AKU, janë vendosur 4 masa administrative “Paralajmërim” si dhe është lënë detyra e korrigjimit të mangësive të konstatuara; Janë marrë 4 mostra për kryerjen e 4 analizave laboratorike dhe është vendosur masa administrative “Bllokim Produkti” për 21 kg mish (viçi dhe qengji) i konstatuar i pasigurt për konsum human.

AKU në sajë të monitorimeve rigoroze të kryera për çdo ditë garanton të gjithë konsumatorët për sigurinë e produkteve të cilat konsumojnë dhe fton që bashkërisht të bëhemi edhe më të fortë nëpërmjet rubrikës “Denonco”./atsh

Autoriteti Kombëtar i Ushqimit (AKU) në vijim të kontrolleve të njëpasnjëshme në të gjithë vendin, në kuadër të planit të monitorimit dhe informacionit të ardhur në platformën e komunikimit me qytetarët, ka ushtruar një sërë kontrollesh tek Operatorët e Biznesit Ushqimor me qëllim garantimin e sigurisë ushqimore dhe mbrojtjen e shëndetit të konsumatorëve.

AKU bën të ditur se Drejtoria Rajonale e AKU Berat gjatë këtyre ditëve (04-05 nëntor) ka kryer 17 kontrolle në operatorët e biznesit ushqimor (me origjinë shtazore, joshtazore dhe produktet e mbrojtjes së bimëve) dhe për shkeljet e evidentuara ka vendosur 1 masë administrative “Gjobë” me vlerë 50.000 lekë në total, 8 masa administrative “Paralajmërim” për korrigjim të mangësive të konstatuara dhe ka bllokuar 284,79 litra pije joalkoolike të konstatuara të pasigurta për konsum human.

Siguria ushqimore është sfidë e përbashkët për mbrojtjen e shëndetit dhe interesit të përbashkët, ndaj AKU krahas punës së pandalur të saj, fton të gjithë konsumatorët që të bëhen pjesë e këtij qëllimi nëpërmjet rubrikës “Denonco”./atsh