Politike

Kryeministri Edi Rama ka paralajmëruar ditën e djeshme arrestime të bujshme. Pas akuzave të kryetarit të Partisë Demokratike, Lulzim Basha sa i takon dorëheqjes së Saimir Tahirit nga mandati i deputetit, por edhe ndalimit të Arbër Çekajt në Gjermani, shefi i qeverisë theksoi se arrestimet e bujshme nuk do të ndalen. “Dhe nuk ka mbaruar jo, të tjera do pasojnë në javët që vijnë e jo se e kërkon Gjermania a bota, po se ne themi atë që bëjmë e bëjmë atë që themi!E jemi ne e askush tjetër që mund ta kalojë detin që ndan të thënat nga të bërat,sado baltë të na hedhin dhe zjarre marazi të ndezin”, deklaroi ai.

Ndërkohë, kryeministri Edi Rama shprehu habi lidhur me deklaratat e opozitës në adresë të tij. I pari i qeverisë iu kundërpërgjigj Partisë Demokratike duke i thënë se nuk mbështet arrestimet, pasi sipas tij, drejtohet nga vulëhumbur pa atdhe.

Megjithatë, kreu i ekzekutivit shtoi se pavarësisht sjelljes dhe qasjes së opozitës, mazhoranca qeverisëse është e vendosur që të ndërtojë Shqipërinë. “Ç’është kjo opozitë pikë e vrer pas largimit të ST e arrestimit të kokave të trafikut të kokainës në Gjermani&Spanjë falë bashkëpunimit tonë ndërkombëtar? Sa gjynah më vjen për ata që ende u besojnë këtyre vulëhumburve pa atdhe. Po duan s’duan këta Shqipërinë do ta bëjmë”, nënvizoi kryeministri Edi Rama.

Rama akuza opozitës

Kryeministri u ka dërguar dy ditë më parë dhe një mesazh tjetër eksponentëve të opozitës. Duke folur për mediat, shefi i qeverisë i përmendi Bashës aferën e rrugës Durrës-Kukës, kur shpëtoi me raport mjekësor. Ndërsa po ashtu i kujtoi Berishës ngjarjen e “21 Janarit”. Madje, ai akuzoi Sali Berishën, Lulëzim Bashën dhe Monika Kryemadhin se këtë sjellje e bëjnë, pasi sipas tij, janë të trembur nga reforma në drejtësi.

“Në Gjermani në Komisionin e Çështjeve Evropiane, unë thjesht i jam përgjigjur interesimit të një deputeti për këtë çështje duke dhënë edhe shpjegime bazuar në qëndrimin tonë që është publik këtu. Sa për lojën, lojë është t’i ikësh drejtësisë me raporte mjekësore siç ka bërë Lulzimi. Lojë është t’i ikësh drejtësisë duke e shantazhuar hapur dhe duke mos zbatuar urdhër-arrestet e prokurorisë siç ka bërë Saliu bashkë me Lulzimin pas 21 Janarit. Lojë është gjithçka që ka ndodhur me drejtësinë në gjithë këto vite.

Ndërkohë që sot, Saliu, Monika, Lulzimi janë shumë të shqetësuar, sepse pikërisht kjo lojë po ndryshon. Dhe nuk jemi më në fushën e lojës së vjetër , por jemi në një fushë të re ku po mbillet dhe po çel fara e një drejtësie të re”, deklaroi ai. Reagimi i kryeministrit Edi Rama erdhi pas deklaratave që Berisha e Kryemadhi thanë se ja kërkuan në Gjermani dorëheqjen e Tahirit.

Po ashtu, Rama ka hedhur poshtë akuzat e opozitës se ishte ai që i kërkoi Saimir Tahirit të jepte dorëheqjen nga posti i deputetit. Shefi i qeverisë ka folur mbi veprimin e ish-ministrit, duke e cilësuar si një akt dinjitoz. Madje, ai theksoi se nuk ka pasur fare dijeni se ai do të jepte dorëheqjen. /SOT

Në javën e Europës dhe në çelje të ekspozitës së kodikëve, vëllimeve më të moçme të trashëgimisë sonë humaniste dhe shpirtërore, kryeministri Edi Rama gjeti sërish rastin për të kërkuar nga vendet anëtare të BE për të dhënë rekomandimin e tyre për çeljen e negociatave të anëtarësimit.

Në fjalën e tij ai tha se me Baskimin Evropain jemi shumë afër, por ata janë BE ndërsa Shqipëria është vetëm E. Që sipas kryeministrit ne jemi vetëm Evropë, ndërsa ata që janë Bashkim Evropian.

“Është një proces rizbulimi për shqiptarët dhe zbulimi për europianët, ne jemi një pavarësisht se fati na ka ndarë, ata në BE, ne në E. Këta matanë dhe në këtej, dhe në kërkimin e B-së përpara E-së, ne jemi fal edhe një bashkëpunimi me ta ne jemi në një përpjekje ku shpeshherë ku mundohemi dhe lëndohemi, ku këtyre B-ja u mjafton që të zvogëlojnë E-në tonë. Jam i gëzuar që ky aktivitet dëshmon se për ne viti i Skënderbeut nuk është një vit i zhurmave nacionaliste, siç u tremben këta, por është një vit i Europës me BE të mëdha, të asaj Europë që e mishëron si një simbol të jashtëzakonshëm për ne, Gjergj Kastriot Skënderbeu, dhe nga ana tjetër ky aktivitet e plotësoi me së miri Javën e Europës. por ne s’duam të jemi europianë, por të respektohemi aq europianë sa jemi”, ishte kjo deklarata e Ramës.

Ish ministri i brendshëm Saimir Tahiri ka dhënë dorëheqjen nga mandati parlamentar. Shkaku? Akuzat e ardhura nga Prokuroria dhe pretendimet e ndryshme për përfshirje të tij në aktivitet kriminal. Kuvendi pati refuzuar në tetor 2017 miratimin e kërkesës së Prokurorisë së Krimeve të Rënda për arrestimin e tij, akt që solli kritika të ashpra nga institucione vendore dhe ndërkombëtare që monitorojnë demokracinë dhe shtetin e së drejtës në Shqipëri. Prej atëherë ishte deputet, madje në seancën e fundit ai u paraqit në parlament për të mos rrezikuar humbjen e mandatit për shkak të mungesës fizike 6 mujore.

Vendimi i deputetit për të dhënë dorëheqje nga posti parlamentar nuk është i vetmi gjatë dy legjislaturave të fundit. Në total janë 19 deputetë që kanë dhënë dorëheqje për motive të ndryshme, pa llogaritur deputetët që dorëzuan mandatet parlamentare për shkak të emërimit ministër ose për shkak të kandidimit për kryetar bashkie në zgjedhjet lokale 2015.

Në listën e 19 deputetëve të dorëhequr shumica janë dorëheqje taktike, kryesisht të imponuara nga partia politike (kalim i mandatit tek deputeti i gjinisë tjetër) ose për shkak të synimit të posteve ekzekutive (në fundin e mandatit). Nga dorëheqjet e tjera, kemi tri raste të deputetëve që kanë dhënë dorëheqje pa arsye specifike, kryesisht për të vijuar aktivitetin privat tregtar ose për të refuzuar mandat në një periudhë të shkurtër kohore.

Në listë ka tre raste kur deputetët kanë dhënë dorëheqje nga mandati për shkak të akuzave nga Prokuroria dhe hetimeve ligjore të ndërmarra ndaj tyre. Konkretisht, ish deputeti Frroku u arrestua dhe u akuzua për disa vepra penale përpara se ai të deklarojë dorëheqje nga mandati parlamentar. Pas tij rasti i dytë është ai i ish deputetit të PS Prenga, i përfshirë në një ngjarje me pasoja penale. Edhe ai lajmëroi dorëheqjen nga posti përpara se të bëhen të ditura të dhëna të reja që lidhen me dekriminalizimin. Deputeti i tretë me këtë status është Saimir Tahiri, edhe ky në proces hetimor nga Prokuroria.

Në total në 28 vite janë rreth 70 deputetë që kanë dhënë dorëheqje nga mandati, shumica absolute e tyre për arsye taktike (emërim në poste të tjera, kandidim në zgjedhje lokale apo papajtueshmëri në funksion), ndërkohë që kemi të paktën 15 raste të deputetëve që kanë dorëzuar mandatet nën akuzë direkt (si individ) ose indirekte (si subjekt politik) apo në kuadër të dekriminalizimit dhe papajtueshmërisë së vlerësuar nga Gjykata Kushtetuese.

A është dorëheqja një akt me vlerë morale? Po, por ka ndodhur shumë rrallë. Për shembull, Ismail Lleshi dha dorëheqje më 2001 nga mandati parlamentar kur u bënë të njohura parregullsitë e numërimit të votave në zonën e tij elektorale. Më 1997 kreu i Ballit Kombëtar Ermenji dha dorëheqje për papajtueshmëri politike me zhvillimet politike në  vend.

Një emër i madh i sportit Medin Zhega dha dorëheqje edhe në shenjë protestë ndaj zhvillimeve politike, Rudina Seseri dha dorëheqje politike më 2011, etj.  A kanë lidhje dorëheqjet e fundit, përfshirë z.Tahiri, me rastet morale dhe vlerat politike? Qartësisht jo. Kemi të bëjmë me lëvizje taktike politike dhe me një proces hetimor ndaj tij ashtu edhe me ambicie të tij për të vijuar të jetë aktor në politikë edhe në të ardhmen.

Kuvendi ka miratuar Kodin e Sjelljes dhe në parimet e mira demokratike është trend reagimi parlamentar ndaj akuzave të ndryshme, përmes dorëheqjes së menjëhershme, pranimit të përgjegjësisë politike dhe përballjes më pas me drejtësinë nëse ka prova për përgjegjësi ligjore. Tradita e brishtë shqiptare nuk ka raste të tilla dhe çdo përpjekje për të krijuar lidhje ngjashmërie midis akteve tona të dorëheqjes së detyrueshme ose taktike me aktet e dorëheqjes në vende me kulturë demokratike, janë jo serioze dhe deformuese për konceptet reale të demokracisë funksionale, moralit politik dhe shtetit të së drejtës.

Instituti i Studimeve Politike / ISP