“Rritja e të infektuarve në vendin tonë ka ardhur për shkak të mosrespektimit të protokollit të sigurisë”.
Kështu u shpreh Mira Rakacolli, zv.ministrja e Shëndetësisë dhe Mbrojtjes Sociale gjatë një interviste televizive mbrëmjen e sotme.
Ajo tha se, “në vendin tonë vetëm 1% e mjekëve janë prekur nga COVID-19, teksa është shumë e rëndësishme të theksohet se asnjë prej mjekëve që është në frontin e parë të betejës me COVID-19 nuk është prekur nga koronavirusi i ri”.
“Rritja e numrit të rasteve në kushtet e hapjes është e pritshme dhe e parashikuar. Është një fenomen që po ndodh në mbarë botën, ashtu si dhe në vendet e rajonit. Duke patur parasysh shifrat që kishim ne në fazën e mbylljes, ishin shumë më të mira në krahasim me vendet e tjera. Në shpejtësinë e përhapjes ka qenë ajo që nuk u respektuan protokollet e sigurisë. Nëse në fillim shqiptarët zbatuan me përpikëmëri gjithçka që thanë ekspertët, në fazën e dytë u duk sikur gjithçka mbaroi. Ato sektorë të cilët u hapën, nuk respektuan rregullat e protokollet antiCOVID. Çdo kush që na ndjek nga shtëpia, mjafton të shkoj në kafe e bare e në lagje e shikon se sa afër janë mes tyre qytetarët nëpër lokale, pa maska etj.”, -tha Rakacolli.
“Vatrat kanë lindur kudo ku nuk janë respektuar rregullat. Edhe brenda studiove televizive etj. Ky është fakti i rritjes së shpejtë, pasi rritja pritej, por shpejtësia ka si faktorë këtë që sapo thashë. Duhet ta shohim këtu këtë defekt, sepse ne nuk po bëjmë atë që po kërkohet. Që të hysh në një supermarket duhet që patjetër ta vendosësh maskën. Numrat e arritur në fillim të pandemisë ishin meritë e zbatimit dhe respektimit të masave. Ne tanimë nuk po bëjmë atë që kërkohet.”,- tha Rakacolli.
“Ne kemi thënë që duhet të rrish më shumë 15 minuta me një person të infektuar për ta marrë dhe nuk mund të komentoj mbi disa fotografi që janë marrë me disa sekonda. Sa i përket maskave ato duhet mbajtur, asaj i qëndroj, kudo ku kemi afrimitet, sidomos kur jemi në ambiente të mbyllura. Është në ndërgjegjen e njerëzve që t’i zbatojnë këto masa.”,- u shpreh Rakacolli.
“Ministrja e Shëndetësisë e tha sot, aj që është e rëndësishme është që numri testeve është bërë i mjaftueshëm për të kontrolluar situatën. Ky është vlerësim i Komitetit të Ekspertëve. Ato janë të gjithë specialist, me tituj akademik e kanë dhënë prova në profesionin e tyre dhe në artikulimin e strategjive për tu përballur më këtë sfidë.”,- tha Rakacolli.
“Testimet po shtohen, është arritur të bëhen 463 testime në ditë. Strategjia është dinamike në varësi të situatës. Rëndësi ka izolimi i kontaktit dhe monitorimi i tij. Bërja e testit nuk është 100% i sigurt, pasi jo gjithnjë del e saktë përgjigja, mund të dalë negativë dhe kur je pozitivë. Duhet një hetim epidemiologjik, pasi qytetarët pyeten sa kohë kanë qëndruar me kontaktin pozitivë, sa herë e kanë takuar dhe shumë detaje të tjera dhe qëllimi i testimit është për të ndërprerë shpërndarjen e COVID-19. Që të futet laboratori privat, duhet të ketë laborator të certifikuar dhe në dijeninë time, nga OBSH i vetmi laborator është i ISHP dhe shumë shpejt do nisi dhe ai i Qendrës Spitalore “Nënë Tereza””,- tha Rakacolli.
“Nuk ka mbyllje të reparteve shëndetësore, përkundrazi. Në varësi të situatës, në dispozicion të sëmurëve me COVID-19 janë parashikuar 550 shtretër, momentalisht nuk janë zënë as 20%. Të gjitha paratë e parashikuara për pandeminë kanë shkuar tek pandemia. Unë nuk mund të flas për shifra, por e them me përgjegjësi që energjitë dhe paratë e paracaktuara kanë shkuar në drejtim të infrastrukturës për tu përballur me pandeminë COVID-19. Mjekët nuk janë në një pjesë të madhe të prekur, 1% e gjithë personelit shëndetësorë janë të prekur. Ata që përballen përditë me COVID-19 nuk ka asnjë të prekur. Të gjithë mjekët i kanë mjetet mbrojtëse pas asnjë kursim”,- tha Rakacolli.
“Çfarë do të kishim bërë po të mos ishin rrugët e ndërtuara, ambulancat me kushtet modern, pra çdo investim është tejet i rëndësishëm për këtë çështje. Për hapjen e transportit ka qenë një temë mjaft e diskutuar në Komitetin e Ekspertëve tanë. Ishte parashikuar për tu hapur më parë, por ne e shtymë hapjen e transportit publik, por duke parë njëlloj stabiliteti, nuk ka pasur rritje, duke ndjekur strategjinë e paracaktuar. Këto dy javë shifrat kanë qenë në atë mesatare. Nuk ka pasur rritje. Virusi prek në përgjithësi moshat e vjetra, dhe ata që janë me sëmundje kronike. Mosha mesatare ka qenë rreth 60-vjeç, sot është 45-vjeç, pasi ato që po preken më shumë janë të rinj, pasi të moshuarit, por ruhen, dalin me maska, pra janë tejet rigoroz në respektimin e masave të sigurisë, ndryshe ndodh me të rinjtë që bëjnë jetën sociale.”,- tha Rakacolli.
“Infeksionet spitalore janë infeksione që kanë ndodhur në të gjithë botën, nuk është fenomen i veçantë. Gjërat duhen parë me objektivitet. Në qendrën spitalore Universitare “Nënë Tereza” ka 53 shërbime, 58 shërbime dhe me ato jo universitare. Vetëm në dy shërbime, hematologjisë dhe mjekësisë interne patën probleme dhe vatra, por janë mbyllur dhe kanë nisur funksionin normal.”,- përfundoi Rakacolli. /atsh
