Politike

Ngjyra dhe modë, politikanët nuk dalin nga kornizat e tyre të veshjes

Leave a Comment / Politike / /

Veshja konsiderohet si një formë e të shprehurit të vetvetes. Të gjithë përpiqemi të shprehemi sa më mirë dhe duke ruajtur identitetin tonë, i cili na diferencon nga të tjerët.

Edhe në botën e politikës, ku kodi përcakton qartë korzinat e veshjes, disa politikanë zgjedhin t’i shtojnë disa “ngjyra”, duke pasqyruar identitetin e tyre unik.

Presidenti i Republikës, Ilir Meta, për shkak të detyrës i duhet të vesh gjithmonë kostume. Por, ai zgjedh shpesh kostumet me ngjyrë blu dhe herë me kuadrate.

Kryeministri, Edi Rama, njihet për atletet e preferuara “Adidas”, të cilat i kombinon edhe me kostumin zyrtar. Por, të preferuarat e tij janë gjithashtu edhe pantallonat “Yamamoto”.

Kryetari i PD-së, Lulzim Basha, nuk njihet për ndonjë veshje apo ngjyrë të preferuar. Por, ai shpesh preferon xhaketat me këmisha, duke hequr dorë nga kollarja zyrtare.

Kryetarja e LRI-së, Monika Kryemadhi, preferon ngjyrën e kuqe. E shohim shpesh me xhaketa, fustane apo pallto të kuqe.

Ngjyrën e kuqe dhe atë vishnje e preferon edhe deputetja e PD-së, Grida Duma. Teksa pëlqen të shtojë si aksesorë rripin në bel.

Gjergj Bojaxhi, ish-kryetari i SFIDA, preferon gjithmonë këmisha. Shpesh ato janë ngjyrë të bardhë por gjithashtu ai pëlqen edhe nuancat e blusë.

Ministrja e Kulturës, Mirela Kumbaro, pëlqen të vishet shpesh me pantallona. Ato mund të jenë të ngjyrave dhe prerjeve të ndryshme, apo shpesh edhe kostum.

Ministrja e Mbrojtjes, Olta Xhaçka,  pëlqen shumë xhaketat dhe sidomos ato ngjyrë të zezë. Me zinxhir, perçina apo butona, ato mbeten të preferuarat e saj.

Ngjyra dhe modë, politikanët nuk dalin nga kornizat e tyre të veshjes Read More »

Kriza në PD, Selami: Basha i dështuar, Berisha jo…

Leave a Comment / Opinione, Politike / /

Ish-deputeti i PD-së dhe një ndër themeluesit e kësaj force, Eduart Selami është rikthyer në debatin publik tek demokratët.

Në një shënim të shkurtër në Twitter, Selami shkruan se Basha është i dështuar, ndërsa Berisha nuk është zgjidhja që duhet sot për PD-në. Selami shton se zgjidhja e vetme për PD-në është reformimimi mbi vlerat demokratike.

“Basha është i dështuar, Berisha nuk është zgjidhja, PD duhet reformuar mbi vlera demokratike”, shkruan Selami nga SHBA-ja.

Selami kandidoi përballë Bashës në zgjedhjet për kreun e PD-së, duke marrë pas një rezultat negativ, me një humbje fatale.

Kriza në PD, Selami: Basha i dështuar, Berisha jo… Read More »

Ministri Xhafaj në Uashington, Edi Rama në Stamboll

Leave a Comment / Aktualitet, Lajmi i fundit, Politike / /

Ditët e fundit axhenda e zyrtarëve më të rëndësishëm të qeverisë është e mbushur me takime të niveleve ndërkombëtare dhe rajonale. Shqipëria pret çeljen e negociatave të anëtarësimit me Bashkimin Europian ndaj takimet diplomatike janë fokusuar në Bruksel. Ndërkohë, prioritet mbeten marrëdhëniet me aleatin strategjik, Shtetet e Bashkuara të Amerikës.

Në ndryshim nga kjo linjë zyrtare e diplomacisë dje ka renë në sy një fluturim i beftë i kryeministri Edi Rama drejt Turqisë për të takuar Presidentin Erdogan. Dy ditë më parë kryeministri ishte në Bruksel ku zhvilloi takime me gjithë drejtuesit e institucioneve të Bashkimit Europian, të cilët pritet të vendosin me 17 prill rekomandimin për negociatat. Në Komisionin dhe Parlamentin e BE-së, Edi Rama theksoi dhe një herë gatishmërinë e Shqipërisë për t’u bërë pjesë e Unionit Europian. Si zakonisht, mes lavdeve për vlerat europiane dhe vonesat e burokratëve të BE për të hedhur sytë nga Shqipëria, Rama nuk harroi të provokonte. Edhe këtë herë ai tha se BE duhet të shpejtojë me integrimin e Shqipërisë, e cila i ka bërë detyrat, në të kundër forca e tjera do të gjejnë terren në Ballkan. Duke nënkuptuar Turqinë dhe Rusinë si mike e Presidentit Erdogan.

Pas Brukselit, pa u kthyer në Tiranë dhe në Shkodër ku uji po bën namin, Edi Rama fluturoi drejt për te darka me presidentin turk Erdogan. Turqia, për shkak të problemeve me standardet e BE dhe së fundi tensionet ushtarake me Greqinë, në Bruksel ka kohë që shihet si një vend që po u largohet vlerave europiane. Zyrat e shtypit të presidentit turk dhe kryeministrit shqiptar shpërndanë dje foto dhe video nga takimi, por asnjë detaj se për çfarë kanë diskutuar politikanët kryesorë të dy vendeve. Mes dy qeverive ka një nivel bashkëpunimi të shkëlqyer gjatë viteve të fundit dhe Turqia cilësohet si partner strategjik i Shqipërisë. Këto ditë mes dy shteteve pritet të nis një linjë e re fluturimesh, si shenjë e shkëmbimeve të larta ekonomike. Ndërkohë është gati dhe firmosja e projektit të aeroportit të Vlorës, një investim 100 përqind i biznesit turk. Veç marrëdhënieve shumë të mira ekonomike Shqipëri-Turqi, mes Edi Ramës dhe Erdogan ka edhe një raport special miqësor. Dëshmi e këtij raporti që kalon nivelet diplomatike ishte dhe prania në takim e bashkëshortes së kryeministrit shqiptar, Linda Rama dhe bashkëshortes së presidentit turk, Emine Erdogan. Vila qeveritare e zgjedhur për takimin,  rezidenca “Tarabya” në mediat turke vlerësohet si një ambient ku Edrogan pret zakonisht politikanë të rëndësishëm dhe miqtë e tij personal. Edi Rama ishte dje në Turqi jo vetëm si kryeministri i Shqipërisë, por edhe si miku personal i presidentit  Erdogan. Jo më kot, ky raport mes politikanëve shpesh herë ka bërë që Edrogan të cilësohet për Edi Ramën si “babai shpirtëror”. Ndaj Edi Rama praktikon në Shqipëri dhe bile ia ka kaluar Erdogan në cënimin e lirive ekonomike dhe mediatike. Të gjithë e dijmë se kryeministri Rama ka futur gjithçka në dorë, tani edhe drejtësinë.

Ndërkohë që Rama takonte në brigjet e Stambollit Erdogan, ministri i Brendshëm, Fatmir Xhafaj  ndodhet prej disa ditësh në Shtetet e Bashkuara të Amerikës. Së bashku me drejtorin e Përgjithshëm të Policisë së Shtetit, Ardi Veliu dhe një ekip të Ministrisë së Brendshme, Xhafaj është takuar me zyrtarë të lartë të sigurisë së SHBA. Takimet përfshijnë bisedime me kongresmenë amerikanë, përfaqësues të Departamentit të Shtetit, drejtues të FBI dhe përfaqësues të zyrës kundër drogës, DEA. Në SHBA nuk është vështirë që një politikan të takojë kongresmenë, por në zyrat e DEA dhe FBI vetëm pak politikanë shqiptarë janë pritur. Kriteri i lobimeve me dollarë nuk pi ujë për drejtuesit e institucioneve të sigurisë si DEA dhe FBI. Ndaj mikpritja e Ministrit Xhafajt në këto takime dhe ndarja e informacioneve të rëndësishme, konfirmon zërat politikë në Tiranë se Ministri i Brendshëm është zgjedhur në këtë detyrë më mbështetje direkte nga SHBA.

Dhe si një kandidaturë zëvëndësuese për Edi Ramën në çdo rast që mund të ketë krizë në mazhorancën e PS-së.

Ministri Xhafaj në Uashington, Edi Rama në Stamboll Read More »

PD në ristrukturim të thellë, degët depozitojnë propozimet për ndryshimet në statut

Leave a Comment / Lajmi i fundit, Politike / /

Në 8 mars në mbledhjen e  kryesisë, kur  u vendos thirrja e Kuvendit Kombëtar dhe nisja e procesit të ristrukturimit të Partisë Demokratike, Kryetari Lulzim Basha, manadatoi një grup punë që do vendoste kontakte dhe do merrte cdo paltformë apo propozim për ndryshime  në statut.

22 Marsi ishte fiksuar si data kur ky grup që kryesohet nga nënkryetari Edi Paloka, dhe në përbërje ka  Edmond Spahon,  Sekretarin e Pergjithshem, Arben Ristani, sekretarët  Eno Bozdo dhe Fatbardh Kadilli, dhe  anëtarin  e Kryesise Gent Malko, të mbyllte punën kryesore të tij.

Burime të rezervuara i thanë Ora News, se grupet kundërshtare të Bashës, që evidentohen  me Astrit Patozin apo Ridvan Boden por dhe linja e Arben Imamit apo Jozefina Topallit, ende nuk kane dorëzuar propozime konkrete, ndërsa deri në këto momente janë vetëm  disa degë që kanë dhënë alternativat e tyre se cfarë duhet të ndryshojë në “ligjin” bazë se si funksionon kjo forcë politke.

Po të njëjtat burime  pranë grupit për statutin, theksuan se  kryesisht propozimet e degëve,  fokusohen tek vendimmarrja e anëtarësisë.  Një instrument  që vihet re pothuajse në cdo propozim është  që kandidatët për kryetar bashkie dhe për deputet, ti nënshtrohen  më parë votës së anëtarëve të Partisë Demokratike. Ky propozim në fakt është ushqyer edhe nga vetë kryetari i Partisë Demokratike Lulzim Basha, i cili pas listës së zgjedhjeve të 2017, deklaroi se ajo do ishte e fundit që mbante firmën e tij, pasi nga ai moment do ishte antarësia që do vendoste për përfaqësuesit e tyre.

Ka  propozime të tjera si përshembull,  ai që Sekretari i Pergjithshëm, Sekretari organizativ dhe 2 nënkryetarët të zgjidhen nga kuvendi kombëtar, në mënyrë që të  jenë persona politikë me mbështetje sa më të gjerë të anëtarësisë dhe jo nga këshilli kombëtar e nga marrëveshjet mes individëve .

Duket se faza e ristrukturimit, do të jetë një operacion i thellë në Partinë Demokratike, përvec rregullave se si do të funksionojë kjo forcë priten ndryshime dhe në strukturë. Ende nuk ka një draft konkret, po duket se struktura e Partisë Demokratike, e ndryshuar 4 vite më parë të rikthehet sërish ashtu sic e la ish-lideri Sali Berisha. Nga rreth 7500 anëtarë që ka Kuvendi Kombëtarë, pritet që me ndryshimet e reja ai të tkurret në 1500, po ashtu  tkurrje  do të ketë edhe Këshilli Kombëtarë, nga 275 anëtraë në 140.

Jashtë ristrukturimit nuk do të mbetet edhe Kryesia e Partisë Demokratike, nga 56 anëtarë që ka aktualisht ajo do të fokusohet në vetëm 15, të cilët do jenë figurat kryesore të kupolës drejtuese. Kuvendi kombëtarë që do të vendos për këto ndryshime,  do të mblidhet me 28-29 prill, ndërsa  parashikohet që e gjithë faza strukturimit të mbyllet brenda muajt qershor.

PD në ristrukturim të thellë, degët depozitojnë propozimet për ndryshimet në statut Read More »

Kryemadhi: Meta dhe gjithë LSI u përgjua nga Rama dhe Tahiri

Leave a Comment / Opinione, Politike / /

Kryetarja e LSI-së, Monika Kryemadhi deklaroi sot në emisionin “Opinion” se Ilir Meta si kryetar i Kuvendit është përgjuar në mënyrë sistematike nga Edi Rama dhe ish-ministri i Brendshëm, Saimir Tahiri.

Ajo tha se “gjithë LSI-ja, deputetët dhe drejtorët e saj janë përgjuar. Në LSI ka pasur qëndrime për ta denoncuar këtë fakt, por Ilir Meta në atë kohë nuk pranoi që kjo gjë të bëhej publike”.

E pyetur nëse ka fakte për këtë akuzë, Kryemadhi tha se “ka fatura doganore që tregojnë për zhdoganimin e softuerëve të përgjimeve”.

Ajo la të kuptohet se Presidenti përgjohet edhe sot.

Kryemadhi: Meta dhe gjithë LSI u përgjua nga Rama dhe Tahiri Read More »

Pas 26 vitesh Lulzim Basha ka zhdukur jo vetëm të djathtën por dhe opozitën

Leave a Comment / Opinione, Politike / /

Nga Jozefina Topalli

Gezuar 22 Marsin, diten e triumfit te demokracise.

26 vite me pare Partia Demokratike fitoi mbi regjimin me te eger diktatorial te EH.

26 vjet me pare, shqiptaret vendosen te nisin udhetimin e tyre drejt lirise,shpreses dhe integrimit te tyre me perendimin.

Ata ia dolen te liberalizojne vizat, te behen anetare te Natos, te CoE, te OSBE si dhe te behen anetare kandidat te BE.

Por pas 26 vitesh vendi ndodhet serish ne nje faze kritike : pa qeverisje dhe pa opozite.

Pas 26 vitesh shqiptaret po largohen nga shtepite e tyre sepse ata nuk shohin drite ne fund te tunelit; As ne kohet e pushtimeve, shqiptaret nuk kane ikur ne keta permasa si sot;

Pas 26 vitesh vendi yne permendet me shume per drogen dhe hashashin se sa per bukurine e natyres se saj apo per studentet dhe artistet shqiptare qe shkelqejne kudo;

Pas 26 vjetesh ne rreshtohemi si vendi me popullsine me te pa lumtur, gje qe nuk ka ndodh as ne ditet me te veshtira; rreshtohemi si vend shume i korruptuar, por mbi te gjitha si vend ku varferia e mjerimi jane shumefishuar dhe rinia eshte pa te ardhme; si vendi ku pasuria eshte perqendruar ne pak duar dhe ku vendimet politike nuk i marrin forcat politike , por vetem 4-5 titullare.

Sikur te gjitha keta te mos mjaftonin , ne vendin tone demokracia eshte ne rrezik.

Brenda PD, forces politike qe solli voten e lire, sot nuk ka me zgjedhje, nuk ka me forume, nuk ka me statut, nuk ka me debat.. te gjitha jane farse!

Dhe kjo eshte vetem njera ane. Pas 26 vitesh Lulzim Basha ka zhdukur jo vetem te djathten, por opoziten si garancine kryesore te qytetareve per t’i dale zot lirive si dhe te drejtave te tyre ekonomike, politike e sociale.

Pas 26 vitesh Lulzim Basha kerkoi shfuqizimin e 20 Shkurtit, dates se rrezimit te shtatores se diktatorit;

Pas reagimeve te forta Projetligji u terhoq ,me justifikime tamam si dikur; ku njeri bente autokritike te thelle( si dikur ne plenume), ndersa LB si gjithmone nuk dinte asgje , dhe i habitur per cfare po degjonte ,tamam si Pal Vata kur thoshte:”Pasha t’madhin zot, unë e Enveri s’dimë gja, ne pastë ba Mehmeti, me krye të vet!”

Sot me shume se kurre shqiptaret duhet te bejne nje reforme te thelle te forcave politike qe ata te mos mbeten si prone e titullarit ; Sot me shume se kurre interesi publik kerkon qe LB te beje transparence per burimet, kanalet e parave te lobimit;

Demokratet duhet te ngrihen per t’ i dale zot femijeve te tyre, familjes se tyre , partise se tyre, vendit te tyre;

Pas 26 vitesh Lulzim Basha ka zhdukur jo vetëm të djathtën por dhe opozitën Read More »

Droga, burgu dhe paratë ruse, zbardhet debati në Kuvend

Leave a Comment / Aktualitet, Politike / /

Rezoluta për punën e Komisionit Qendror të Zgjedhjeve për vitin e ardhshëm ka përplasur dje me maxhorancën dhe opozitën në Komisionin e Ligjeve. Gjatë mbledhjes, deputetët e opozitës kërkuan që në detyrat që do t’i lihen KQZ-së për vitin e ardhshëm, të vendosen si prioritet shtimi i masave parandaluese për moslejimin e shitblerjes së votës.

Sipas Oerd Bylykbashit, Prokuroria duhet të kishte nisur hetimet për ishministrin e Brendshëm, Saimir Tahirin, për të cilin sipas përgjimeve të Prokurorisë së Katanias, theksohet se ka përdorur 20 milion euro në zgjedhje.

“Shitblerja e votës mungon në këtë rezolutë. Pra, zgjedhësit nuk janë të lirë. Në qoftë se flasim për deklarime financiare, deklarim financiar më i fortë se ai që është në Prokurorinë e Katanias ku ish-ministri i Brendshëm shpenzon 5 milion euro deri në 20 milion euro për votat nuk ka. Madje Prokuroria duhet të fillojë ndjekjen penale për ish-ministrin e Brendshëm”,- tha dje Oerd Bylykbashi.
DEBATI PËR FINANCIMIN

Alket Hysenaj: KQZ duhet të hartojë metodologji për kontrollin dhe verifikimin e financimeve të partive politike dhe fushatave elektorale, duke verifikuar dhe mundësinë e lidhjes së marrëveshjes me autoritetet përgjegjëse, që kontrollojnë pastrimin e parave dhe financimet e kundraligjshme.

Nëse për procesin e kontrollit të financimit të partive politike KQZ-ja ka nevojë për mbështetje nga Kuvendi, të formulojë dhe të paraqesë sa më shpejt kërkesa konkrete të qarta.

Të thellojë dhe të përmirësojë shqyrtimin administrativ të verifikimit të financimit të fushatave zgjedhore për shkak se nga autoritete të huaja janë bërë publike prova dhe kontrata të reja, të cilat nuk janë shqyrtuar më parë nga KQZ.

Fatmir Mediu: Është e domosdoshme në këtë projektrezolutë të përfshijmë rekomandimet e OSBE-ODIHR. Duhet adresuar çështja e blerjes së votës, intimidimi i votuesve dhe përdorimi i fondeve apo institucioneve shtetërorë në shërbim të fushatës elektorale.

Oerd Bylykbashi: Për fat të keq, raporti i ODIHR-it konstaton shkelje të të gjitha standardeve bazë të zgjedhjeve. Duke filluar nga sekreti votës, barazia e votës, mosndë- rhyrjes së shtetit. Ndarjen e partisë nga shteti.

Dy rekomandimet prioritare të OSBE ODIHR-it për KQZ-në, janë që të ketë rol ndërgjegjësues, inspektues, hetues dhe për të çuar për ndjekje penale mungojnë në projektrezolutë. Shitblerja e votës mungon. Pra, zgjedhësit nuk janë të lirë.

Shitblerja e votës është diçka e padiskutueshme, në qoftë se flasim për deklarime financiare, deklarim financiar më i fortë se ai që është në Prokurorinë e Katanias ku ish-ministri Brendshëm shpenzon 5 milion euro deri në 20 milion euro.

Bashkim Fino: Po lëri këto mo..Do flasim për rusët? Ti sapo u ktheve nga Rusia.

Oerd Bylykbashi: Bashkim nuk ke marrë detyrë të bësh avokatin.

Adnor Shameti: Si e kishte ai lokali, 2love club?!

Gent Strazimiri: Po Gunvori juaj…?

Oerd Bylykbashi: Prit se them unë, Gunvor me Jurimexit. 5 milion euro në fushatë deri në 20 milion euro në fushatë… E thonë vetë. Deklarim financiar është ky, madje Prokuroria duhet të fillojë ndjekjen penale për ish-ministrin e Brendshëm.

Para e krimit dhe e korrupsionit që financon shitblerjen e votës. Kemi raste të konstatuara nga OSBE-ODIHR-i, që janë në ndjekje penale dhe askush nuk di asgjë se çfarë ka ndodhur me to.

Kjo çështje prioritare mungon dhe KQZ-ja ka rolin e vetë pa u ndryshuar ligji, për të bërë përpjekjet maksimale që të luftohet kjo.

Xhemal Qefalia: I keni çuar në Prokurori juve?

Enkelejd Alibeaj: Në burg do i çojmë…

Oerd Bylykbashi: Unë e kuptoj që arroganca që vjen në momentin kur ke shumë para kriminale, bën që të mos i mendosh këto elemente dhe kjo rezolutë kthehet në një letër që ia çojmë KQZ-së dhe që rikthejmë vitin që vjen.

Kjo rezultojë nuk ka vlerë pa këto prioritete. Financimi i partive politike është temë prioritare. Po sigurisht influencat në politikën shqiptare, përmendim Gunvorin. Duhet me pyet Kryeministrin për këtë apo Jurimexit, për këtë duhet me pyet Damian Gjiknurin. Gunvori që lëvron 30% të naftës ruse, sot ka derë të hapur në Kryeministrinë e Shqipërisë. Influencat janë atje, po flasim për miliarda, nuk po flasim për fara luledielli.

Ulsi Manja: Kishte propozime konkrete nga të dy palët dhe unë mendoj që duhet të ulen bashkërisht, të dakordë- soni një draft të rezolutës ku do të dalin në fokus të gjitha prioritetet që ka Kuvendi në raport me KQZ-në.

Enkelejd Alibeaj:Te ai telefoni që i binte Alketi, more vesh gjë ti nëse ishte i saktë ai po ?! (qesh).

Droga, burgu dhe paratë ruse, zbardhet debati në Kuvend Read More »