Politike

Për hapjen e negociatave, BE-ja vendosi disa kushte ku më kryesorja është ngritja e SPAK-ut , por mesa duket qeveria e ka gati terrenin për ngritjen e SPAK dhe BKH. Në bazë të dokumenteve zyrtare, terreni për të ngritur SPAK dhe BKH është gati dhe tani priten vetëm rezultatet e vetingut. Sipas ligjit, SPAK ngrihet 2 muaj pas zyrtarizimit të KLGJ dhe të KLP.

Sipas ‘’SOT’’ ngritja e SPAK kërkon 1.4 milionë euro fonde dhe se qeveria nga ana e saj ka akorduar deri më tani 1.4 miliardë lekë. SHBA ka përzgjedhur makinën e të vërtetës që do vendoset në SPAK, të cilës do i nënshtrohen gjyqtarët dhe prokurorët dhe po ashtu janë bërë gati kompjuterët dhe pajisjet hetimore që do jenë për prokurorët dhe hetuesit.

Sapo KLGJ dhe KLP të zyrtarizohen, më pas do të ngrihet një komision i posaçëm, i cili do të bëjë verifikimin e gjyqtarëve dhe prokurorëve që do të garojnë për SPAK. Kushdo që do hyjë aty duhet të heqë dorë nga privatësia pasi 24 orë do jetë në përgjim dhe po ashtu do i kontrollohet çdo llogari bankare.

Plani i qeverisë

Pavarësisht vendimit të BE, qeveria ka miratuar pak ditë më parë një strategji për luftën ndaj korrupsionit. Sipas planit të qeverisë, deri në dhjetor 2018 do të jetë përgatitur i gjithë terreni për të goditur në nivele shumë të larta. Sipas këtij plani, prokuroria, gjykatat, policia, Drejtoria e Pastrimit të Parave dhe Inspektorati i Lartë i Deklarimit dhe Kontrollit të Parave do të bëhen bashkë për të luftuar korrupsionin. Qeveria ka planifikuar që deri në dhjetor të ndryshohen disa ligje, sidomos ai i pastrimit të parave, ku do të forcohen rregullat për transfertat bankare.

Po ashtu do ketë rritje të kapaciteteve dhe marrëveshje me vendet partnere që të zbulohen paratë e fshehura jashtë vendit. Gazeta ka mësuar se pranë Akademisë së Sigurisë, muajt e fundit janë trajnuar dhe ekspertë të fushave të ndryshme, si ekspertë kontabël, financierë IT, etj., të cilët po ashtu pritet që të bëhen pjesë e SPAK. Tani pritet vetëm përshpejtimi i vetingut dhe sapo të ndodhë kjo, atëherë në politikën shqiptare do të ketë reprezalje.

Shtyrja e negociatave në qershor të vitit të ardshëm pritet të sjellë furtunë në qeveri, pasi priten largime ministrash. Sinjalet janë dhënë ditën e djeshme nga shefi i qeverisë ku u ka dhënë atyre edhe disa porosi. Burime për gazetën ‘’SOT’’ thonë se Rama i ka thënë atyre se ka ardhur koha për rifreskime në qeveri.

Sinjalet janë se kryeministri Rama do të ndërmarrë një reformë rrënjësore në qeveri, e cila nuk do kursejë as zv/ministrat apo Sekretarët e Përgjithshëm. Po ashtu Edi Rama ka njoftuar edhe mbledhjen e Asamblesë Kombëtare, ku do të bëhet edhe bilanci i bashkëqeverisjes por nuk ka përcaktuar akoma një datë të saktë.

Pra të gjitha këto ndryshime, bëhen për t’i hapur rrugë reformave të kërkuara nga Bashkim Europian. Megjithatë, mbetët për t’u parë në ditët në vijim se çfarë do të ndodhë më konkretisht.

Ja kush janë më të rrezikuarit

Një tjetër komponent tek i cili do të bazohet kryeministri Edi sa i takon ndryshimeve në qeveri është edhe turi i llogaridhënies, i cili mësohet se është mbyllur. Në fillim të muajit maj kryeministri dhe ministrat nisën një proces takimesh në të gjitha njësitë administrative në vend, me qëllim njohjen më nga afër të problemeve të qytetarëve.

Por nga ky tur takimesh është vënë re se ka shumë pakënaqësi. Si në platformën e bashkëqeverisjes, ashtu dhe përmes shkresave apo komunikimit direkt, mësohet se janë me mijëra qytetarët që denoncojnë punën e ministrave. Sidoqoftë, në muajin korrik kryeministri Edi Rama pritet që të mbledhë Asamblenë e Partisë Socialiste, ku do të bëhet një bilanc i ankesave për secilin sektor dhe atje ku çalon puna, ministrat do të duhet të largohen dhe t’u lënë vendin emrave të rinj.

Kohët e fundit qeveria është vënë me shpatulla pas murit nga opozita, ku nuk kanë munguar sulmet dhe akuzat. Kjo ka bërë që dhe shumë ndërkombëtarë të kthejnë sytë nga vendi ynë dhe të monitorojnë me kujdes situatën. Për këtë arsye kryeministri po mendon të emërojë në qeveri njerëz me integritet dhe që i përshtaten funksionit.

Paralajmërimi i Ramës për ministrat

Në fund të muajit prill, nga Asambleja e Partisë Socialiste, kryeministri Edi Rama paralajmëroi se do të ketë ndryshime në qeveri, madje dhe parti, që sipas tij, pritet që të ndodhin në shtator, por edhe pas fushatës së takimeve me qytetarët për bashkëqeverisjen. “Çfarë ndryshimesh, nëse do të jetë e nevojshme, në qeveri në shtator duhet të ndryshojmë, cilat ministra, ministri apo sektorë nuk janë në lartësinë e kësaj nevoje, që jo thjesht të tregoj shifra dhe statistika po të kenë vendin e tyre në mendjet e zemrat e atyre që na kanë dhënë besimin. Në fund të kësaj fushate do të shohim cilët anëtarë të kryesisë së partisë duhet të largohen nga kryesia dhe cilët janë të rinjtë që duhet të vijnë”, theksoi kryeministri Edi Rama

Dy ambasadorët e akredituar në vendin tonë, Donald Lu dhe Romana Vlahutin kanë rrëzuar pretendimet e opozitës për hapjen e negociatave, kështu raporton ”SOT”.  Fillimisht Donald Lu përmes një njoftimi në faqen zyrtare të ambasadës amerikane e cilsësoi pozitiv vendimin e BE-së për hapjen e negociatave më 2019.

Në këtë drejtim ambasadori i SHBA deklaroi se ka ardhur koha që edhe Shqipëria të nisi luftën me zero tolerancë ndaj korrupsionit. “Përgëzojmë Shqipërinë për vendimin pozitiv në lidhje me hapjen e bisedimeve për anëtarësim në BE. Shqipëria ka bërë përparim domethënës dhe tani nevojitet të rrisë përpjekjet për të përfunduar reformat kyçe. Ne e nxisim Shqipërinë që të rrisë ritmin në reformën në drejtësi, luftën kundër korrupsionit dhe kundër krimit të organizuar”, deklaroi ambasadori i SHBA-vë në Tiranë, Donald Lu.

Vlahutin përshëndet vendimin e BE

Vendimin e BE-së e ka komentuar dhe përshëndetur ditën e djeshme edhe ambasadorja e Bashkimit Europian, Romana Vlahutin, e cila deklaroi se Këshilli ka pranuar që Komisioni të nisë punën përgatitore me Shqipërinë për negociatat. Dhe për këtë ajo theksoi se Shqipëria ka marrë 3 gjëra pozitive. “Shqipëria ka marrë 3 gjëra pozitive.

E para është njohja e rekomandimit dhe reformave që janë bërë, gjë që është shumë e rëndësishme.

E dyta është një kalendar i qartë dhe një datë për konferencën ndërqeveritare dhe kjo është shumë e rëndësishme.

Dhe e treta këshilli ka pranuar që komisioni ka për qëllim të nis punën përgatitore. Mund t’iu them për veten, për delegacionin, për të gjithë koleget që punojnë fort në Bruksel, ne jemi të lumtur”, deklaroi ajo. Po ashtu, Vlahutin shtoi se qershori 2019 është një kalendar i qartë dhe sipas saj, në botën e Bashkimit Europian do të thotë se ka një angazhim për këtë datë. “Po po, ky është kalendari. Dhe kjo është ajo çfarë do të dëgjoni nga ambasadori i ardhshëm i BE-së në Tiranë, por ky është qëllimi. Nuk mund t’ju them për këtë një vit përpara, por ky është kalendari. Në botën e BE-së kjo tregon se ka një angazhim për këtë datë.

Pra kalendari është shumë i qartë, por në ditët në vijim kur të kemi të gjitha detajet do t’i ndajmë me ju”, nënvizoi ambasadorja e BE-së në Tiranë, Romana Vlahutin. Bëjmë me dije se negociatat e Bashkimit Europian me Shqipërinë dhe Maqedoninë do të nisin në Qershor të 2019-ës. Vendimi është marrë pas një mbledhjeje të gjatë e të mbushur me debate të ashpra nga Ministrat e Jashtëm të shteteve anëtare në Këshillin e Çështjeve të Përgjithshme, e cila u zhvillua dy ditë më parë në Luksemburg.

25 vende kanë qenë që në fillim mbështetëse të idesë për çeljen e bisedimeve në verën e vitit të ardhshëm, ndërsa Franca, Danimarka dhe Holanda janë treguar fillimisht më skeptike duke propozuar një shtyrje të këtij procesi. Megjithatë, në fund të mbledhjes është dalë me një qëndrim të përbashkët, ku janë vendosur edhe një sërë pikash kyçe që duhen zbatuar nga të dyja vendet.

Edi Rama e ka nisur urimin e mëngjesit për ndjekësit e tij në Facebook me postimin e të dhënave të fundit në lidhje me numrin e pasagjerëve të transporitit ajror. Kryeministri shprehet se ka një rritje mbrelënëse në 6 vitet e fundit në numrin e pasagjerëve të transportit ajror.

Statusi i Edi Ramës në Facebook:

“MIRËMËNGJES 😃 dhe me këto tregues të rritjes mbresëlënëse gjatë 6 viteve të fundit në numrin e pasagjerëve të transportit ajror, si edhe me lajmin e mirë që në 5 muajt e parë të vitit, hyrjet e të huajve në vendin tonë janë rritur me 9.7% krahasuar me të njëjtën periudhë të një viti më parë, ju uroj një ditë të bukur ✌”- shkruan Rama.

Pas postimit të këtyre shifrave të shumta kanë qenë reagimet e komentuesve në adresë të kryeministrit Rama.

Deputetja socialiste Elisa Spiropali në një reagim pas vendimit për negociatat, thotë se Shqipëria është në rrugë pa kthim drejt antarësimit.

“Do kthehemi në shtëpi të gjithë bashkë! Shqipëria dhe Maqedonia  kanë tashmë një datë dhe janë në rrugën pa kthim të anëtarësimit. Ata që klithin por s’dëgjohen, shpifin por nuk turpërohen, ata që në këtë orë të mirë të kombit sterrojnë, do mbahen mend gjatë për aventurën e tyre të dëshpëruar për të kthyer pas orën e historisë.

Shqipëria do bëhet, edhe për inat të tyre, por fatmirësisht edhe për ta.  Forca Shqipe, me Ty gjithmonë💪🙏”, shkruan Spiropali.

Ngushtohet shumë “laku” për ish kryeministrin Sali Berisha dhe Presidentin Ilir Meta, teksa abuzimet që kanë kryer me privatizimin e OSSH nga CEZ dhe kompaninë e mbledhjes së borxheve të këqia DIA mund t’i dërgojë ata para drejtësisë.

Pas më shumë se dy muaj bllokim, fakt ky i publikuar dhe nga “Pamfleti” disa herë, ka rinisur procesi gjyqësor ndaj dy ish-zyrtarëve të CEZ Shpërndarje, Josef Hysek dhe Jan Ivan, të akuzuar për shpërdorim detyre, falsifikim dokumentesh dhe vjedhje.

Në seancën e sotme u paraqit prokurorja e re e dosjes, Mirela Zalavani, ndërsa prej javësh ky proces shtyhej, pasi kishte mbetur pa përfaqësues nga akuza.

Hysek dhe Ivan nuk ishin të pranishëm, ndërsa avokati i tyre, Arben Rakipi, kërkoi shpalljen e pavlefshme të disa raporteve kontabël, pasi sipas tij ato janë hartuar pa dijeninë e klientëve që ai mbron.

Dy shtetasit çekë janë nën akuzë, pasi sipas Prokurorisë shqiptare në bashkëpunim me Kastriot Ismailajn, i dënuar me mbi 11 vite burg, ata kanë falsifikuar bilancet e borxheve dhe nëpërmjet kompanisë DIA, të drejtuar nga Ismailaj, kanë përfituar vlera monetare.

Ndërkohë që kanë qënë të përfshirë dhe krerët më të lartë të shtetit shqiptar në këtë aferë, ku Sali Berisha dhe djali i tij kanë përdorur si sekser Nuel Kalajn për të përfituar nga 414 milionë euro nga privatizimi i OSSH nga CEZ.

Nuel Kalaj, miku i Shkelzen Berishës mori në një nga bankat e nivelit të dytë në Shqipëri një shumë prej 7 milionë eurosh me një dorë dhe tashmë është zhdukur në drejtim të paditur.

Deri më tani kanë dëshmuar për aferën e CEZ dy drejtuesit çekë të kompanisë, si dhe djali i ish kryeministrit, Shkelzen Berisha.

Ndonëse është vendosur për thirrjen dhe të ish kryeministrit Sali Berisha, për të dëshmuar për këtë aferë ku shteti ka humbur 414 milionë euro, ai ende nuk ka shkelur në dyert e organit të akuzës. Madje nuk ka pasur ende një thirrje zyrtare për të dhënë këtë dëshmi.

Ndonëse Berisha e ka dhënë një dëshmi në komisionin parlamentar të hetimit të aferës së CEZ, të kryesuar nga Balla, organi i akuzës mendon se një dëshmi tjetër para prokurorëve, që janë ekspertë të kësaj çështjeje nga ana e Berishës do të ndihmonte shumë në zbardhjen e kësaj afere, që ka precipituar në këtë mënyrë, me këtë dëm të madh financiar.

Mësohet se kanë mbërritur dokumente e prova shtesë nga Praga për këtë qëllim.
Njëherësh pritet të thirren për të dëshmuar dhe ish drejtori ekzekutiv i DIA Elvis Matajish. Ish kreu i LRI dhe një nga njerëzit e afërt te Metës është zhdukur në drejtim të paditur, pas përplasjes me Presidentin aktual dhe ish kreun e LSI, për shkak se nuk pranoi të mbante në kurriz pisllëqet e Ilir Metës.

Presidenti Meta, i cili disa herë është shprehur në parim se sa herë të thirret nga drejtësia do të jetë në dizpozicion të saj, pritet të thërritet për të dëshmuar, jo vetëm për akuzat e Matës, por dhe për ato të Kastriot Ismailajt dhe bashkëshortës së tij, që akuzojnë ish kreun e LSI se ka bërë presion ndaj tyre.

Madje janë zbardhur shumë sekrete , një ndër to mund të jetë dhe vdekja e papritur e ish ambasadorit shqiptar në Pragë, Qazim Tepshi, apo drejtorit juridik të METE, Zamir Stefani. Të dy, të marrë gjërësisht me dosjen e CEZ-DIA.

Ndaj rikthimi i gjykimit të dy drejtuesve çekë të CEZ, pritet të dërgojë në gjykatë dhe Sali Berishën me gjithë djalin Shkelzen dhe Ilir Metën./Pamfleti