Problematika

“Ne jemi nga ato pak vende që kanë shkuar deri në fund me marrjen e masave, mund të bëjmë edhe ndonjë shtrëngim tjetër, por përgjithësisht nëse e zbatojmë kuadrin e masave që kemi sot ne do t’ia hedhim pa shumë vuajtje dhe pa shumë humbje jete”, tha sot kryeministri Edi Rama.

Në një intervistë televizive, Rama tha se “ka një model statistikor të ndërtuar bazuar në trajektoren e vendeve pas 20 infektimeve të para”. “Nëse shohim atë model statistikor ne jemi shumë më mirë se sa shumë vende të tjera sepse i kemi marrë masat më shpejt dhe përgjithësisht dhe po i respektojmë ato”, tha Rama.

Duhet ta themi këtë, vijoi kryeministri, duke shtuar se “ka një lloj alarmi që nuk është i pavend por po ashtu është edhe pak i ekzagjeruar, pasi shkeljet që ndodhin dhe parregullsitë në sjellje na acarojnë të gjithëve, por janë minimale me ato që po bëjnë shumica e popullsisë”.

“Një rast në treg apo disa raste ecje në rrugë bashkë mirë është të eliminohen plotësisht por nuk janë një arsye të themi se ne po dështojmë në aplikimin e masave si popull. Ne po bëjmë gjithçka të mirë por duhet të shtrëngohemi çdo orë e më shumë nëse nuk duam të numërojmë qindra të vdekur në mos mijëra. Kjo është e mundur të ndodhë nëse ne nuk jemi të vetëdijshëm që secili të bëjë luftën e vet dhe të kemi humbje sa më minimale”, tha Rama.

Rama tha se “ne bazohemi në modelin e ndërtuar në algoritmet e përdorura nga vendet e tjera”. “E kemi prezantuar disa herë atë kurbën e famshme që është diçka që na bashkon me të gjitha eksperiencat dhje bazohet në një fakt shumë të thjesht: virusi do të përhapet, pra asnjë gjë nuk e ndalon virusin të bëjë të vetën dhe të prekë shumicën prej nesh, por masat shtrënguese ngadalësojnë përhapjen e tij dhe i japin mundësi sistemit shëndetësor që të kurojë ata që preken më rëndë”, tha Rama.

Rama tha se “ne e dimë shumë mirë se 80% që do të preken nuk do të kenë shenjë, por ne duhet t’u japim shansin atyre që do të luftojnë me vdekjen në krevat në spital që të marrin shërbimin e duhur”.

“Duhet të rrimë sa më shumë mbyllur në shtëpi dhe të zbatojmë të gjitha rregullat që janë të thjeshta sepse nuk kemi asnjë armë tjetër. Java që kemi hyrë është e parashikuar. Nuk kemi hedhur fall por është algoritëm bazuar në modelin statistikor të përbotshëm që e përdor çdo vend. Kjo është javë shumë e vështirë, por edhe vendimtare bashkë me 1 apo 2 javët e tjera që e pasojnë për të mos e lejuar që numrat të shkojnë në stratosferë që pastaj të jemi të detyruar të shkojnë në katastrofë”, tha Rama./atsh

“Masat shtrënguese janë të domosdoshme për ngadalësimin e përhapjes së COVID-19”, tha sot kryetari i PD-së Lulzim Basha në një intervistë televizive, ndërsa theksoi se duhen marrë masa për kujdesin social, për njerëzit në moshë, për njerëzit e sëmurë, për ata në pamundësi ekonomike.

Pyetjes si e vlerësoni situatën dhe masat shtrënguese të marra nga qeveria në kuadër të mospërhapjes së COVID-2019, Basha tha se “rreziku që u kanoset shqiptarëve është në fakt një rrezik zinxhir. Fillon me përballimin e pandemisë, ku masa kryesore është distancimi social, të cilën padyshim e kemi mbështetur, e kemi kërkuar shumë më përpara. Më mirë vonë se sa kurrë. Nuk dua të bëj sot asnjë aludim për një debat politik, sepse sot nuk është një çështje midis meje dhe zotit Rama apo mes opozitës dhe qeverisë”.

“Sot çështja kryesore dhe e vetme që më preokupon mua, PD dhe opozitën, është shëndeti, siguria, është mirëqenia e shqiptarëve. Mënyra më e mirë e njohur deri tani është distancimi social, kufizimi i aktiviteteve në grup, por padyshim ky është fillimi i një zinxhiri pasojash, sepse kjo shkakton pasoja në ekonominë e vendit në tërësi dhe në ekonominë individuale të familjeve. Atë që jemi përpjekur këto ditë të bëjmë, është të fokusohemi në dy drejtime kryesore: shëndetin që nis me personelin shëndetësor, ku siguria e tyre është kyçe për të garantuar sigurinë e popullsisë. Mbrojtja e tyre është shumë e rëndësishme për mbrojtjen e të gjithëve pastaj. Komponenti i dytë është ekonomia për të zbutur sadopak pasojat në menaxhimin e ekonomisë”, tha ai.

Në lidhje me pyetjen se a janë të mjaftueshme masat shtrënguese të marra nga qeveria, Basha tha: “Qëndrimin tonë e kemi shprehur. Ne besojmë se ato ndërmarrje ku distancimi social është i pamundur apo i vështirë, duhet të procedohet me mbylljen e tyre.

“Ky nuk është vetëm konkluzion i ekspertëve tanë, por është edhe një kërkesë e përfaqësuesve të këtyre bizneseve, me të cilët kam qenë në kontakt gjatë gjithë kësaj kohe. Me përfaqësues të biznesit fason, call center, dhomat e tregtisë, ku ka një shqetësim të madh për pamundësinë reale të distancimit social atje. Mbyllja e tyre ka qenë një nga kërkesat që ne e kemi mbështetur. Përkundër masave shtrënguese, frikësuese apo represive, nganjëherë edhe kontradiktore, për të cilat ne do të kërkojmë llogari, por jo sot, në kohën e duhur, sepse sot nuk është koha për të treguar me gisht. Masat që kërkojmë ne janë masa përmbajtësore, jo në formë, janë masa zgjidhje dhe menaxhimi”, tha ai.

Po ashtu Basha thekson se “filozofia jonë është zgjidhja – menaxhimi i krizës, nuk është propaganda. Këtu spikasin propozimet tona për kujdesin social, për njerëzit në moshë, për njerëzit e sëmurë, për ata në pamundësi ekonomike. Propozimet tona për kujdesin shëndetësor dhe kujdesin ekonomik, sepse zinxhiri i rrezikut nis me shëndetësinë dhe i përcillet ekonomisë, ekonomisë kombëtare dhe asaj familjare”./atsh

Kryeministri Edi Rama u bëri apel sot qytetarëve që të shmangin çdo dalje që nuk është bazike dhe e domosdoshme, ndërsa theksoi se nuk është koha për të dalë xhiro, për të bërë shëtitje dhe marrë diell duke lëvizur në rrugë, por është koha për të kufizuar maksimalisht edhe lirinë e lëvizjes në këmbë.

Në një lidhje direkte me një studio televizive, Rama tha se “është e rëndësishme që të mos e harrojmë se virusi nuk përhapet nga ajri në kuptimin e mungesës së kontakteve, por përhapet nga kontaktet dhe ekspertët u këshillojnë qeverive që të bëjnë sa më shumë për t’iu shpjeguar njerëzve që nëse dalin në këmbë të ruajnë distancën dhe të mos prekin fytyrën me duar”.

“Do të ishte ideale të pengohej dalja e këmbësorëve deri në fund të ditës, por njerëzit duhet të dalin për të bërë pazaret dhe këtu askush, askund, as në Kinë, ku faktikisht është vendosur regjimi më rigoroz dhe është pak a shumë i njëjti regjim si sot në Shqipëri, me ndonjë përjashtim, nuk është ndaluar lëvizja e këmbësorëve për të bërë ato gjëra të zakonshme që janë jetike, si blerja e ushqimeve, ilaçeve apo ndonjë veprim tjetër i domosdoshëm”.

Rama tha se “nuk është qeveria dhe asnjë në botë që ndalon lëvizjen e këmbësorëve në 24 orë”. “Mund ta kufizoj por çdokush duhet të bëjë të vetëm. Kjo është një luftë që zhvillohet në front ku çdo qytetar ka segmentin e vetë dhe secili duhet të jetë në kuptimin e vërtetë të fjalës policia e vetvetes”, tha Rama./atsh