Politike

Botuesi i “Koha Jonë” Nikollë Lesi sfidon hapur bashkëpunëtorët e tij të hershëm.

Përmes një artikulli në të cilin flet për lirinë e medias dhe protestën e sotme të zhvilluar kundër qeverisë për marrëveshjen e detit, Lesi shprehet se Aleksandër Frangaj, Blendi Fevziu, Andi Bushati, Frrok Çupi, Lorenc Vangjeli, apo të tjerë gazetarë kanë qenë më të lirë kur punonin me të.

Kurse sot, shkruan Lesi, thuajse asnjë media nuk ka transmetuar asnjë moment nga protesta e paradites kundër qeverisë.

Më poshtë keni artikullin e Nikollë Lesit:

Kjo që ka ndodhur sot, nuk ka ndodhur në 27 vite pluralizëm dhe demokraci. E habitshme se si një protestë e shoqërisë civile, e nisur thjesht nga rrjetet sociale në fillim e më pas shkoi zinxhir lajmi në Facebook-un e gjithsecilit, të cilët sipas mënyrës së tyre organizuan një protestë para zyrës së kryeministrit Rama. Asnjë televizion nuk e transmetoi live apo edhe me ndonjë titër lajmin e protestës, përveç një televizioni të ri Faxneës.

Motivi i protestuesve ishte, sipas asaj çka thanë se nuk janë dakord me bisedimet e qeverisë shqiptare për faljen e detit me 12 milje, siç edhe thuhet nga mediat greke dhe ministri grek Kotzias. Edhe në vitin 2009 vendimi i Berisha-Basha ishte i gabuar, por fatmirësisht ishte Gjykata Kushtetuese e cila mbrojti sovranitetin e kufijve.

Personalisht unë nuk dua të besoj se ministri i jashtëm shqiptar Ditmir Bushati, e aq me shumë kryeministri Rama, të bënin një gafë të madhe historike në faljen e detit, Greqisë. Do të ishte vërtetë një tradhti e madhe kombëtare, nëse arrihet të firmoset në ato kushte skandaloze siç bën presion Greqia për një vote greke për dhënien e statusit Shqipërisë për në BE.

E theksoj, jo për kompromis me vetveten, se nuk dua ta besoj se mund të bëhet fakt falja e detit. Por kjo nuk do të thotë se politika, shoqëria civile dhe media nuk duhet të kërkojnë të vërtetën e bisedimeve dhe ta ndalojmë nëse ka ndonjë projekt me laps, akoma të pa firmosur.

PS dhe qeveria thonë se nuk flitet për këto pazare me integritetin e kufijve shtetërorë, PD-LSI akuzojnë dhe duan sqarime në parlament, media pyet, kurse shoqëria shqiptare është e traumatizuar dhe reagon nëse Greqia dikton kushtet diskriminuese për hir të një vote në BE.

Por çka më shqetëson mbetet liria e medias sot në Shqipëri. Nuk mund të mos kujtoj të rinjve të sotëm se jam një prej atyre dhjetra gazetarëve të gazetës së parë të lirë “Koha Jone” që kam sakrifikuar për median e lirë dhe fjalën e lirë. Dëshmitarët dhe bashkëpunëtorët e mi për këtë liri në vitet 1991-1997, edhe më vonë, janë shumë si Frrok Çupi, Aleksandër Frangaj, Martin Leka, Armand Shkullaku, Blendi Fevziu, Ben Blushi, Marash Mirashi, Lorenc Vangjeli, Teodor Keko, Andi Bushati, Andi Bejtja, Alfred Peza, Enton Abilekaj, Henri Çili, Zamir Dule, Arta Marku, Jonila Godole, Rudina Xhunga, Skender Minxhozi, Aleksandër Çipa, Edi Rama, Fatos Lubonja, Kiço Blushi, Sokol Balla, Arian Çani, Ilir Babaramo, Anila Basha, Adriatik Dosti, Ilir Gjoni, Mimoza Dervishi, Gent Shkullaku, Vladimir Prela, Edmond Laçi, Fatmir Meneri, Enkel Dëmi, Alfons Zeneli e plot të tjerë, të cilët janë gdhendur në memorien e qytetarëve, pasi për një lajm udhëtonin me orë të tëra për t’ia sjellë lexuesit dhe qytetarit. Edhe janë rrahur, edhe gjakosur si Alfred Peza e Aleksandër Çipa për të sjellë lajmin. Janë burgosur Aleksandër Frangaj dhe Martin Leka për t’i dhënë lajmin qytetarit, sepse lajmi fshihej nëpër skutat e pushtetit. Eshtë masakruar Zamir Dule për lajmin. Është djegur redaksia e gazetës “Koha Jone” nga pushteti i Berishës në mars 1997 për të mos shkuar te lexuesi fjala, lajmi.

Por ç’pashë sot pas 27 viteve nga koha e “Koha Jone”? Thjesht për një protestë paqësore të disa pjesëtarëve të shoqërisë civile, para zyrës së kryeministrit, nuk u fut asnjë lajm, jo vetëm live, por as me titra në televizione. Nuk them se jam dakord me ato çka thanë disa pjesëtarë të protestës, por ishte lajm dhe lajmi shpërndahet për te lexuesi dhe shikuesi.  Bile me disa folës nuk jam aspak dakord. Por asnjë lajm, as me titra, nuk dhanë asnjë televizion kryesorë në vend. Jepej fjala vjen në TV, paralel me protestën, se në iks fshat kishte rënë ujku në vathën e një bariu, por kurrë një lajm se po zhvillohej një protestë para kryeministrisë.

Protesta ishte lajm dhe lajmi nuk u dha! Kjo është për të kuptuar se si kryeministri Rama ka uzurpuar mediat dhe në mos i kontrollon, i miklon me leje ndërtimi, koncesione, pazare, etj.

Ishte sot një test që flet shumë. Edhe për dy ambasadorët Lu dhe Vlahutin. Edhe për ne të gjithë, si qytetarë.

Kreu i Partisë “Zgjidhja” dhe ish-miku i afërt i Kryeministrit Edi Rama, Koço Kokëdhima akuzon Edi Ramën se po dëmton interesat e Shqipërisë me marrëveshjen e detit me Greqinë. Në një reagim publik, Kokëdhima shprehet se Edi Rama duhet të bëjë publike gjithë bisedimet me palën greke. Ai paralajmëron se nëse Rama cënon qoftë edhe një centimetër nga territori shqiptar do të ketë fatin e Esat Pashë Toptanit. Deklarata e Kokëdhimës është një kërcënim i hapur dhe i paprecedentë. Kujtojmë se Esat Pashë Toptani u akuzua për shitje të territoreve të Shqipërisë dhe u vra nga Avni Rustemi.

Kjo thënie publike e Koço Kokëdhimës ka nevojë të merret seriozisht në konsideratë nga Policia e Shtetit, sepse ka kërcënuar me vrasje kryeministrin e vendit, Edi Rama.

Deklarata e plotë e Koço Kokëdhimës:

Edi Rama, edhe në politikën e jashtme dhe për çështje madhore kombëtare, po vazhdon të bëjë atë që di të bëjë më mirë; pazare të fshehta dhe pa u konsultuar me askënd, sikur ta ketë Shqipërinë çifligun e tij. Ajo që po ndodh së fundmi mes vendit tonë dhe Greqisë është një turp dhe papërgjegjshmëri totale, e kësaj qeverie. Që nga takimi 3 ditor (10-12 Nëntor 2017) i Kretës “kokë më kokë”, mes ministrave të Jashtëm Ditmir Bushati dhe Niko Kotzias dhe deri te ai më i fundit i Korçës, shqiptarët po mësojnë se për çfarë është biseduar e vendosur, vetëm nga pala greke dhe mediat e tyre. Kështu ndodhi me çështjen e kërkimeve dhe varrezat e ushtarëve grekë, njësoj po ndodh edhe me çështjen e detit.
ZGJIDHJA e paralajmëron qeverinë se po luan me zjarrin! Urgjentisht duhet të bëjë publike të gjitha detajet rreth bisedimeve me Greqinë dhe çfarë ka ndërmend të firmosë Edi Rama me kryeministrin Tsipras, në takimin e paracaktuar këtë pranverë.
Qytetarët shqiptarë, parlamenti, presidenti dhe të gjithë faktorët politikë në vend janë në errësirë të plotë. Edi Rama po sillet me çështjet fondamentale të Shqipërisë, si me plaçkën e gjetur në rrugën e pushtetit të tyre. Urgjentisht, edhe sipas kushtetutës, ata duhet të bëjnë transparencë të plotë për këtë “marrëveshje historike me Greqinë”, siç e quan Rama; Për kufirin detar, për çështjen çame dhe për çfarëdolloj gjëje tjetër që është biseduar, apo është lënë në “harresë”.
Ministri grek i jashtëm, Niko Kotzia deklaroi se territori grek, në marrëveshjen me Shqipërinë, është zgjeruar 12 milje nga bregu.
Në çdo rast nuk është kryeministri dhe ministri i jashtëm që llogarit miljet dhe kufijtë detarë. Janë ekspertët dhe institucionet e shtetit që e bëjnë këtë gjë, përmes komisioneve shtetërore dypalëshe e më vete, sipas rregullave, ligjeve dhe procedurave ndërkombëtare të mirëpranuara.
Nëse kjo qeveri do dëmtojë qoftë edhe një milimetër hapësirat detare dhe tokësore të Republikës së Shqipërisë, Edi Rama do jetë Esat Pashë Toptani i ditëve tona dhe do të ketë fatin e Esat Pashë Toptanit!
Kryetarja e Komisionit të Jashtëm në Kuvend, Mimi Kodheli, u deklaroi gazetarëve se nuk dinte asgjë rreth kësaj teme dhe mund të pyesnin Ditmir Bushatin. Të njëjtën gjë konfirmuan edhe të gjithë deputetët e shumicës!
Pra duket hapur, se kemi të bëjmë me një pazar të Edi Ramës, në përpjekje për të siguruar votën e Greqisë në procesin e hapjes së negociatave me BE-në, i duhet një “po” së shpejti, sepse e sheh si të vetmen mënyrë për të mbuluar zullumin kriminal dhe korruptiv që ka gatuar brenda vendit.
ZGJDHJA e paralajmëron Edi Ramën në emër të shumicës së popullit shqiptar të papërfaqësuar në parlamentin e partive të vjetra, të mos guxojë të lëshojë sovranitetin e Shqipërisë për asnjë arsye. Në Europë duhet të shkojmë vetëm në një mënyrë; me dinjitet dhe si një vend me sovranitet të plotë.
“Zgjidhja” i bën thirrje presidentit Ilir Meta, që, ashtu siç e parashikon edhe Kushtetuta, të kërkojë urgjentisht nga kryeministri dhe ministri i Jashtëm, dosjen e plotë të bisedimeve me Greqinë. Ta bëjë atë transparente dhe objekt diskutimesh për specialistët dhe ekspertët e fushave përkatëse. Gjithashtu i kujtojmë opozitës parlamentare, të thërrasë urgjentisht në parlament kryeministrin, për të zbuluar se çfarë ka ndërmend të firmosë me kryeministrin e Greqisë së shpejti.